Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nina TUHAN si Erdolat, "Gerbang si arah kenjulu, dalan bengket ku kesain si arah bas arus tetap ipintu enem wari erdahin, tapi arus italangi tupung wari Sabat ras wari Raya Bulan si Mbaru.
2 Raja si erkuasa arus bengket i kesain si arah darat nari ku ruang si mbelin i bas gerbang e jenari tedis deherken binangun gerbang e. Sanga raja i je, imam-imam nutung persembahen tutungen, dingen mereken persembahen persadan si ibereken raja. I bas gerbang eme raja arus erjimpuh nembah man TUHAN, jenari mulihken ia ndarat. Gerbang e la banci ipintu ngayak ben.
3 Tep-tep wari Sabat ras tep-tep Wari Raya Bulan si Mbaru bangsa e pe kerina arus erjimpuh nembah man TUHAN i lebe-lebe gerbang e.
4 I bas wari Sabat raja arus mpersembahken man TUHAN enem anak biri-biri ras sada bajar biri-biri si la lit sitik pe man pandangen, jadi persembahen tutungen.
5 Rikut ras sada bajar biri-biri arus ka pe ipersembahkenna sepulu pitu setengah liter gandum, janah radu ras sada anak biri-biri arus ka pe ipersembahkenna rikutken ukurna meriah. Raduken tep-tep erbage persembahen buah gandum arus pe ipersembahkenna telu liter minak saitun.
6 Tupung Wari Raya Bulan Mbaru arus ipersembahken sada jenggi lembu, enem anak biri-biri, ras sada bajar biri-biri, sitik pe la lit man pandangen.
7 Rikut ras tep-tep jenggi lembu ras tiap bajar biri-biri arus pe ipersembahken sepulu pitu setengah liter gandum, janah sada anak biri-biri banci ipersembahken raja radu ras kai sura-sura pusuhna. Tep-tep persembahen buah gandum arus ipersembahken rikut ras telu liter minak saitun.
8 Tupung raja bengket ku Rumah Pertoton, arus ia bengket arah rumah mbelin janah mulihna pe arah e ka.
9 Tapi adi jelma si nterem bengket ku kesain Rumah Pertoton lako ngerayaken wari-wari raya si apai gia, maka kalak si bengket arah gerbang Utara, arus ndarat arah gerbang Selatan kenca dung ersembah. Janah kalak si bengket arah gerbang Selatan arus ndarat arah gerbang dalan bengket ndube, tapi arus arah gerbang si petala-tala ras e.
10 Raja arus bengket tupung jelma si nterem bengket, janah mulih tupung jelma si nterem mulih.
11 Tupung kerja man-man ras wari-wari Raya, persembahen buah gandum arus sepulu pitu setengah liter raduken sada jenggi lembu tah sada bajar biri-biri, janah radu ras sada anak biri-biri, banci kasa kai pe rikutken sura-sura kalak si ersembah. Rikut ras tep-tep persembahen buah gandum, arus ipersembahken telu liter minak saitun.
12 Adi raja si sangana erkuasa erbahan persembahen man TUHAN erkiteken pusuhna ersuruh, subuk persembahen tutungen tah pe persembahen persadan, maka gerbang si arah kenjulu dalan bengket ku kesain si arah bas arus italangi man bana. Persembahen si ibahanna arus bali ras persembahen si ibahanna tupung wari Sabat, janah gerbang e arus ipintu kenca ia mulih ndarat."
13 Nina TUHAN, "Tep-tep erpagi-pagi sada anak biri-biri umur sada tahun arus itutung jadi persembahen man TUHAN. Persembahen enda arus ibahan tep-tep wari.
14 Tambah si e arus ka pe ipersembahken dua kilo tepung tep-tep erpagi-pagi radu ras sada liter minak saitun si icampur ras tepung ndai. Enda me peraturen persembahen buah gandum man TUHAN si arus ipatuhi seh rasa lalap.
15 Anak biri-biri, tepung, ras minak saitun arus ipersembahken man TUHAN tep-tep erpagi-pagi seh rasa lalap."
16 TUHAN si Erdolat ngatakenca nina, "Adi raja si erkuasa mereken sada bagin tanehna man sekalak anakna si dilaki, taneh e nggo anak ndai empuna jadi sikerajangen keluargana.
17 Tapi adi raja mereken sada bagin tanehna man sekalak pegawaina taneh e arus ka mulih man raja adi Tahun Kemulihen nggo seh. Taneh e sikerajangenna kap, janah ia ras anak-anakna si dilaki ngenca banci jadi empuna seh rasa lalap.
18 Raja si erkuasa la banci muat taneh rayatna si apai pe. Taneh si iberekenna man anakna arus sada bagin i bas taneh si nggo iserapken man bana, gelah ula sada pe bangsangKu itindasna alu muat tanehna."
19 Kenca bage ibaba dilaki ndai aku arah pintun si lit i duru gerbang Selatan, ku kamar-kamar si badia si ngala kempak Utara. Kamar-kamar enda isikapken man imam-imam. I je ituduhken dilaki ndai man bangku sada ingan i ujung lorong si arah kenjahe.
20 Janah nina, "I jenda me imam-imam nanggerken daging persembahen pengalemi dosa ras persembahen ganti rugi, bage pe ingan nasakken tepung persembahen gelah kasa kai si badia ula lit ibaba ndarat ku kesain si arah darat, maka jelma si nterem ula kena cilaka."
21 Kenca bage ibabaina ka aku ku kesain si arah darat. Ituduhken man bangku maka i bas empatna sukina, lit ka kesain si terkitiken, gedangna duapuluh meter, belangna sepulu lima meter.
22 (Yeh 46:21)
23 Tep-tep kesain lit tembok sekelewetna, dingen lit ka pe dapurna i bas tembok e.
24 Nina dilaki e man bangku, "I jenda me kalak si erdahin i bas Rumah Pertoton e nanggerken persembahen-persembahen si ibereken jelma si nterem."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA