Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai sogop ma bangku tangan ni Jahowa; jadi iarahkon ma ahu hu darat marhitei Tonduyni, anjaha ipasoh ma ahu i tongah-tongah ni habungan ai, gok holi-holi ni jolma do ai.
2 Ipabontaskon ma ahu hunjai inggot, anjaha tonggor ma, buei tumang merap i habungan ai, anjaha tonggor ma, domma horah-horah ganupan ai.
3 Jadi nini ma dompak ahu, “Ale anak ni jolma, boi ope manggoluh holi-holi on? Jadi ningku ma mambalosi: Ale Tuhan Jahowa, Ham do na mambotoh ai!
4 Dob ai nini ma hu bangku, Manjahai ma ho pasal holi-holi on, hatahon ma bani sidea: Ale holi-holi na horah-horah, tangar ma hata ni Jahowa!
5 Sonon do hata ni Jahowa bani holi-holi on: Tonggor ma, Ahu mambere Tonduyhu hu bannima, ase manggoluh hanima.
6 Anjaha Ahu mannahkon urat-urat bannima ampa patubuh daging bannima ampa mambahen marhuling-kuling hanima ampa mambahen marhosah, ase manggoluh hanima; jadi tandaonnima ma, Ahu do Jahowa.
7 Jadi manjahai ma ahu songon na pinarentahkon ai bangku, anjaha sanggah na manjahai ai ahu, tonggor ma, masa ma sora na mardongos, gabe marsitohuan ma holi-holi samah holi-holi.
8 Jadi sanggah na mangkawah ahu, tonggor ma, domma dong urat-urat bani sidea, tubuh daging bani sidea, anjaha marhulingkuling sidea; tapi seng dong ope tonduy bani sidea.
9 Dob ai nini ma dompak ahu: Manjahai ma ho pasal tonduy ai, manjahai ma, ale anak ni jolma, anjaha hatahon ma bani tonduy ai: Sonon do hata ni Tuhan Jahowa: Roh ma ale tonduy humbani deisa na ompat in, manompul ma ho hubani halak na binunuh on, ase manggoluh sidea!
10 Anjaha manjahai ma ahu songon na pinarentahkon ai hu bangku, gabe roh ma tonduy ai hubagas sidea, jadi manggoluh ma sidea anjaha jongjong bei bani naheini; hulanan banggal tumang do ai.
11 Dob ai nini ma hu bangku, “Ale anak ni jolma, ia holi-holi on, ginompar ni Israel do in ganup. Tonggor ma, nini sidea: Domma masak holi-holinami, seng dong be pangarapannami, bois do hanami.
12 Halani ai manjahai ma ho, anjaha hatahon ma bani sidea: Sonon do hata ni Tuhan Jahowa: Tonggor ma, ungkabon-Ku do tanomannima, anjaha paluaron-Ku do hanima hum bagas tanomannima, ale bangsang-Ku; anjaha boanon-Ku do hanima mulak hu tanoh Israel.
13 Jadi tandaonnima ma, Ahu do Jahowa, anggo Huungkab ma tanomannima, anjaha Hupaluar hanima Humbagas tanomannima, ale bangsang-Ku.
14 Anjaha nahkonon-Ku do Tonduyhu hubagas dirinima, ase manggoluh hanima, anjaha bahenon-Ku do hanima marianan bani tanohnima; jadi tandaonnima ma, Ahu do Jahowa, na marsahap ai, anjaha pasaudon-Ku do ai, nini Tuhan Jahowa.
15 Dob ai roh ma hata ni Jahowa hu bangku, mangkatahon,
16 Ale anak ni jolma, buat ma bam sada tungkot, anjaha suratkon ijai: Juda ampa ginompar ni Israel na sapadan pakonsi. Dob ai buat ma tungkot na legan, anjaha suratkon ma ijai: Josep, tungkot ni Efraim ampa haganup ginompar ni Israel na sapadan pakonsi.
17 Padomu ma ai gabe sada tungkot, gabe sada ma ai ibagas tanganmu.
18 Jadi anggo adong hasomanmu sabangsa mangkatahon bam: Ai seng ra ham patugahkon bennami atap aha do tujuanmu marhitei in?
19 Jadi hatahon ma bani sidea: Sonon do hata ni Tuhan Jahowa: Tonggor ma, Hubuat do tungkot ni si Josep ampa marga ni Israel hasomanni sapadan ai, na ibagas tangan ni Efraim; anjaha Hupadomu ma hujai tungkot ni Juda, anjaha hubahen ma ai gabe sada tungkot, ase gabe sada ai ibagas tanganku.
20 Sanggah ijolom ho tungkot na dob sinuratan ai ididah sidea,
21 hatahon ma bani sidea: Sonon do hata ni Tuhan Jahowa: Tonggor ma, arahkonon-Ku do halak Israel hun tongah-tongah ni bangsa-bangsa hadasan ni sidea ai, anjaha patumpuon-Ku do sidea humbani ganup ianan; anjaha boanon-Ku do sidea mulak hu tanoh ni sidea.
22 Bahenon-Ku do sidea gabe sada bangsa i tanoh ai, bani dolog-dolog ni Israel; anjaha sada do raja manggomgom sidea ganup, seng be dua bangsa sidea, anjaha seng be marbagi gabe dua harajaon.
23 Seng be pabutakon ni sidea dirini marhitei gana-gana ni sidea, marhitei sisombah-sombahon ni sidea ai, atap marhitei ganup panlanggaron ni sidea; anjaha paluahon-Ku do sidea humbani ganup parbalikon ni sidea ai, na mambahen sidea mardousa; urason-Ku do sidea, gabe bangsang-Ku do sidea, anjaha Ahu gabe Naibata bani sidea.
24 Anjaha juakjuak-Ku si Daud do manggomgomi sidea, sada do hansa parmahan bani sidea haganup; marparlahou do sidea ibagas aturan-Ku, anjaha pongkut ma sidea manramotkon titah-Ku.
25 Iankonon ni sidea do tanoh na dob huberehon bani juakjuak-Ku si Jakob, bani tanoh na dob niiankon ni ompung ni sidea; ijai ma sidea marianan, anak ni sidea ampa pahompu ni sidea ronsi sadokah ni dokahni; anjaha juakjuak-Ku si Daud ma lalab panggomgom bani sidea.
26 Bahenon-Ku do bani sidea padan pardameian, padan sisadokah ni dokahni ma ai bani sidea; pasu-pasuon-Ku do sidea anjaha pabueion-Ku; anjaha pajongjongon-Ku do ianan-Ku na mapansing in i tongah-tongah ni sidea ronsi sadokah ni dokahni.
27 I tongah-tongah ni sidea do Ahu marianan; Ahu do gabe Naibata bani sidea anjaha sidea gabe bangsangku.
28 Jadi botohon ni bangsa-bangsa ma, Ahu do Jahowa, na papansingkon Israel, anggo i tongah-tongah ni sidea ma iananku na pansing in ronsi sadokah ni dokahni.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA