Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ PANGERAN adhabu, "He, manossa se ta’ langgeng, kassa’ ngala’ peddhang se tajem, angguy nyokor janggu’ ban obu’na ba’na. Saellana jareya, tembang obu’na jareya e tembangan, pas pantha patello.

² Se sapartellon kodu obbar e nga’-tengnga’anna kottha jareya saellana pangeppongan la mare. Se sapartellonna pole cacca ban peddhangnga sambi alengleng e sabingkerra kottha jareya. Ban karena se sapartellonna kodu tabur ka bang-abang, bi’ Sengko’ pas eserserra bi’ Tang peddhang.

³ Obu’ jareya dinae sakone’, pas bundu’ e dhalem kellemanna jubana ba’na.

⁴ Obu’ jareya pas kala’ pole sakone’, ontallagi ka dhalem apoy, dina pasampe’ katonon. Dhari kennengngan jareya apoy bakal alatlada ka saantero Isra’il."

⁵ GUSTE Allah Se Mahatenggi adhabu, "Abassagi, reya’ Yerusalim. Kottha reya bi’ Sengko’ esaba’ e pusadda dunnya, ekalenglenge ra-nagara laenna.

⁶ Tape Yerusalim la nolak Tang parenta ban nyata ajahadan dhari sa-bangsa laenna, la’-mala’ lebbi ta’ ta’at mon etembang bi’ ra-nagara e sakalenglengnga. Yerusalim ta’ endha’ atoro’ ka Tang parenta ban ta’ atoro’ ka Tang kom-hokom."

⁷ GUSTE Allah Se Mahatenggi adhabu, "E Yerusalim, mara edhingngagi! Ba’na ta’ atoro’ ka Tang kom-hokom ban ka sabarang se eparenta’agi Sengko’; ba’na ta’ atoro’ ka Sengko’ alebbidan dhari sa-bangsa laen e sakalenglengnga ba’na, ban la noro’agi adadda sa-bangsa jareya.

⁸ Daddi Sengko’, GUSTE Allah Se Mahatenggi, anyata’agi ja’ Sengko’ reya mosona ba’na. Bi’ Sengko’ ba’na eokoma e adha’na sa-bangsa laenna.

⁹ Lantaran sakabbinna lalakonna ba’na se ekabaji’i Sengko’, pandhudhu’na ba’na bi’ Sengko’ eokoma epaberra’a; Sengko’ ta’ tao ngokom e bakto se la kalebadan ban ta’ ngokoma pole e bakto se bakal dhateng se berra’na kantha sateya reya.

¹⁰ Oreng towa bakal ngakana ana’na dibi’ ban ana’ bakal ngakana oreng towana. Kantha jareya Sengko’ ngokoma reng-oreng jareya, ban se gi’ odhi’ bi’ Sengko’ epabalessadana ka man-dhimman.

¹¹ Sengko’ Allah se odhi’, GUSTE Allah Se Mahatenggi, ban reya Tang oca’: Lantaran ba’na la macemmer Tang Padalemman bi’ sakabbinna lalakonna ba’na se jahat ban majitjit, bi’ Sengko’ ba’na eokoma ta’ kalaban eberri’ana pangamponan.

¹² Sapartellonna pandhudhu’na ba’na bakal mateya polana wabah panyaket ban mosiba kalaparan se nyerrang kottha. Sapartellonna bakal ejagala bi’ peddhang e lowar kottha ban sapartellonna pole bi’ Sengko’ epabalessadana ka man-dhimman ban bi’ Sengko’ eserserra bi’ peddhang.

¹³ Ba’na bakal ngarassa’agiya saapa nako’e mon Sengko’ peggel ban ngamok sampe’ tobuk. Mon jareya kabbi la kalakon, ba’na bakal yakina ja’ Sengko’, PANGERAN, la acaca ka ba’na polana Sengko’ ce’ peggella lantaran ba’na ta’ esto.

¹⁴ Ba’na bakal daddiya jur-gujuran ban sa-bangsa e sakalenglengnga ba’na bakal co-ngocowa ba’na; saneyap oreng se lebat bakal ajauwana ba’na.

¹⁵ Mon Sengko’ ce’ peggella ka ba’na ban ngokom ba’na, sa-bangsa e sakalenglengnga ba’na bakal arassa’a marenges kabbi. Sa-bangsa jareya bakal co-ngocowa ba’na ban ngalennyer nangale’e ba’na.

¹⁶ Parsadhiya’anna kakananna ba’na bi’ Sengko’ epamosna’a ban pandhudhu’na bi’ Sengko’ epannengnga kalaparan. Reng-oreng jareya bakal ngalamana sake’na rassana oreng lapar, akantha pana se tajem se naccek ka ba’na sampe’ ba’na mate.

¹⁷ Salaenna mosiba kalaparan, Sengko’ madhatengnga keya wabah panyaket, kakejjemman ban perrang kaangguy mate’e pandhudhu’na ba’na, sarta run-burun alas se galak kaangguy mate’e ana’na reng-oreng jareya. Sengko’, PANGERAN, la ngoca’."

Yehezkiel

Video Yehezkiel 5

Ikuti Kami:

KONTAK | PARTISIPASI | DONASI