Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai roh ma hata ni Jahowa hu bangku mangkatahon,
2 “Ho ale anak ni jolma, sonon do hata ni Tuhan Jahowa pasal tanoh ni Israel: Na roh ma ujungni, ujung ni suhi-suhi na ompat ni tanoh in.
3 Sonari ma roh ajal ai bam, pasogopon-Ku ma ringis-Ku bam, anjaha uhumon-Ku ho romban hubani parlahoumu; anjaha pinsangon-Ku ho halani haganup hasamboronmu.
4 Seng maidop matang-Ku mangidah ho, seng holong atei-Hu, tapi uhumon-Ku do ho romban hubani parlahoumu, anjaha manginsonoh i tongah-tongahmu hasamboronmu, jadi tandaonmu ma, Ahu do Jahowa.”
5 Sonon do hata ni Tuhan Jahowa, “Mardapot-dapot do roh hasedaon.
6 Na roh ma ujungni, ujungni domma roh; domma puho na mandorab ho. Tonggor ma, roh ma!
7 Roh ma hasedaonmu ale pangisi ni tanoh in; domma roh panorangni, domma dohor ari ai, ari hageoron, sedo ari olob-olob, i atas dolog-dolog.
8 On pe barah ma duruskonon-Ku ringis-Ku bam, anjaha padason-Ku gilang-Ku bam, anjaha uhumon-Ku ho romban hubani parlahoumu, anjaha mangonai bam bahenon-Ku haganup hasamboronmu.
9 Seng maidop matang-Ku mangidah ho, seng holong atei-Hu, tapi uhumon-Ku do ho romban hubani parlahoumu, anjaha manginsonoh i tongah-tongahmu hasamboronmu. Jadi tandaonnima ma, Ahu do Jahowa sipanlonsing.
10 Tonggor ma, ari ai! Tonggor ma, roh ma! Martunas do hagedukon, marbunga pangenjengon.
11 Timbul do siunsagahkon gogoh bahen lonsing-lonsing bani hajahaton. Seng dong be na tading humbani sidea, sonai humbani habayakon ni sidea, atap humbani hadoharonni, salpu do haganup hasangapon ni sidea.
12 Domma roh panorangni, dohor ma ari ai. Ulang ma marmalas ni uhur sipamboli anjaha jundoh sipanjual, ai gajag ni ringis do na mangonai bani haganup hadoharonni.
13 Seng ulakan ni sipanjual be marjualan, age pe manggoluh ope sidea; ai seng tarolati be ringis dompak hadoharon ni sidea ai, anjaha seng dong be na boi manjolomi goluhni halani hajahaton ni sidea.
14 Isompul pe tarompit, anjaha domma sirsir haganup ibahen, tapi seng dong na borani bingkat hu parporangan, ai domma sogop ringis-Ku dompak haganup hadoharon ni sidea.
15 I darat, podang do na manraseihon, i huta, sampar pakon lohei, halak na i juma matei do ibahen podang, halak na ibagas huta bois do bahenon ni sampar pakon lohei.
16 Anjaha anggo adong na maluah, bani dolog-dolog ma sidea ai, haganup hutur-hutur songon kuhui i habungan, halani hajahaton ni sidea bei.
17 Haganup do tangan galek, anjaha haganup towod hitir-hitir.
18 Marhiou guni do sidea, anjaha hagobiron manrongkob sidea; habadoron do bani bohi ni sidea, anjaha hona palpal ganup ulu ni sidea.
19 Ipansampakkon sidea do pirakni hu alaman, anjaha omas ni sidea ihira songon tompoh-tompoh; ai seng boi pirak ampa omas ni sidea paluahkon sidea bani ari ringis ni Jahowa; seng tarpasombuh sidea loheini atap targoki sidea boltokni marhitei ai. Ai do na mambahen jomba sidea ibagas hajahaton ni sidea.
20 Ugas-ugas ni sidea na jenges ai do mambahen gijang uhur ni sidea, ipauli sidea do hunjai gana-gana ni sidea sihagigihononkon ai; halani ai do ase gabe tompoh-tompoh ai bani sidea Hubahen.
21 Ondoskonon-Ku do ai bani halak na legan gabe sirampason ampa bani halak parjahat na i tanoh on gabe sitabanon; butakon ni sidea ma ai.
22 Padaohon-Ku do bohing-Ku humbani sidea, ai ibutaki sidea do ianan-Ku na pansing in; jadi masukan ni panamun ma hubagas anjaha pabutakon ni sidea ma ai,
23 hitir anjaha sursar ma bahenon ni sidea ai. Ai gok panduruson daroh do tanoh ai anjaha gok odoh-odoh do huta ai.
24 Jadi parohon-Ku ma bangsa sijahatan humbani bangsa-bangsa, laho mambuati rumah ni sidea, parontihonon-Ku ma pangenjengon ni sidea ai, anjaha gabe butak ma ianan ni sidea na mapansing ai.
25 Habiaran do na roh, mangindahi haluahon do sidea, hape seng jumpahsi.
26 Mardapot-dapot do roh hamagouan, mardapot-dapot do roh barita na masambor. Manungkun panjahaion do sidea humbani nabi, tapi seng dong be pangajarion bani malim ampa podah bani pangintuai-pangintuai.
27 Marhoru do raja, mandolei kopala-kopala, anjaha margonggong do tangan ni halak na i nagori in halani biarni. Domu hubani parlahouni do Hubahen hubani sidea, anjaha Huuhumi sidea domu hubani na patut jaloonni; jadi botohon ni sidea ma, Ahu do Jahowa.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA