Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali komi seja samba’a pei i Kerisitu, see naka raya ngkomi rapakaroso, pasi pamporayangiNya mampakalindo raya ngkomi. Pasi see naka komi tuwu masingkatao pei i Nosa Mapasing, pasi masiporayang pei mangika anu to manoto resi yunu ngkomi samba’a pei samba’a.
2 Wali apa saba ewa wetu resi komi, tuwutuwuja komi datuwu masingkatao samba’a pei samba’a pasi masiporayang. Pasi tuwu-tuwuja komi samba’a songka ngkomi pasi samba’a pampobuuka ngkomi. Apa ane ewa wetu, bae wo’u kandende ndayangku mampobuuka komi.
3 Wali ane re’e bara kesaa to danuika ngkomi, ne’e mangika ane ojo rani mampakabae angga ngkomi. Pasi ne’e mangika ane ojo rani tabaro. To tao-tao kita mampobuuka koro ngkita kodi angganya pasi mampobuuka yunu ngkita semo to bae-bae angganya pei kita.
4 Ne’e kita ojo mampobuuka anu to bae batuanginya ri koro ngkita. Pei anu kita mampobuuka seja anu to bae batuanginya resi yunu ngkita samba’a pei samba’a.
5 Wali ewa wimba pampobuuka i ngKerisitu Yesu, anu kita ewa wetu seja pampobuuka ngkita.
6 Apa Ia kamonsonya sewaju kojo pei i Pue Allah, pei Ia taa mampobuuka, “Aku bo’ongKu mampiyaika yau pangkangKu si’i.”.
7 Kasimbalinya yako etu Ia buya rayaNya mampiyaika yau pangkaNya to bae kojo etu panewa rapoanaka ewa to lino. Pasi Ia mawali yau ewa to papolaong.
8 Pasi tempo Ia mawali ewa to lino etu, tempo etu Ia mampakakodi anggaNya, pasi Ia taa mangewa songka i mPue Allah mangkonong kapateNya. Sakowa mate rapaku ri kaju pasape, Ia napolaika.
9 Wali see naka i Pue Allah mangokotaka Ia pei mangawaika Ia pangka to baebae pei samparia pangka to yusa. Pasi i Pue Allah mangawaika Ia sanga to bae wo’u batuanginya pei samparia sanga to yusa.
10 Naka pei i Pue Allah mangika palaong to etu see ane radonge sanga i Yesu etu, samparia anu to tuwu to ndate saruga pasi to ri wawo lino pasi to ri ara lino ri lipu ntau to mate, paka damambokotu damanga’angga Ia.
11 Pasi tare to taa damampatimonso i Yesu Kerisitu Ia semo i Pue. Wali yako palaong to etu i Pue Allah, Pa’a, darabarong.
12 Wali a’i-a’i anu kuporayang, tempo aku re’e resi komi seore, tempo etu komi sangkani mampolaika aku. Pei tempo si’i, tempo aku tare’e resi komi, bae wo’u batuanginya komi mampolaika gombongku. Komi roomo napalaes i mPue Allah wali pakadota samba’a pei samba’a mangika lengko ngkatuwu to masipato naika ntau to napalaes i mPue Allah etu. Pasi ri rayanya komi mangika palaong to etu, to tao-tao komi mampalaika i Pue Allah saba manga’angga kojo Ia.
13 Wali pakadota mangika palaong to etu, apa i Pue Allah semo to mapalaong ri raya ngkita naka kita rani mangika palaong to mampakasanang Ia, pasi naka kita takoto mangika palaong to etu.
14 Wali nempo bara kesaa to nuika ngkomi samba’a pei samba’a, tempo komi mangika palaong to etu, ne’e kambumbu-mbumbu pasi ne’e seja masibanta,
15 see tare lengko ngkomi to maya nato’o nsa’e sala pasi to masipato raseko. Apa kita ngana i mPue Allah, see naka masipato kita mangika lengko to matao nempo maroo ri oyo ntau to maneo pasi to baraewa to tuwu ri tempo si’i. Apa kita raporapaka ewa batu’e to mareme kojo to mangansindo lino si’i.
16 Naka pei kita raporapaka ewa mangansindo lino si’i, apa kita semo to mampakarebaka resi to lino kareba to mangawaika sira katuwu to singkasaenya. Wali ika lengko to etu see ane ratamo temponya i Kerisitu ma’i wo’u, aku maya ndende rayangku mampobuuka bae batuanginya palaong to inikangku ri oyo ngkomi seore. Pasi taa tibute palaong to mandasai kojo kuepe mangika etu.
17 Wali pangaya ngkomi maya raporapaka ewa pampue to nupampueka ngkomi resi i Pue Allah. Pasi aku maya raporapaka ewa anu to rainu to biasa nawubu nto pampue ri wawo mpampue to rapampueka, apa aku tamo masae bara darapopate yau pei tiwubu raangku. Pei nempo ewa wetu, aku masanang rayangku pasi ndende rayangku sewaju ewa komi masanang pasi ndende raya mampampueka pampue ngkomi etu resi i Pue Allah.
18 Wali to tao-tao komi seja mampakasanang wo’u raya ngkomi pasi ndende seja raya ngkomi sewaju ewa aku nempo aku rapopate yau.
19 Wali aku mansarumaka i Pue Yesu tamo masae damangawai jaya see aku maya mangampokau i Timotius dayau resi komi. Apa ane ewa see, ojo karoonya ia mayunu resi komi, ia maya mawolili muni mangangkenika aku kareba mangkonong komi. Pasi kareba etu seja damampakaroso rayangku.
20 Wali i Timotius semo to dakupokau, apa tare to yusa yunungku rire kasimbalinya yako ia to samba’a pampobuuka pei aku, pasi to mangamporayang komi pasi rani mangansawang komi.
21 Apa tau to yusa, sira samparia ojo mangampobuuka anu to bae batuanginya ri koro nsira samba’a pei samba’a. Sira tare mampobuuka anu to bae batuanginya resi i Yesu Kerisitu.
22 Pei ane i Timotius, komi nunsani yami ia tau to masipato rasarumaka. Apa ia re’emo mapalaong sindara-ndara pei aku mampakarebaka kareba matao. Wali kami dua ewa tau sana mangika palaong to etu.
23 Wali tuwu-tuwuja tamo masae aku damampokau ia dayau resi komi. Aku ojo mangampeas damangansani bara kesaa palaong to damawali resi aku rire.
24 Pasi aku mansarumaka seja i Pue tamo masae damangawaika seja aku jaya dayau resi komi.
25 Wali mangkonong i Epaproditus, a’i ngkita to samba’a pangaya to nupokau ngkomi ma’i mangansawang aku, ia re’e mapalaong sindara-ndara pei aku mangangika palaong i ngKerisitu, pasi ia re’e seja mampoewaka kareba matao sewaju ewa aku. Pei si’i-si’i aku tawa maya yau resi komi, see naka aku mangepe to tao-tao aku mangampokau i Epaproditus mawolili muni resi komi.
26 Apa ia mawongko kojo rayanya resi komi samparia, pasi ia moru rayanya apa komi re’e mangandonge kareba to manganto’o ia masaki seore.
27 Wali monso pu’u ia masaki seore. Ia masaki kojo ewa damate, pei ia taa mate apa i Pue Allah mamporayang ia. Pasi si’a ojo ia to naporayang etu. I Pue Allah mamporayang seja aku apa ane namate yau i Epaproditus etu, ojo tidugang wo’u kamawo ndayangku.
28 Wali see naka aku rani kojo mangampokau ia mawolili muni resi komi see komi damasanang wo’u raya ngkomi damangangkita muni ia. Pasi ane ewa wetu, aku tamo mawo kojo rayangku mampobuuka komi.
29 (2:28)
30 Wali tima ia ri raya ngkandende ndaya ngkomi to bae kojo, ewa to masipato nuika ngkomi mangantima tau to samba’a seja pei i Pue. Pasi pakabae ia, apa ia mosu mate mangika palaong i ngKerisitu. Pasi ia buya rayanya nempo mate yau mangansawang aku, pasi ia mangampansaruka komi to taa nukurang mangika palaong to etu apa longko. See naka masipato komi mampakabae ia pasi samparia tau to ewa ia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA