Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nia’ bijanna Naomi battua ri tumate bura’nenna, Elimelekh. Anjo taua kalumanynyangi siagang nikangalikangi. Arenna iamintu Boas.
2 Ri se’reang allo akkanami Rut mae ri Naomi, "Amma’ erokka’ appala’ kana mange anrappung gandung ia tu’guruka battu ri pakattoa. Tantu nia’ja tau ampa’bianga’ appakamma anjo." Appialimi Naomi angkana, "Baji’mi na’, a’lampamako mange!"
3 Jari a’lampami Rut mange ri kokoa, namminawang ri pakattoa anrappung gandung tu’guruka. Sitabangi a’lampa mange ri kokonna Boas.
4 Tena nasallo battumi Boas battu ri Betlehem na’barisallang mae ri sikamma pakattoa. Nakana, "Poro Narurungang ngasengko Batara." Appialimi sikamma pakattoa angkana, "Poro Nabarakkakiki’ Batara".
5 Nampa akkuta’nammo Boas mae ri mandoro’na angkana, "Inai anjo bainea?"
6 Appialimi anjo mandoroka angkana, "Baine bansa Moab beru battua siagang Naomi battu ri pa’rasangang Moab.
7 Appala’ paramisi mae ri nakke sollanna nipa’biang amminawang ri bokona sikamma pakattoa untu’ anrappungi gandung ta’benea. Battu ri bari’basa’ iji nanjama turus, na nampami anne silalonna ammantang untu’ ammari-mari sinampe’ ri balla’-ballaka."
8 Nampa nakanamo Boas mae ri Rut, "Pilangngeria’ rolong. Tea’ mako a’lampai mange anrappung ri kokonna tu maraenga. Anrinni mako anrappung siagang bai’-baine pajamaku. Parhatikangi kemae ke’nanga akkatto. Tuli pinawangi ke’nanga siagang teako bellai battu ri ke’nanga. Punna turereko, angngalle mako je’ne’ battu katoang-katoang le’baka nabonei pajama bura’-bura’nea. Le’ba’mi kuparentakang ke’nanga sollanna tena nanagangguko."
9 (2:8)
10 Nalangngere’na Rut anjo, su’ju’mi ri dallekanna Boas nampa angkana, "Bapa’, tena nakusiratang antarimai anjo kabajikang kammaya battu ri katte. Inakke anne tau battu-battua’, siagang tena nakusiratang kiparhatikang kamma!"
11 Appialimi Boas angkana, "Le’ba’mi kulangngere’ ngaseng sikamma apa le’baka nugaukang mae ri matoang bainenu appakkaramula ri matenamo bura’nennu. Kuassemmi angkanaya nubokoimi tau toanu siagang pa’rasangannu untu’ battu mae anrinni ammantang siagang tau tenaya ngasempa nuassengi.
12 Tapporo Nabalasa’ lalo Batara kabajikannu. Tapporo nutarima lalo apa siratanga Napassareang Batara, Allata’alana Israel, nasaba’ battu mako untu’ appala’ pa’la’langngang mae ri Ia!"
13 Appialimi Rut angkana, "Teai sipato’ bajitta mae ri nakke Bapa’, manna natena kusangkamma siagang pajama-jamata. Anjo somberetta teai sipato’ nasaleorinna atingku."
14 Ri wattu narapi’namo wattu pangnganreang, nakanamo Boas mae ri Rut, "Maeko angnganre. Anne je’ne’ gangang pa’bale." Angnganremi Rut siagang sikamma pakattoa. Nisare tommi gandung nisanggaraka ri Boas. Angnganremi Rut sa’genna bassoro’. Le’baki angnganre, nia’ ija tassesa.
15 Nampa a’lampamo pole Rut mange anrappung gandung. A’lampanamo, nakanamo Boas mae ri sikamma pakattoa, "Punna anrappungi gandung le’bakamo nisikko’-sikko’, lappassangi mange. Teako pakasiriki yareka teako kalarroi. Pakkunjungiammi ambi’buki tassike’de’-ke’de’ battu ri anjo le’bakamo nisikko’-sikko’, nanutu’gurang untu’ ia sollanna nanarappungi."
16 (2:15)
17 Anrappung turuski gandung Rut sa’genna karueng ri kokoa. Le’baki napeppe’ batanna anjo gandunga sollanna ta’lappasa’ lisere’na battu ri batanna, a’nassami angkanaya nia’ kira-kira sampulo kilo battala’na anjo gandung le’baka napasse’re.
18 Nampa ammotere’mo mange ri kotaya angngerangi anjo apa nagappaya nanapaccinikang matoanna siapa jaina napasse’re. Siagang nasareang tommi matoanna anjo kanre tenaya nala’busuki ri wattunna angnganre.
19 Nakanamo Naomi mae ri ia, "Kemae nugappa ngaseng anne sikammaya jaina? Ri kokonnako inai anjama anne alloa? Tapporo nibarakkaki ri Allata’ala anjo tau a’gau’ bajika mae ri kau!" Jari nacarita ngasemmi Rut mae ri Naomi angkanaya anjo koko napattampakkia anrappung gandung iamintu kokonna sitau bura’ne niarenga Boas.
20 Nakanamo Naomi, "Na’, anjo taua bija ma’reppesetta tonji. Iami musti antanggongiki’. Tapporo nibarakkaki laloi ri Batara. Tuli Narupai janjinNa Batara, baji’ namae ri tau attallasaka ija kammayatompa mae ri ke’nanga ia mateamo."
21 Nampa nakanamo pole Rut, "Amma’, nakana pole anjo taua akkullea’ anrappung turus gandung siagang sikamma pajamana sa’genna le’ba’ sikontu wassele’ kokonna nikatto."
22 Appialimi Rut angkana, "Iyo na’, memang bajikangangi punna siagangko bai’-bainea anjama ri kokonna Boas. Nasaba’ punna maeko ri kokonna tumaraenga, akkulleko naganggu taua anjoreng!"
23 Lanri kammana anjo, Rut tuli amminawammi ri sikamma baine pajamaya ri kokonna Boas. Anrappummi gandung anjoreng sa’genna le’ba’ ngaseng nikatto gandunga — baji’ nakattoang bungasaka kammayatompa kattoang ri boko dudua. Na lalang sikammaya anjo sallona ammantangi Rut siagang matoang bainena.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA