Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dhi-budhina padha abali ka ra-ara beddhi lebat jalan se ka Tellok Akaba, akantha se edhabuwagi PANGERAN. Abit ba’na se ajalan e dhaera pagunongan Edom jareya.

² PANGERAN laju adhabu ka sengko’

³ ja’ la cokop sengko’ ban ba’na alalana e dhaera jareya. Daddi sengko’ ban ba’na kodu ajalan ka dhaja.

⁴ Saellana jareya sengko’ bi’ Pangeran epakon aberri’ du-petodu reya ka ba’na, ‘Ta’ abit pole bakal maso’a ka nagara Edom, dhaerana la-balana ba’na, iya areya toronanna Esau. Reng-oreng jareya bakal tako’a ka ba’na,

⁵ tape ba’na ta’ olle nyerrang, sabab tanana reng-oreng jareya tadha’ se ebagiya ka ba’na maske sakone’a, sabab dhaera Edom bi’ Sengko’ la ebagi ka toronanna Esau.

⁶ Ba’na olle melle kakanan ban nom-enoman dhari reng-oreng jareya.’

⁷ Kaenga’e, ra, baramma PANGERAN se la aberkadi ba’na e dhalem sabarang se elakone ba’na. Ba’na ejaga ban epasalamet saabidda ajalan e ra-ara beddhi se lebar reya. Saabidda pa’ polo taon reya ba’na ejaga ban epasalamet sarta eparenge sabarang se ekabuto.

⁸ Saellana jareya ba’na ajalan terros, dhari jalan se lebat e tha-kottha Elat ban Ezion-Geber ka Tase’ Mate, laju abiluk ka temor lao’ ka ra-ara beddhi Mo’ab.

⁹ PANGERAN adhabu ka sengko’, ‘Oreng Mo’ab, toronanna Lot rowa, ja’ ca-anca. Bariya keya ja’ serrang. Nagara Ar bi’ Sengko’ la ebagi ka bangsa jareya, ban dhari tanana reng-oreng jareya bi’ Sengko’ tadha’ se ebagiya ka ba’na maske sakone’a.’"

¹⁰ (Lamba’ Ar reya ekennengnge oreng Emim. Badanna ja-raja,padha ban oreng Enak, padha bangsana buta.

¹¹ Akantha oreng Enak, oreng Emim jareya enyamae keya oreng Refa’im, tape bi’ oreng Mo’ab enyamae oreng Emim.

¹² Lamba’ oreng Hori neng e Edom, tape eojuk sarta epatompes bi’ toronanna Esau, se saellana jareya ngennengnge tanana jareya; bariya keya bangsa Isra’il e budhi are ngojuk so-mosona dhari tana paparengnga PANGERAN jareya.)

¹³ "Saellana jareya ba’na entas Songay Zered menorot se edhabuwagi PANGERAN ka sengko’ ban ba’na.

¹⁴ Se entas Songay Zered jareya teppa’ tello polo ballu’ taon saellana mangkat dhari Kades-Barnea. Tantara dhari angkadan jareya la padha mate kabbi akantha se la edhabuwagi PANGERAN.

¹⁵ Bi’ PANGERAN reng-oreng dhari angkadan jareya terros ekamoso sampe’ dhi-budhina kabbi padha epatompes.

¹⁶ Saellana reng-oreng jareya padha mate kabbi,

¹⁷ PANGERAN adhabu ka ba’na,

¹⁸ ‘Are teya ba’na lebada e dhaera Mo’ab, lebat dhari nagara Ar.

¹⁹ Daddi ba’na bakal napa’a ka seddi’anna tanana oreng Amon, toronanna Lot. Reng-oreng jareya ja’ ca-anca ban ja’ perrange, sabab tana se bi’ Sengko’ la ebagi ka bangsa jareya tadha’ se ebagiya ka ba’na maske sakone’a.’"

²⁰ (Bannya’ oreng tao, dhaera jareya nagarana oreng Refa’im,Refa’im reya nyamana bangsa se lamba’ neng e jadhiya; bi’ oreng Amon reng-oreng jareya enyamae oreng Zamzumim.

²¹ Bangsa jareya padha ban oreng Enak, badanna raja ban kowat; orengnga talebat bannya’na. Tape bi’ PANGERAN epatompes kabbi, daddi oreng Amon laju arebbu’ tanana sarta terros neng e jadhiya.

²² Bariya keya se elampa’agi PANGERAN ka oreng Edom, toronanna Esau, se ngennengnge dhaera pagunongan Edom. Oreng Hori bi’ PANGERAN epatompes, daddi oreng Edom arebbu’ tanana sarta pas neng e jadhiya sampe’ sateya.

²³ Tana e salanjangnga paseser Tase’ Tengnga ekobasae ban ekennengnge reng-oreng dhari polo Kareta. Reng-oreng jareya matompes oreng Awi, iya areya oreng se asli e tana jareya, pas ngobasane sarta ngennengnge dhaera jareya sampe’ ka lao’ ka kottha Gaza.)

²⁴ "Saellana lebat dhari Mo’ab, PANGERAN adhabu ka ba’na, ‘Kassa’ sateya ba’na entas Songay Arnon. Sihon, rato Amori se marenta e Hesybon, ban nagarana bi’ Sengko’ ebagiya ka ba’na. Kassa’ serrang, nagarana kobasae.

²⁵ Molae dhari sateya sa-bangsa e dhimma’a bai bi’ Sengko’ epatako’a ka ba’na. Sapa’a bai bakal ngetterra katako’an mon ngedhing nyamana ba’na.’"

²⁶ "Saellana jareya sengko’ ngotos reng-oreng dhari ra-ara beddhi Kedemot ka Sihon, rato Hesybon, esoro manapa’ usul ngajak akanca; sengko’ apessen kantha reya:

²⁷ ‘Abdidalem nyo’ona edi bangsa Isra’il ngamponga lebat e nagaraepon junandalem. Bangsa dalem ajalana terros, ta’ nyempanga dhari lorong raja.

²⁸ Teddha’an se eteddha sareng aeng se eenom bangsa abdidalem, ebajarana. Se ekaparlo bangsa abdidalem namong ngamponga lebat e nagara ka’dhinto,

²⁹ kantos entas Songay Yordan maso’a ka nagara se eparengngagi GUSTE Allah, Pangeran, ka bangsa abdidalem. Toronanna Esau se badha e Edom sareng oreng Mo’ab se badha e Ar jugan ampon ngedine bangsa abdidalem lebat e nagarana.’

³⁰ Tape bi’ Rato Sihon ba’na ta’ ebagi lebat e nagarana jareya. Rato jareya bi’ GUSTE Allahna ba’na epacengkal sarta epanekat sopaja ba’na bisa’a makala rato jareya ban ngobasane baba kakobasa’anna, se sampe’ sateya reya ekennengnge sengko’ ban ba’na.

³¹ Saellana jareya PANGERAN adhabu ka sengko’, ‘Rato Sihon ban nagarana bi’ Sengko’ la ebagi ka ba’na; kala’ ban kennengnge nagara jareya.’

³² Sihon pas dhateng abareng ban sakabbinna pasukanna merrangana ba’na e seddi’na kottha Yahas.

³³ Tape GUSTE Allahna ba’na marengngagi rato jareya ka ba’na, daddi rato jareya ban na’-ana’na sarta tantarana epakala kabbi bi’ ba’na.

³⁴ E bakto jareya keya ba’na arebbu’ ban maancor saneyap kotthana ban mate’e saneyap oreng se badha e tha-kottha jareya, lalake’an, babine’an ban na’-kana’. Kabbi epate’e epatadha’ karena.

³⁵ Ebin bi’ ba’na ekala’, ban tha-kotthana erampas.

³⁶ Kalaban partolonganna GUSTE Allah, sengko’ ban ba’na bisa arebbu’ sakabbinna kottha jareya, molae dhari Aroër e konco’na Cora Arnon, ban kottha se badha e cora jareya, sampe’ ka Gileyad. Tadha’ kottha se ta’ ekennenga kobasae bi’ ba’na maske pagar alassa koko.

³⁷ Tape ba’na ta’ nyander ka seddi’anna baba kakobasa’anna oreng Amon otaba penggirra Songay Yabok otaba tha-kottha e bagiyan pagunongan otaba e kennengngan laenna se elarang bi’ GUSTE Allahna ba’na."

Ulangan

Video Ulangan 2:13

Ikuti Kami:

KONTAK | PARTISIPASI | DONASI