1 Mo'ikow noropot, lantaran ain notobatuí i Kristus. Diaídon moaíjar ing gina monimu sing ki Kristus motabi ko'i monimu! Bo Roho i Allah umuran kotaki-takin monimu, sahingga mo'ikow tantuídon mototabian bo motabi doman kon tumpaḷa intau.
2 Tuamai baí totu-totu'udon mosanang ing ginaku, daí aidai in na'a: Tantuídon kobiag motobatuí kong gina, motobatuí kon raian, oyuíon kototabian, motobatuí kon jiwa bo motobatuí kon tujuan.
3 Dika motayak kong ka'untungan tontanií andeka dumodia kon intau, ta'e pokopo'ompaíbií kon dodia bo anggapdon kon intau ibaneabií i mopia-pia nongkon inaton.
4 Pikirdon doman ing kopontingan intau ibanea, dona'ai tongaí momikir kong kopontingan tontanií.
5 Kong kobiagan monimu, pakeíbií in raian bo porasa'an i Kristus Yesus:
6 Aka podudui ing ka'ada'an-Nya sabanarnya, Sia tua notongkaibií i Allah, ta'e ka'ada'an-Nya tatua diaíbií binalií-Nya patokan.
7 Ta'e tua komintan inukatan-Nyapabií bo nobalií naonda bo tobatuí ata. Sia nobalií naonda bo intau, bo tua pinonyata-Nya doman kong kobiagan-Nya.
8 Sia diaíbií mosiḷantud, bo nobiag motoindudui ko'i Allah dapot im minatoi. Minatoi kong kayu pinoyotalempang.
9 Tuamai pinoḷantud totok i Allah in Sia, bo inogoian ing kakuasa'an inta moḷobe-ḷoben nongkon kakuasa'an ibanea makow.
10 Simbaí kom bonu in tangoi Yesus, bayongan mahaḷuk inta kon ḷangit, kom butaí ande kon limonag im butaí, komintandon mosumbah ko'i-Nia.
11 Bo akuíonbií monia komintan kong ki Yesus Kristus tua in Tuhanbií; takin natua daí ki Allah, ki Amaí naton im pinomuliíadon.
12 Utat mita inta kotabiku, mo'ikow umuranbií kodu-kodudui ko'inakoí wakutu in aku'oi koyota-yotakinpa monimu, tuamai po'igumonku ko'i monimu, umpakah ing kita nogiyayuíandon ta'e umuranbií ramiji aidai onu inta kinoibog i Allah. Sim mo'ikow aindon pinosaḷamat i Allah, tuamai umuran ramiji simbaí ikow mobiag mosempurna. Mokopo'endar im mogaid kon tua komintan podudui kon inta kino ibog i Allah.
13 Sing ki Allahbií im mopogonuí kong ginamu simbaí mo'ibog bo mokosanggup moposanang ing gina i Allah i mo'ikow.
14 Aidaibií in oaíidan tatua takin pia ing gina bo dika mosirogian andeka mobobayowan.
15 Sin aid natua mopo'ontongbií kom mo'ikow ing ki adií mita i Allah inta diaí kotaḷaí, inta nobiag kon yuaí-yuaík in intau mita masa na'a inta gina diaí mongotulid bo nobiag diaí mongotoḷutui. Sahingga mo'ikow umuran monimbayag kon yuaí-yuaík monia tua, naonda bo tundi mita kon ḷangit, ta'e dika taḷaían im pirman i Allah inta nobalií dodoyonan kobiagan, simbaí oyuíon im mokosanang kong ginaku aka mo'iangoidon singgai i Kristus, sim monyatadon kon onu inta iramijiku tua komintanbií nobaraguna bo oyuíon mangale iroriga'ankumai tua.
16 (2:15)
17 Matoikabií in aku'oi sim mobalií kurban in sambayangmu ko'i Allah inta pinirisayamu, yo diaíbií moya'at ing ginaku ko'i monimu.
18 Naí doman tua, ibogonku mosanang doman gina monimu takin ginaku.
19 Mopirisayabií totok in aku'oi kon takin totuḷung i Tuhan Yesus mota'audon bui potabaíku mangoi ko'i monimu ing ki Timotius, simbaí mo'onowdon ginaku mokodongog kon habar soaáḷ mo'ikow.
20 Tongaíbií ki Timotius in intau inta toraianku inta totu-totu'u monarukira kong kopontingan monimu.
21 Sin ibanea makow in tongaíbií morai kong kopontingan monia tontanií, de'emanbií morai kong kopontingan i Kristus Yesus.
22 Sin inontong bidon monimu tontanií kong ki Timotius tua in nokobaragunabií ko'inakoí. Sia in totu-totu'udon nogaid takinku nopota'au magií-makow in Habar Mopia inta nongkon i Allah. Kaminda na'a in naídon onda guyanga bo adií.
23 Tuamai naonda ing kota'auankudon kopaḷutan porkaraku tana'a, daí ḷagikudon potabaí mangoi ko'i monimu in sia.
24 Bo mopirisayabií doman totok in aku'oi kon takin totuḷung i Tuhan, aku'oi ḷagi bidon mo'iangoi ko'i monimu.
25 Soaáḷ ki Epaproditus ki utat naton inta pinotabaí mangoi monimu motuḷung ko'inakoí, rasa'ankumai sia paraḷukudon potabaí bui mamangoi ko'i monimu. Sia ain notuḷung ko'inakoí nogaid kon oaíidanku.
26 Mokotanobdon totok in sia ko'i monimu komintan, bo moaíjar domandon totok ing ginanya sing kinota'auandon monimu kon notakit in sia.
27 O'o, totu'ubií kon notakit in sia gogioí bo minatoi. Ta'e sinotabipa i Allah in sia; de'emanbií tongaí sia, ta'e aku'oibií doman, simbaí diaí modugang moaíjar ing ginaku.
28 Manangka intua moḷobendon totok in ibogku baí ḷagikudon potabaí mangoi bui ko'i monimu in sia, simbaí mosanangdon ing gina monimu aka ontongondon monimu in sia, bo mo'onow domandon ing ginaku.
29 Daí tarimadon in sia takin pia ing gina saḷaku utat inta tumpaḷa mopirisaya ko'i Tuhan, dona'aibií diaí pandungonmai intau inta naí sia tua.
30 Sin lantaran oaíidan i Kristus daí gogioí in sia bo minatoi; norelabií totok in sia nopotaru in nyawanya monoliu ko'i monimu mobantung ko'inakoí moginḷapat kon onu inta diaípa noḷapat.

Studi Alkitab lengkap, silahkan lihat Alkitab SABDA :: Filipi 2
Studi Alkitab mobile, silahkan lihat Alkitab Mobi :: Filipi 2

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke