Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anne kittaka nacaritai kana-kana napabattua Yeremia ana’na Hilkia, kalase’renna imang battua ri kota Anatot ri daerana Benyamin.
2 A’bicara Batara mae ri Yeremia ri taung makasampulona antallu lalang ammarentana Yosia ana’na Amon karaeng Yehuda.
3 Le’baki anjo a’bicarai pole Batara ri ia a’mole-mole, appakaramula ri rewasa’ ammarentana Yoyakim ana’na Yosia sa’genna taung makasampulo asse’re ri rewasa’ ammarentana Zedekia ana’na Yosia. Ri bulang makalima anjo todong taunga niengkaki pandudu’na Yerusalem mange ri butta pammelakkanga.
4 Nakana Batara ri nakke,
5 "Ri wattu tenanapa Kupa’jariko lalang ri battanna amma’nu, siagang ri wattu tenanapa nanilassukangko, le’ba’ memang mako Kupile siagang Kuangka’ untu’ a’jari na’bi mae ri bansa-bansaya."
6 Appialia’ angkana, "O Batara Kaminang Tinggia, inakke tena kucara’de’ a’bicara lanri rungka dudu ija’."
7 Mingka appiali Batara angkana, "Teako angkanai rungka dudu ija’. Punna Kusuroko mange manna pole ri nai, musti a’lampako, siagang sikontu apa Kusuro paua, musti nupabattui mae ri ke’nanga.
8 Teako mallakki mae ri ke’nanga, nasaba’ iNakke lanrurungangko untu’ anjagaiko. INakke Batara, anne akkana!"
9 Le’baki anjo Napajonjomi limanNa Batara nampa Najama bawaku na Nakana, "Pilangngeri siagang pa’la’bangi anne kana-kana Kupaua.
10 Anne alloa Kusareko koasa mange ri bansa-bansaya siagang sikamma kakaraenganga — iamintu koasa untu’ appara’ba siagang anrumbang, untu’ apagulung siagang ammanraki, kammayatompa untu’ appabangung siagang a’lamung."
11 Akkuta’nangi Batara ri nakke angkana, "Apa nucini’ Yeremia?" Appialia’ angkana, "Tangke kayu badang, Batara."
12 Nakanamo Batara, "Kammatojengi. Kujagai sollanna sikontu apa Kupaua a’rupai."
13 Nampa akkuta’nang pole Batara ri nakke angkana, "Apa pole nucini’?" Appialima’ angkana, "Bageang wara’ nia’ kucini’ uring a’rere bonena na’biring anra’ba mae anrinni."
14 Nakanamo Batara, "Battu waraki lallumpa bala lompoa nampa natuju sikontu pandudu’na anne pa’rasanganga.
15 LaKusuroi sikontu bansaya ri bageang wara’ battu angkoasai Yerusalem. Sikamma tembo’-tembo’ niaka ri tammulilina anne kotaya siagang sikamma pakke’bu’ lompona kammayatompa sikontu kota-kotaya ri Yehuda lanaalle ngasengi ke’nanga.
16 LaKuhukkungi ummakKu, lanri dorakai ke’nanga siagang nabokoiA’. Assaremi ke’nanga koro’bang mae ri rewata-rewata maraenga, kammayatompa appare’mi ke’nanga patung-patung nampa nasomba.
17 Sadia-sadia mako Yeremia! A’lampamako siagang pabattui mae ri ke’nanga, sikontu apa Kuparentakanga mae ri kau. Teako mallakki mae ri ke’nanga, sollanna tena naKupa’jari pila’ mallakko punna assidallekangko siagang ke’nanga.
18 Pilangngeri! Lanibaliangko ri pandudu’na anne pa’rasanganga, iamintu sikamma karaenna Yehuda, sikamma tau anna’galaka pamarentahang, sikamma imanga, siagang ra’yaka. Mingka anne alloa Kusareko kagassingang untu’ angngewai ke’nanga. La’jariko rapang kota niaka tembo’ pattahanganna, rapang benteng bassi siagang tembo’ tambaga. Takkulleai ke’nanga ambetako, nasaba’ iNakke lanrurungangko siagang anjagaiko. INakke, Batara anne akkana."
19 (1:18)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA