¹ Angkam te-ala beya wenya emsae gubiridaꞌan: Asa sane lak. Em kareksa esa mamkam Bian onakon hla kul, zep gosa em herhen naban tan.
² Eno mae mo kire-kire beyana in man ebatreꞌan, hen eno mae mo pakean dawem-dawemna in winim blom dabiꞌin.
³ Eno mae mo emas nakore hen perak nakore kire-kire beyana in zalta dep sa elwal. Hwena kire-kire beyana in zen sa emsa Alap mo nwenak anakan dam dasik gwibir, “Zini an aingkil tamna.” Zen zep sa hwena Alap aumwa hap denak syauk blanak emsa yal gul sera. Sap em mese Yesus mo lwa halzan golek denak kire-kirena ere mae en hap tagal la guk gwek.
⁴ Men zen eno mae mo nganak syal ta gwek, zeno mae mo te-alana ene olgwen gweblak. Zep em engalap gwen. Sap zeno mae mo esomo gwe-gwen ola mes hendep angkam Soson Zini Bian Alap hon hatal.
⁵ Zep em engalap gwen. Sap auhu-kamanak awe em mese tahalha sremkam lowehe gwek, hen ena en nakae oto lasik gwibik. Hen em mese sapi mo kim ena en naka laizi gwibik, hendep mese ehanapna gwek. Angkam hwena emsa de blom tabin hip de yaklanak mes golek de gwer!
⁶ Sap em mese karek gol gwen srem zini karek la gwibik hen lamera gwek, hwena zen man tol dekam egu gwek, “Dikire nesa karek da gwibik.” Zep emki engalap gwen.
⁷ Zen in zep aya-wal oso-wal, sap esa angkam karekna oltowe gwer, hwena dekon emki enlala tatete naban Bian Yesussu kara gwe-gweblan. Emki sap eenlala gwen: Nga syal gwe-gweblan zini, zen holokam taran hap de yaklana kara ne gweblanan.
⁸ Zep em hen kirekam em enlala tatete naban ekara gwe-gwen, sap Bian Yesus mo lwa halzan hap denak angkam man tangan golek de gweꞌan.
⁹ Aya-wal oso-wal, bahem enaka jakal gwibirida gwen. Ki em esa hen kareksa Alap onakon hla kul. Sap zi mo kareksa de klis gun hup de Zini in angkam lilikinnik zauꞌura!
¹⁰ Aya-wal oso-wal, emki sap enlala gwibiridan– zini men zen orep Alap mo ola ayang nulzimnira gwekke. Dekam desa man karek da gwibik, sap ahakon man Alap mo ola insa husus nei gwibik. Hwena man ki sap kirekam neibirida gwek, zen dekam hwena dawemkam Biansa de blol gwe-gweblan naban tatetekam nyauk gwibik. Zep em hen zeno mae mo kim em lowehe gwen.
¹¹ Sap zen kirekam tatetekam nyauk gwibik, nen in zebe angkam desa enbirida gweꞌan, “Zen heꞌho gwibinnik lowehe gweꞌan.” Em mese ki hen Ayub hup de aisili esane gwe-gwek– in kim karek yala insa goltowekaye. Hen em mese etawa gwek: Bian aumwa hap zebe hap dawemna mamkam golblaka, sap zen man dawemkam Biansa de blol gweblan naban tatem zauku. Bian Zen eiwa serkam de kwasang-kwasangna. Zen zep em hen Ayub mo kim em egwe gwen.
¹² Aya-wal oso-wal, ola an bol-zaun tanganna: Bian Alap mo bosesa de gollewen hap bahem ere mo olsa de soson gun hup anakan mae egu-guk gwen, “Ngli naban kama naban asa hla la.” Auhu-kamana awe de aha banakare tol maesa de gubin niban hen bahem egu-guk gwen, “Zen mese ki asa hla tanda.” Ki Alap sa hwena emsa husus gwibiridala. Diki soson gun sremkam em anakare enkam egu gwen, “Ëe kie,” ahaksa “Home.”
¹³ Zi de ebon mae onakon anakan ngalap gwenna, “Ëe an banakan asa gwer?” – dikire Alapsa gu sonebla tine gwek. Isrip-sri naban de gwenna, zen dikire Alapsa terya ban isrip-sri gwebla tine gwek.
¹⁴ Sang-sang naban de gwenna, zen dikire Kristen zi mo nol-nolaka gu sonebiridak– zen deka Bian Yesus mo bosekam zebe hap Alapsa abe dak. Hen zen sa minyakkam Yesus mo bosekam dra dal.
¹⁵ Hen zen kim Alapsa de taibliblan naban abe daꞌak, Bian dekam sa zi sang-sangna insa dawem tala. Zen de kareknak de zaran nakon sang-sangna insa hlaunnu, Bian dekam sa zeno karek-karekna insa tap gulsublula.
¹⁶ Ëe in zebe emsa titi tabiꞌin: Ere mae mo karek-karekna emki Kristen bose wal obon ekira-kla gwe-gwen, hen Alapsa de abe tankam enaka mas eibirida gwek– ekakim sang-sang nakon esale gwe-gwek. Sap zi de Alap mo nwenak dam-dam enkam gwenna, zeno ol gu sonenna soson tanganna. Alap man kire zi mo ol gu sonenna dokwak gul gwenda.
¹⁷ Elia neban mae apdenak– zi tangan. Hwena zen kim o de il tin srem hap enlala zon tasiblin naban Alapsa abe taka, hendep kirekam zep lwak. Ona dekam hendep il ti srem gwe-gweka– tahunna dan-ahan, ahana ngirin ngam sonnak mes zauk.
¹⁸ Etan kim abe taka, dekam zep etan il tika. Kamanak de otanena dekam zep etan esaltilidak.
¹⁹ Aya-wal oso-wal, emki eenlala gwen: Ebon mae onakon de ahanik ora dam-dam nakon syal heꞌanam, hwena ahanik de desa etan dam tasik soneꞌanam,
²⁰ zen dekam zeno angna mes tin hip de ora nakon tagal tasiblinda. Zi de kirekam kareksa de gol gwen zisi dam tasinni, hwena Alap dekam sa zeno nik mo karek-karekna beyakam jek-jak gulzimdi. Zewe en zausunun. Dawem kitak! Yakobus onakon.