Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Na’omi andhi’ bala se anyama Bowas, iya areya balana se lake’ se anyama Elimelekh. Orengnga sogi ban ehormadi oreng.

² E settong are Errut ngoca’ ka Na’omi, "Bu, kaula nyo’ona edi entara ka teggal meleya gar-gaggarra gandum. Tantona badha oreng se poron aderrep kaula." Ca’na Na’omi, "Iya, na’, kassa’ la mangkat."

³ Daddi Errut entar ka gal-teggal, noro’ bunte’ reng-oreng se padha anye sambi mele gar-gaggarra gandum. Kabendherran Errut entar ka teggalla Bowas.

⁴ Ta’ saapa abidda dhari jareya Bowas dhateng dhari Betlehem ka teggal jareya pas nyapa ka reng-oreng se anye. "Moga-moga PANGERAN asarengngana ba’na kabbi!" oca’na. "Moga-moga PANGERAN aberkadana panjennengngan," saodda reng-oreng derrebban gella’.

⁵ Bowas atanya ka mandhurra, "Sapa babine’ rowa?"

⁶ Ca’na mandhur jareya, "Ka’dhissa’ oreng manca buru dhateng dhari nagara Mo’ab asareng Na’omi.

⁷ Gella’ nyo’on edi ka abdina noro’a bunte’ reng-oreng se anye meleya gar-gaggaranna gandum. Molae gi’ laggu ta’ ambu sakale se alako, samangken gi’ buru bu-ambu sambi ngaop."

⁸ Bowas ngoca’ ka Errut, "Mara edhingngagi. Ba’na ta’ osa mele gandum e teggalla oreng laen. Mele e dhinna’ bai abareng ban babine’an se ngala’ derrep ka sengko’ rowa.

⁹ Abassagi dha’ emma reng-oreng jareya se anyeya. Ba’na noro’, ja’ u-jau dhari babine’an jareya. Mon ba’na pelka’, enom aeng e nay-pennay se eesse’e lalake’an se ngala’ derrep e dhinna’ rowa. Sengko’ la marenta’agi ka lalake’an jareya ta’ olle la-nyala ka ba’na."

¹⁰ Errut asojud e adha’na Bowas, pas ngoca’, "Panjennengngan ce’ saena ka abdina. Abdina oreng manca, ta’ pantes narema kabecce’anna panjennengngan."

¹¹ Saodda Bowas, "Sengko’ la ngedhing kabecce’anna ba’na ka mattowa bine’na sajjegga lakena ba’na mate. Sengko’ tao ja’ ba’na adina’agi oreng towana ban nagarana dibi’ polana apolonga ban reng-oreng bangsa laen, mangkana ba’na gi’ ta’ kennal ka reng-oreng jareya.

¹² Moga-moga bi’ PANGERAN, Allahna Isra’il, ba’na eparengngana babales se sapantessa etarema ba’na, sabab ba’na la entar nyare pangaoban ka Salerana."

¹³ Ca’na Errut, "Panjennengngan ce’ saena ka abdina, sanare abdina ta’ padha sareng reng-oreng derrebbanna panjennengngan. Panjennengngan ce’ labana, daddi ate abdina talepor."

¹⁴ E baktona oreng ngakana, Bowas ngoca’ ka Errut, "Mara ngakan. Ngala’ rotina, pobuwi caossa." Daddi Errut ngakan abareng ban reng-oreng derrebban gella’. Bi’ Bowas Errut eberri’i gandum panggang, ban Errut ngakan sampe’ kennyang. Samarena ngakan, gi’ badha karena.

¹⁵ Samarena ngakan Errut mele gandum pole. Saellana Errut tadha’ e seddi’anna, Bowas ngoca’ ka reng-oreng se anye, "Mon babine’ rowa mele gar-gaggarra gandum se la egintel, dina, panneng. Ja’ patodhus ban ja’ gigiri. La’-mala’ dhari gandum se la etel-gintel jareya dabu’ sabagiyan, tha-kantha pagaggar, olle epele."

¹⁶ (2:15)

¹⁷ Daddi Errut terros mele gandum e teggal jareya sampe’ sar-asar. Saellana jareya gandumma egebba, epakare la’assa malolo, ollena makompol etemmo badha sapolo kilo.

¹⁸ Errut pas mole ka kottha, ngeba gandum ollena mele jareya pas epatao ka mattowa bine’na bannya’na ollena mele jareya. Lebbina kakanan se ta’ eabi’ e bakto ngakan ban reng-oreng se anye rowa, ebagi ka mattowana.

¹⁹ Ca’na Na’omi, "Olle dhimma ba’na? E teggalla sapa ba’na alako gella’? Moga-moga oreng se becce’ ka ba’na jareya eparengngana berkat bi’ Pangeran!" Errut abala ka Na’omi ja’ aba’na mele gandum jareya e teggalla oreng se anyama Bowas.

²⁰ "Na’, oreng jareya tang bala rapet," ca’na Na’omi. "Oreng jareya se kodu ngoros odhi’na sengko’ ban ba’na. Moga-moga PANGERAN aberkadi oreng jareya. PANGERAN pajat ros-terrosan neptebbi janjina ka oreng se gi’ odhi’ ban ka oreng se la mate."

²¹ Errut pas ngoca’ pole, "Oreng lalake’ ganeka jugan ngoca’ ja’ kaula olle terros mele gandum asareng reng-oreng derrebbanna kantos gandumma lastare eanye sadaja."

²² "Iya, na’," ca’na Na’omi, "pajat lebbi becce’ ba’na alako abareng ban babine’an e teggalla Bowas jareya. Mon ba’na alako e teggalla oreng laen, olle daddi ba’na ela-salae oreng e jadhiya."

²³ Daddi, Errut paggun noro’ babine’an se ederrep Bowas, mele gar-gaggarra gandum sampe’ gandumma la eanye kabbi. Sabatara jareya Errut paggun apolong ban ebu mattowana.

Rut

Video Rut 2

Ikuti Kami:

KONTAK | PARTISIPASI | DONASI