Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai roh ma hata ni Jahowa hu bangku, mangkatahon,
2 “Ale anak ni jolma, manjahai ma ho pasal parmahan ni Israel, manjahai anjaha hatahon ma bani sidea, hubani parmahan ai: Sonon do hata ni Tuhan Jahowa: Bursik ma parmahan ni Israel, na marmahan dirini sandiri! Ai lang biribiri do siparmahanon ni parmahan?
3 Taboh-tabohni ipangan hanima, wolni jadi pakeiannima, na mombur isayat hanima; tapi biribiri ai seng iparmahan hanima.
4 Na galek seng ipargogohi hanima, na boritan seng itambari hanima, na ugahan seng ibaluti hanima; na kahou seng iboan hanima mulak, anjaha na magou seng ipindahi hanima; koras anjaha bisang do panrajainima bani sidea.
5 Jadi mampar ma biribiringku, halani lang adong na marmahani; gabe sipanganon ma sidea bani sagala binatang panoroh.
6 Maor do biribiringkai i atas ni sagala dolog ampa bani sagala buntu-buntu na gijang; bani sab tanoh in do mambur merap biribiringku, tapi sahalak pe lang adong na sungkun-sungkun pasal ai atap na mangindahi ai.
7 Halani ai, ale parmahan, tangihon ma hata ni Jahowa!
8 Songon sintongni manggoluh Ahu, nini Tuhan Jahowa: Halani gabe sisorohon biribiring-Ku, anjaha gabe sipanganon bani sagala binatang panoroh biribiringkai, halani seng dong na marmahani, anjaha halani seng ipindahi parmahankai biribiring-Kai, tapi dirini sandiri do iparmahan, hape biribiring-Kai lang,
9 halani ai, ale parmahan, tangihon hanima ma hata ni Jahowa:
10 Sonon do hata ni Tuhan Jahowa: Tonggor ma, imbang-Ku do parmahan in, anjaha tungguon-Ku do biribiri in humbani sidea, anjaha parontihonon-Ku sidea humbani na marmahan biribiri in. Seng be parmahanon ni parmahan in dirini; paluahon-Ku ma biribiring-Ku humbani pamangan ni sidea, ase ulang ipangan sidea be in.
11 Ai sonon do hata ni Tuhan Jahowa: Tonggor ma, Ahu, Ahu sandiri sungkun-sungkun bani biribiring-Ku, anjaha pindahan-Ku do sidea.
12 Songon parmahan na mangindahi biribirini, anggo adong na kahou humbani hulananni ai, sonai do pindahan-Ku biribiring-Ku; paluahon-Ku do sidea humbani ganup ianan hamerapan ni sidea ai, sanggah bonog ari anjaha lotir.
13 Boanon-Ku do sidea mandarat humbani bangsa-bangsa, anjaha patumpuon-Ku do sidea hun nagori-nagori ai, anjaha paulakon-Ku do sidea hu tanoh ni sidea sandiri; parmahanon-Ku do sidea bani dolog-dolog ni Israel, bani habungan ampa bani haganup ianan, na tariankon i tanoh ai.
14 Bani sampalan na mombur do parmahanon-Ku sidea, anjaha dolog-dolog ni Israel na gijang ai do parmahanan bani sidea; ijai do sidea manggompang bani tanoh na dear panggagatan, anjaha manggagat do sidea bani sampalan na lambutan bani dolog-dolog ni Israel.
15 Ahu sandiri ma gabe siparmahan bani biribiring-Ku, anjaha Ahu mambahen marsaran sidea, nini Tuhan Jahowa.
16 Pindahan-Ku do na magou in, paulakon-Ku ma na kahou in, anjaha balutan-Ku na ugahan; na galek pargogohan-Ku, tapi na mombur anjaha na gogoh pardiateihonon-Ku; ibagas hasintongan do parmahanon-Ku sidea.
17 Tapi pasal hanima, ale biribiringku, sonon do hata ni Tuhan Jahowa: Ahu ma manguhum biribiri samah biribiri, biribiri tunggal ampa hambing tunggal.
18 Ai lang sungkup bannima manggagat bani sompalan na mombur in, ai dogei-dogeionnima ope teba-teba ni sampalan in? Ai lang sungkup ope minum hanima humbani bah na lihou in, sihol luntakonnima ope in?
19 Ai mintor na nidogei-dogeinima in ma panganon ni biribiring-Ku, anjaha tor ni luntak-luntaknima in ma inumonni?
20 Halani ai, sonon do hata ni Tuhan Jahowa hubani sidea: Tonggor ma, Ahu sandiri ma na manguhum biribiri na mombur ampa na merung.
21 Halani ionjar-onjar hanima marhitei badan ampa abaranima, anjaha na galek ai idugui hanima marhitei tanduknima, ronsi na mambur merap sidea,
22 halani ai urupan-Ku ma biribiring-Kin, seng be sisorohon sidea; Ahu ma na manguhum biribiri samah biribiri.
23 Pabangkiton-Ku ma sada parmahan bani sidea, ai ma juakjuak-Ku si Daud, anjaha parmahanonni ma sidea. Ia ma na marmahan sidea, anjaha ia gabe parmahan bani sidea.
24 Ahu, Jahowa ma gabe Naibata bani sidea, anjaha juakjuak-Ku si Daud gabe panrajai i tongah-tongah ni sidea; Ahu, Jahowa do na manluarhon ai.
25 Bahenon-Ku ma bani sidea padan pardameian, anjaha usiron-Ku ma binatang panoroh hun tanoh ai, gabe boi sonang marianan sidea i halimisan atap modom i harangan.
26 Bahenon-Ku ma sidea ampa haganup na inggot bani dolog-Ku gabe pasu-pasu; parohon-Ku do udan bani musimni, gabe udan pasu-pasu ma ai.
27 Hayu na i talun mambere buahni, anjaha tanoh ai ibere do gogohni, anjaha sonang do sidea i tanoh ni sidea sandiri; jadi tandaon ni sidea ma, Ahu do Jahowa, anggo Huponggolhon pasangan ni sidea ai, anjaha Hupaluah sidea humbagas tangan ni halak na marjabolonkon sidea.
28 Seng be gabe taban-taban sidea bani bangsa-bangsa, anjaha binatang-binatang na i nagori in seng be atahonni sidea, tapi sonang ma sidea marianan, seng dong be na mangkirjati.
29 Pasirsiron-Ku ma bani sidea sada pohon na madear, gabe seng be magou sidea hun nagori in halani gayuran, anjaha seng be taronon ni sidea apas-apas ni bangsa-bangsa.
30 Jadi botohon ni sidea ma, Ahu do Jahowa, Naibata ni sidea, na mangkasomani sidea, anjaha sidea ginompar ni Israel, bangsang-Ku do sidea, nini Tuhan Jahowa.
31 Tongon, hanima do biribiring-Ku, biribiri bani sampalan-Ku; Ahu do Naibatanima, nini Tuhan Jahowa.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA