Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Kelengilah TUHAN Dibatandu. Ikutkenlah gelgel undang-UndangNa.
2 Ingetlah genduari kai si nggo ipelajarindu kerna TUHAN arah pengalamenndu ras Ia. Kam nge, labo anak-anakndu, si ngalamisa. Nggo iidahndu uga belinna kemulian TUHAN, uga GegehNa, ras MbisaNa,
3 bage pe tanda-tanda kuasa si IbahanNa. Nggo iidahndu kai si IbahanNa man raja Mesir ras negerina.
4 Nggo iidahndu uga pengkernepken TUHAN tentera Mesir ras kerina kuda bage pe geretana alu nggedapken kalak e i Lawit Merah, sanga ia ngayaki kam.
5 Nggo idahndu kai si ibahan TUHAN man bandu i gurun pasir ope denga kam seh i jenda.
6 Ingetndu kai si IbahanNa man Datan ras man Abiram anak Eliap suku Ruben. I lebe-lebe mata kerina kalak nganga taneh jenari itelenna ia, radu ras keluargana, kemahna, bage pe kerina suruh-suruhen ras asuh-asuhenna.
7 Tuhu, kam me si nggo ngidah kerina perkara-perkara si mbelin si nggo ibahan TUHAN."
8 "Ikutkenlah kerina undang-undang si nggo kubereken man bandu wari enda, gelah ngasup kam ngepari lau e, ngiani taneh si nandangi ibengketindu.
9 Janah cawir metua kam ibas negeri si mehumur ras melala asilna e, si ipadanken TUHAN maka IberekenNa man nini-ninindu ras man sinursurna.
10 Taneh si nandangi iinganindu e, la seri ras taneh Mesir inganndu nggeluh mbarenda. I Mesir adi atendu merdang, terpaksa kam latih erdahin pepaler lau ku juma e.
11 Tapi adi taneh si nandangi iinganindu e, eme taneh deleng-deleng ras berneh-berneh, taneh si usur kena udan.
12 TUHAN Dibatandu si pekena-kena taneh e ras njagaisa gedang-gedang tahun.
13 Dage ikutkenlah perentah si nggo kubereken man bandu wari enda; kelengi lah TUHAN Dibatandu janah dahiken lah DahinNa alu bulat ukurndu.
14 Adi ilakokenndu e, IpesusurNa udan ku tanehndu e rikutken perluna i bas paksa musim erbunga ras erbuah, gelah lit gandum, anggur ras minak saitun man gunandu,
15 bage pe dukut man gagaten asuh-asuhenndu. Datndu kerina pangan si apai pe atendu.
16 Jaga maka ula kam papak ibabai kalak i bas TUHAN nari lako nembah ras erdahin man dibata-dibata si deban.
17 Adi ilakokenndu e, nembeh TUHAN man bandu. IbanNa kelegon gelah kerah kal tanehndu, maka kai pe la turah. Emaka mate kam minter i je, aminna gia taneh si IberekenNa man bandu taneh si mehuli.
18 Inget lah perentah-perentah enda dingen ergaken lah. Iketkenlah e i bas tanndu, pakeken lah e i bas perdempakkenndu maka lalap ingetndu.
19 Ajarken man anak-anakndu. Cakapken lah kerna si e subuk sanga kam i rumah ntah i bas perdalanen, ntah sanga kam ngadi-ngadi, ntah sanga kam erdahin.
20 Suratken undang-undang e i bas binangun pintun rumahndu ras pintun gerbangndu.
21 Adi bage nggedang umurndu ras anak-anakndu i bas taneh si ipadanken TUHAN Dibatandu merekenca man nini-ninindu. Kam tetap nggeluh i je, kidekah lit denga langit i babo doni enda.
22 Ikutkenlah alu tutus undang-undang si nggo kubereken man bandu, eme: kelengi TUHAN Dibatandu, lakoken kerina perentah-PerentahNa, janah setialah man BaNa.
23 Adi bage IpelawesNa kerina bangsa-bangsa e adi kam mengketi daerah e. Iinganindu me taneh bangsa-bangsa si belinen ras gegehen asang kam.
24 Kasa taneh si idedehndu jadi sikerajangenndu. Daerahndu mulai i gurun pasir i Selatan nari seh ku deleng-deleng Libanon arah Utara. I Lau Eprat nari arah Timur seh ku Lawit Tengah arah Barat.
25 Amin ku japa pe kam lawes ibas negeri e, TUHAN Dibatandu si erbanca maka mbiar rayat negeri e man bandu, rikutken si IpadankenNa. Janah ise pe la ngasup ngalang-ngalangi kam.
26 I bas wari enda kupepilihken man bandu pasu-pasu tah sumpah.
27 Kam ipasu-pasu, adi iikutkenndu perentah-perentah TUHAN Dibatandu si kubereken man bandu wari enda,
28 tapi kam kena sumpah adi la iikutkenndu perentah-perentah e, tapi nilah kam guna nembah man dibata-dibata si deban si la pernah isembahndu gelgel nari.
29 Kenca itaruhken TUHAN kam ku negeri si nandangi iinganindu e, momokenlah pasu-pasu i datas Deleng Gerisim nari, tapi momokenlah sumpah i datas Deleng Ebal nari.
30 (Ingan deleng si dua e arah Barat Lau Jordan i bas daerah bangsa Kanaan si ringan i Baluren Jordan. Inganna kempak Barat, la ndauhsa i bas batang kayu More deherken kota Gilgal.)
31 Nandangi ikeparindu me Lau Jordan guna ngiani negeri si ibereken TUHAN Dibatandu man bandu. Adi nggo man bandu ras iinganindu negeri e,
32 jaga maka tetap kam ngikutken kerina undang-undang si kubereken man bandu wari enda."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA