Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kale’bakkanna ammotere’ maki’ mange ri parang lompoa ammalo ri oloang mangea ri biring Tamparang Akaba, situru’ Naparentakanga Batara. Salloki’ alla’bang mange-mange ri daera monconna Edom.
2 Nampa Napaumi Batara mae ri nakke
3 angkanaya sallo maki’ alla’bang ri anjo daeraya. Jari musti a’lampa maki’ wara’.
4 Nampa Nasuroa’ Batara ampauangko anne pangngunju’ kammaya, ‘Tenamo nanusallo na nupantamakkimo pa’rasangang Edom, daerana sikamma sari’battannu, jari-jarina Esau. Lamallaki ke’nanga mae ri kau,
5 mingka teako bunduki ke’nanga, nasaba’ tena manna sike’de’ battu ri buttana ke’nanga laKupassareang mae ri kau, nasaba’ anjo daera Edom le’ba’mi Kupassareang mae ri jari-jarina Esau.
6 Akkulleko ammalli kanre-kanreang yareka inungang battu ri ke’nanga.’
7 U’rangi antekamma bateNa Karaeng Allata’alanu le’ba’ ambarakkakiko lalang sikontu apa nugaukanga. Naparakaiko siapa sallonu lalang ri pa’la’bakkannu a’jappa ri anne parang lompoa. Nala’langngiko lalang anne patampulo taunga siagang Nasareko sikontu apa nuparalluanga.
8 Nampa a’jappa tulusukki’, nibokoi oloang mangea ri kota-kota Elat siagang Ezion-Geber mange ri Tamparang Matea, nampa a’lekko anrai’ mange ri Parang Lompona Moab.
9 Nakana Batara mae ri nakke, ‘Anjo tu Moab, jari-jarina Lot, takkulleai nuganggu. Teako bunduki ke’nanga. Pa’rasangang Ar le’ba’mi Kupassareang mae ri ke’nanga. Na manna sike’de’ battu ri buttana ke’nanga tena nalaKupassareang mae ri kau.’"
10 (Anjo Ar riolo tu Emim ampammantangngi. Lompoipakkaleanna ke’nanga, sangkammai tu Enak, kamma tongi ke’nanga bansa rassasa.
11 Sangkamma tu Enak, anjo ke’nanga nikana tongi tu Refaim; mingka niarengi ke’nanga ri tu Moab: Tu Emim.
12 Riolo tu Hori ammantang ri Edom, mingka nibongkai siagang niputtai ri jari-jarina Esau, nampa napammantangngi buttana ke’nanga; kamma tomminjo sallang tu Israel, lanabongkai musu-musunna ke’nanga battu ri butta Napassareanga Batara mae ri ke’nanga.)
13 "Nampa a’limbangki’ ri Binanga Zered situru’ parentaNa Batara mae ri katte.
14 Anjo kajariangi ri wattunna tallumpulo assagantuju taung le’ba’namo nibokoi Kades-Barnea. Sikontu tantaraya ri anjo silapisika turungang mate ngasemmi sangkamma Nakananga Batara.
15 Tulusu’ nibalianna ke’nanga ri Batara, sa’genna putta ngaseng ke’nanga kale’bakkanna.
16 Matena ngasemmo ke’nanga,
17 Nakanamo Batara ri nakke,
18 ‘Anne alloa daera Moab nuolo, ammalo ri pa’rasangang Ar.
19 Jari battuko mange ri ampi’na buttana tu Amon, jari-jarina Lot. Teako ganggui yareka teako bunduki ke’nanga, nasaba’ tena manna sike’de’ battu ri anjo butta le’baka Kupassareang mae ri ke’nanga, laKupassareang mae ri kau.’"
20 (Anjo daeraya a’la’bang tongi niasseng nikana pa’rasangangRefaim, iamintu arenna bansa le’baka ammantang riolo anjoreng; niarengi ke’nanga ri tu Amon; tu Zamzumim.
21 Sangkamma tu Enak anjo ke’nanga lompo tongi pakkaleanna. Teai sipato’ kassa’na ke’nanga, siagang teai sipato’ jaina. Mingka niancuruki ke’nanga ri Batara, sa’genna nialle ri tu Amon anjo buttaya, nampa ammantang ke’nanga anjoreng.
22 Kamma tomminjo Nagaukanga Batara untu’ tu Edom, jari-jarina Esau, niaka ammantang ri daera monconna Edom. Naancuru’mi Batara anjo tu Hori, sa’genna naalle tu Edom anjo buttaya nampa napammantangngi siagang ammantang tuli sa’genna kamma-kamma anne.
23 Butta niaka ri siapa are la’buna ri biring Tamparang Tangngaya nipammantangngi ri tu battua ri pulo Kreta. Le’baki ke’nanga naancuru’ tu Awi, iamintu pandudu’ uru-uruna anjo pa’rasanganga, nampa napammantangngi ke’nanga anjo daeraya sa’genna mae ri kota Gaza ri patimboro’na.)
24 "Le’ba’namo nilaloi daera Moab, Nakanamo Batara ri nakke, ‘Kamma-kamma anne a’lampa mako allimbangi Binanga Arnon. LaKupassareangi mae ri kau Karaeng Sihon, iamintu karaeng Amori ammarentaya ri Hesybon, kammayatompa sikontu pa’rasanganna. Bunduki anjo karaenga, nampa nupammantangngi buttana.
25 Appakkaramula anne alloa laKupa’jariko tunikamallakkang ri bansa-bansaya ri kere-keremae. Sikamma taua lannekkereki napakamma malla’ punna nalangngereki kabara’nu.’"
26 "Nampa akkiringa’ siapa are tau battu ri parang lompo Kedemot mange ri Karaeng Sihon battu ri Hesybon untu’ ampabattui usulang passiamakkang kammaya anne:
27 ‘Kisarei ising ikambe ammalo ri pa’rasanganna karaengku. La’jappa tulusu’ji ikambe siagang tenaja nalammengka ikambe battu ri agang lompoa.
28 Lanabayara’ji ikambe kanre nakanrea siagang je’ne’ inung nainunga ikambe. Poro parallunaji bawang ammolongang ikambe anrinni ri pa’rasanganga,
29 sa’genna ammolongang ikambe ri Binanga Yordan untu’ antama’ ri pa’rasangang Napassareanga Karaeng Allata’alana ikambe mae ri kambe. Jari-jarina Esau iamintu ammantanga ri Edom siagang tu Moab ammantanga ri Ar, le’ba’mi nasare ising ikambe ammalo ri daerana ke’nanga.’
30 Mingka tena napa’biangki’ Karaeng Sihon ammalo ri anjo pa’rasanganna. Nipa’jari kapala batumi ri Karaeng Allata’alanu siagang nakellai duduki’ ambetai anjo Karaeng Sihon. Sa’genna kamma-kamma anne nipammantangngi iji daerana.
31 Nampa Nakana Batara ri nakke, ‘Anjo Karaeng Sihon siagang pa’rasanganna Kupassareangi mae ri kau; allemi siagang pammantangngimi anjo pa’rasanganga.’
32 Nabattumo Sihon siagang sikontu pasukanna untu’ ambundukiki’ ri ampi’na kota Yahas.
33 Mingka nipassareammi anjo karaenga mae ri katte ri Karaeng Allata’alata, sa’genna nibetamo siagang ana’-ana’na kammayatompa sikontu tantarana.
34 Anjo memang wattua niallemi siagang niancuru’mi sikamma kotaya kammayatompa nibunomi sikontu pandudu’na, bura’ne, baine siagang ana’-ana’. Tena niboli’ attallasa’.
35 Olo’-olo’na ke’nanga niallei siagang nirampasaki kota-kotana.
36 Lanri pannulunNa Karaeng Allata’alata, akkullei nialle ngaseng sikontu kotaya, appakkaramula battu ri Aroër, ri cappa’ Ka’bung Arnon, siagang kota niaka ri tangngana anjo ka’bunga, sa’genna mange ri daera Gilead. Tena kota majarre’ dudu tembo’ pattahanganna nidallekang.
37 Mingka tena nireppesi daerana tu Amon yareka biring Binanga Yabok yareka kota-kota niaka ri daera monconga yareka tampa’ maraengannaya, Napappisangkanga Karaeng Allata’alata."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA