Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai roh ma use hata ni Jahowa hu bangku, mangkatahon,
2 “Ale anak ni jolma, marhutinta anjaha marumpama ma ho bani halak Israel,
3 hatahon ma, sonon do hata ni Tuhan Jahowa, ʻAdong ma sada manuk-manuk nanggordaha na banggal bolag habongni, ganjang-ganjang lai-laini, anjaha buei do ambuluni na marrintik-rintik; roh do ia hu Libanon, anjaha ibuat do ujung ni hayu ares ai,
4 iputiki do dangkah-dangkahni siatasan, iboan ma ai hu nagori partiga-tigaan, anjaha inahkon ma ai hu huta ni partiga-tiga.
5 Ibuat do homa bonih na i nagori ai, anjaha isuan ma ai bani tanoh na lambutan, na sungkupan bani bah; isuankon do ai i topi ni bah.
6 Jadi martumbor ma ai gabe hayu anggur na tabun, toruh pardangkahni, surdung do rantingni hu bani, anjaha tading i toruhni do uratni. Gabe hayu anggur ma ai, mardangkahi anjaha marrantingi.
7 Tapi adong ma manuk-manuk nanggordaha na legan anjaha na banggal, bolag habongni anjaha buei ambuluni; anjaha tonggor ma, iegotkon hayu anggur ai ma uratni bani manuk-manuk ai, anjaha surdung ma ranting-rantingni ai hu bani, ase ia ma mangarbahisi, lobih dearan nini uhurni humbani na bani iananni ai;
8 hape bani tanoh na lambutan, na sungkupan bah do ia na isuan ai, ase boi mardangkahi ia, ramos marbuahi anjaha gabe hayu anggur na madear namin.ʼ
9 Hatahon ma, sonon do hata ni Tuhan Jahowa, ʻAi boi do saud ai? Ai lang hona dokdok ma uratni, anjaha hona parseda bulungni gabe melus bulungni na martumbor ai. Gabe melus ma ia tongon, anjaha seng pala marhitei kuasa na gogoh atap buei halak hona dokdok ma ia rap pakon uratni.
10 Tonggor ma, dear do ia hona suan, tapi boi do jadi ai? Ai lang mintor melus tumang ma ai, anggo hona ombus ibahen logou na hun hapoltakan, melus bani ianan hatubuhanni ai?ʼ”
11 Dob ai roh ma hata ni Jahowa hu bangku, mangkatahon,
12 “Hatahon ma bani bangsa sipanlawan ai, ʻSeng ibotoh hanima, aha do arti ni ai?ʼ Hatahon ma, ʻTonggor ma, roh do raja ni Babel hu Jerusalem, anjaha itangkapi do rajani ampa kopala-kopalani, anjaha iboan ma sidea hu Babel.
13 Anjaha ipabangkit do sada humbani ginompar ni raja ai, marpadan do ia pakonsi anjaha ipabija do ia; tapi na sangap-sangap ni tanoh ai iboan do,
14 ase mangunduk harajaon ai ulang manlawan, ase ijolom padanni gabe jonam ia.
15 Tapi marbalik do ia hun bani, marhitei na marsuruh suruhanni hu Masir, ase ibere hubani huda pakon buei bala. Ai tarpasaudsi do ai? Ai maluah do halak na mambahen sisonai? Siosei padan, boi do maluah?
16 Songon sintongni manggoluh Ahu,ʼ nini Tuhan Jahowa, ʻTongon, bani ianan ni raja ai, na pabangkitkonsi gabe raja, na pabijahonsi, tapi iapasi, na mambere padan bani, tapi iosei, i tongah-tongah ni Babel do ia matei.
17 Anjaha seng tarurupi Parao ia marhitei buei balani ampa bahat jolma sanggah porang ai, ai ma bani panorang ipadear halak hubuan ampa tembok pangkubu laho manraseihon buei jolma.
18 Hubani na hampung uhurni bani bijani, anjaha iosei padan ai, halani na dob marjabat tangan ia, tapi idalankon do ganupan ai, seng anjai maluah ia.ʼ
19 Halani ai sonon do hata ni Tuhan Jahowa, ʻSongon sintongni manggoluh Ahu, bija na niapasanni ampa padan-Ku na nioseini ai, maningon mangonai do ai bahenon-Ku bani uluni.
20 Rungkubon-Ku ma puhot-Ku hu atasni anjaha dapot siding-Ku do ia, jadi Huboan ma ia hu Babel anjaha uhumon-Ku ma ia ijai, halani na mangosei ai ia dompak Ahu.
21 Anjaha ganup tentara pilihanni maningon rasei do bahenon ni podang, anjaha na tading ai erapon do bani ganup deisa, ase ibotoh hanima, Ahu do Jahowa, na marsahap ai.ʼ
22 Sonon do hata ni Tuhan Jahowa, ʻAhu sandiri ma na mambuat sada ranting humbani ujung ni hayu ares na gijang ai, anjaha Husuan ma ai; anjaha putikkonon-Ku do sada tumbor humbani dangkahni pardatas ai, anjaha suanon-Ku ma ai bani sada dolog na gijang anjaha na banggal.
23 Bani dolog ni Israel na gijang ai do suanon-Ku ai, ase mardangkah janah marbuah, gabe sada hayu ares na marmulia; marianan do i toruh ni binatang-binatang anjaha ibagas linggom ni dangkahni marasar do bagei-bagei ni manuk-manuk.
24 Jadi botohon ni sagala hayu na i talun ma, paboa Ahu do Jahowa, na patoruhkon hayu na gijang anjaha na pagijangkon hayu na toruh. Ahu do na mambahen melus hayu na ratah, anjaha na mambahen martunasi hayu na melus. Ahu do Jahowa na manluarhon ai, anjaha Ahu do na pasaudkonsi.ʼ”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA