Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 [Dilaki] Seh kal kam jilena, o impalku, seh kal jilena! Matandu nalsalken keleng ate i balik uis nipes si nutupi ayondu. Bukndu miap-miap desken rarasen asuh-asuhen, si sangana nusur i datas deleng-deleng Gileat nari.
2 Ipenndu mbentar desken biri-biri i bas permakanen, biri-biri si mbaru denga ipangkas janah iperidi. Beliganna kuh kerina, kerina ratur dingen sikap perturahna.
3 Biberndu megara desken pita megara, seh kal jilena tupung kam ngerana. Pipindu ersinalsal i balik tutup ayondu.
4 Kerahungndu desken menara Daud, kibul janah melinang. Bura si bali ras seribu ampang-ampang, gantung i je.
5 Tentenndu bali ras dua anak belkih, belkih si rindu nggagat i tengah bunga encole.
6 Mejehe aku ringan i deleng mur, i bas deleng kumenen, seh maka rembus angin erpagi-pagi, tupung kegelapen nggo lesap.
7 Oh, andiko, seh kal kam jilena, o impalku, andiko, mberu kal kam.
8 O kemberahenku, rehlah kam i das Deleng Libanon nari, rehlah kam i Libanon nari. Nusurlah i datas deleng Amana nari, i Deleng Senir ras Hermon nari, eme ingan arimo ras singa tading.
9 O kemberahenku, kekelengenku, penatap matandu ras bura si ipakendu, erbahanca maka tambat pusuhku.
10 Keleng atendu erbahanca debet-debet pusuhku, o kemberahenku, o impalku. Keleng atendu tebun asangken anggur, kam merim lebihen asangken kerina minak rempah-rempah.
11 Biberndu entebu desken tengguli, o impalku buah barangku, dilahndu desken susu campur tengguli kap kuakap, bau Libanon si merim leket i bas uisndu.
12 Impalku, kemberahenku peken si terbuni kap, peken si erbenteng, sumbul si ibide.
13 Mehumur sinuan-sinuanna, desken peken batang galiman, buah si mejilena kap ulihna. La kurang i je kacar, narwastu, kayu manis, tebu, kuning gersing, kumenen, mur ras rempah-rempah pilihen si melala erbagena.
14 (Kid 4:13)
15 Arah peken e maler lau i bas sumbul nari lau anak erburak-burak i das deleng Libanon nari.
16 [Diberu] O angin Selatan ras angin Utara, kekeken, rembuslah i bas pekenku maka teranggeh bauna si merim. Dilo min impalku ku bas pekenna jine, gelah inanamina buah si mejilena.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA