Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 A’lampai Boas mange ri tampa’ passibuntulanga ri pakke’bu’ lompona kotaya. Ammemponamo anjoreng, nia’mo allalo sitau bura’ne naassenga Boas angkanaya anjo taua bija ma’reppese’ sikalina Elimelekh. Nakio’mi Boas anjo taua angkana, "Sari’battang, mae sako ammempo anrinni." Battumi anjo taua, nampa ammempo.
2 Nampa nakio’mo Boas nia’ sampulo tutoa-toana masarakaka ri anjo kotaya untu’ angngagangi ammempo anjoreng. Ammemponamo ke’nanga,
3 nakanamo Boas mae ri anjo tau naaganga assibija, "Ammotere’mi Naomi battu ri Moab. Kamma-kamma anne eroki nabalukang tanana tu mate bura’nenna iamintu Elimelekh, bijanta.
4 Nakupikkiriki, musti nuassengi anne passalaka. Punna erokka’ amballi, paumi ri dallekanna anne tuniaka ammempo anrinni. Punna tena, paumi silambusu’na, nasaba’ ikatteji bawang sipa’rua koasa ri anjo tanaya; ikau rolong nampa inakke." Appialimi anjo taua angkana, "Iyo, lakuballi."
5 Nakanamo Boas, "Baji’mi punna kamma. Mingka punna nuballi anjo tanaya battu ri Naomi, musti nualle tongi Rut, anjo baine battua ri Moab, le’ba’ bainenna tumate ana’na Naomi. Nasaba’ anjo tanaya musti tuli a’jari pisakai mae ri turunganna anjo tau mateamo."
6 Appialimi anjo taua angkana, "Punna kamma, takukulleai. Kamma-kamma anne baji’mi nakulappassang anjo koasaku salaku tu rioloanganga akkulle amballi anjo tanaya. Tena matu-matunna kuballi anjo tanaya, nasaba’ attantui angkanaya anjo tanaya takkulleai a’jari pisaka mae ri turungangku. Bajikangngang ikattemo amballi."
7 Ri anjo jammanga punna a’balu’ taua yareka appassambe apa-apa, untu’ ampa’jari assai anjo passalaka, biasana taua nalappassangi sandala’na, nampa napassareang mae ri tau ammallia. Kammaminjo carana tu Israel ampa’jari assai se’reang pa’balukang siagang pammalliang tana.
8 Lanri kammana anjo, ri wattu nakanana anjo taua mae ri Boas angkana, "Ikattemo amballi," nalappassammi sandala’na nampa napassareang mae ri Boas.
9 Jari nakanamo Boas mae ri sikamma tutoa-toana masarakaka ri anjo kotaya, kammayatompa mae ri tau maraenganga ia niaka hadere’ anjoreng, "Anne alloa ikatte ngaseng a’jari sa’bi angkanaya le’ba’mi kuballi battu ri Naomi sikontu apa-apanna tumate Elimelekh siagang ana’-ana’na, iamintu Kilyon siagang Mahlon.
10 Na pantaranganna anjo pole, kualle tommi Rut, anjo baine battua ri Moab, anjo le’ba’ bainenna tumate Mahlon, a’jari bainengku. Lanri kammana, anjo tanaya tuli a’jari pisakana mae ri kaluargana anjo tumateamo. Siagang turunganna tuli lania’ tongi ri tangnga-tangngana bija-bijanna siagang kotana. U’rangi ngasengi sari’battang, anne alloa ikau ngaseng a’jari sa’bi."
11 Sikamma tutoa-toana masarakaka siagang tumaraengannaya ia hadereka anjoreng massing angkanami, "Iyo, ikambemi sa’bina. Tapporo nipa’jari anjo bainennu ri Batara sangkamma Rakhel siagang Lea, allassukanga jai ana’ untu’ Yakub. Tapporo kalumanynyangko ri tangnga-tangngana tau battua ri bijanna Efrata, siagang tapporo alla’bangko niasseng ri Betlehem.
12 Tapporo anjo ana’-ana’ laNapassareanga Batara mae ri kau tete ri anne baine loloa, lampa’jari kaluarganu sangkamma Peres, ana’ battua ri Yehuda siagang Tamar."
13 Jari naallemi Boas anjo Rut a’jari bainenna. Rut nibarakkakimi ri Batara sa’genna attianang, nampa allassukang sitau ana’ bura’ne.
14 Nakanamo sikamma bai’-bainea mae ri Naomi, "Nipujimi Batara! Iami assareko sitau cucu bura’ne anne alloa untu’ amparakaiko. Poro a’jari masahoro’ anjo anaka ri Israel!
15 Anjo mintunnu sanna nasayannu. Nasare mako apa la’biangngang na apa akkullea napassareang tujua ana’-ana’ bura’nenu. Kamma-kamma anne nasare mako pole sitau cucu bura’ne, lassareako sumanga’ beru, siagang amparakaiko ri wattu toanu."
16 Naallemi Naomi anjo anaka nampa naparakai siagang lompo pangngamaseang.
17 Sikamma bai’-baine siampi’-ampi’ balla’na ke’nanga assarei areng anjo anaka nikana Obed. Mae ri sikamma taua nakana ke’nanga, "Nia’mo ana’na Naomi sitau bura’ne!" Iaminne Obed sallang a’jari manggena Isai, nampa Isai iami manggena Daud.
18 Na iaminne garisi’ pattottoranna Daud, appakkaramula battu ri Peres, iamintu: Peres, Hezron, Ram, Aminadab, Nahason, Salmon, Boas, Obed, Isai, siagang Daud.
19 (4:18)
20 (4:18)
21 (4:18)
22 (4:18)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA