Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jari, lantaran lẽq dalem Almasih araq nasẽhat, araq penghiburan kasih, araq persahabatan lẽq dalem Roh Suci, araq rase saling kasihin dait belas kasihan,

² sempurneang sukecite tiang siq hal-hal niki: Side pade harus sopoq angen dait sopoq pikiran, lẽq dalem sopoq kasih, sopoq jiwe, sopoq tujuan.

³ Ndaq ngelaksaneang napi juaq lantaran jari kepentingan mẽsaq, atao jari nyombongang diriq. Sebalikne, side pade sopoq-sopoq harus rendah atẽ anggep dengan lain solahan tebanding diriqde mẽsaq.

⁴ Sebilang dengan ndaq cume merhatiang kepentinganne mẽsaq, laguq kepentingan dengan lain ẽndah.

⁵ Side pade harus bedowẽ pikiran maraq Deside Isa Almasih:

⁶ Sẽngaq timaq Ie bedowẽ sipat ilahi, laguq Ie nẽnten nganggep bahwe keadaan-Ne saq ilahi nike harus tepertahenang.

⁷ Sebalikne, Ie lepas selapuqne terus jari pade maraq sopoq hambe. Ie jari pade maraq manusie. Dait lẽq dalem keadaan sebagẽ manusie,

⁸ Ie ngerendahang diriq-Ne dait taat jangke ninggal -- malahan jangke ninggal lẽq kayuq salib.

⁹ Keranaq nike Ie tetinggiang gati siq Allah dait Ie teicanin pesẽngan saq atasan lẽman selapuq pesẽngan.

¹⁰ Adẽq lẽq dalem pesẽngan Deside Isa Almasih, selapuq mahluk saq lẽq sorge, dait saq lẽq gumi, dait saq lẽq bawaq gumi, gen sujut lẽq arepan-Ne.

¹¹ Dait selapuq biwih gen ngaku, "Deside Isa Almasih nike Junjungan Saq Mulie," bagi kemuliean Allah, Bapante.

¹² Semeton senamian saq tiang kasihin, side pade tetep taat, keranaq nike jari dengan saq sampun teselametang, side pade harus ngamalang hal-hal saq kenaq, siq rase hormat dait patuh lẽq Allah, ndẽqne cume maraq sewaktu tiang araq lẽq tengaq-tengaq side pade, laguq lebihan malik mangkin, sewaktu tiang jaoq lẽman side pade,

¹³ sẽngaq Allah mẽsaq saq bekarye lẽq dalem diriqde jari miaq side pade rẽde dait sanggup ngelaksaneang menurut maksut Allah saq solah.

¹⁴ Laksaneang napi juaq siq care ndaq ngerumun dait betungkasan.

¹⁵ Adẽq side pade ndẽq araq cacat cele dait murni, sebagẽ bije-bije dowẽn Allah saq idup tulus dait kenaq lẽq tengaq-tengaq dengan-dengan jahat dait bedose, sehingge lẽq antare ie pade, side pade becahaye maraq bintang-bintang lẽq dalem dunie.

¹⁶ Lẽq waktu nike ẽndah, side pade harus nyatayang tipaq ie pade Manik Allah saq ngicanin idup. Adẽq siq care nike, tiang bau jari bangge sewaktu ẽraq Deside Isa Almasih rauh malik, sẽngaq ternyate tiang ndẽq sie-sie lelah berusahe.

¹⁷ Laguq timaq daraq tiang harus tetumpahang ẽndah jari kurban bagi Allah dait pengabdian demi imande, tiang cemoh dait tiang besukecite kance side pade selapuq.

¹⁸ Maraq nike ẽndah side pade harus merase seneng dait milu gembire bareng tiang.

¹⁹ Lẽq dalem Junjungan Saq Mulie Deside Isa Almasih, tiang beharep bau aruan ngutus Timotius tipaq side, adẽq atẽn tiang jari tenang sẽngaq tiang nenaoq hal mengenai side.

²⁰ Sẽngaq dengan saq araq kance tiang, ndẽq araq sopoq dengan juaq saq sopoq angen dait sopoq pikiran maraq tiang kance ie dait saq tetu-tetu merhatiang kepentingan side.

²¹ Sẽngaq selapuq saq lainne cume ngurus kepentingan diriqne mẽsaq doang, ndẽqne kepentingan Deside Isa Almasih.

²² Side nenaoq bahwe kesetieanne sampun teuji. Ie sampun begawẽan bareng kance tiang jari nyampẽang Kabar Solah lẽman Allah. Tiang pade kance due maraq anak kance amaq.

²³ Keranaq nike jelap sesampun tiang nenaoq berembẽ jarine pelekare tiang laun, tiang gen ngutus ie ojok side.

²⁴ Laguq tiang percaye lẽq dalem Tuhan, bahwe tiang mẽsaq ndẽqne pire ngonẽq malik gen dateng ẽndah jangoq side pade.

²⁵ Mengenai semetonte Epaproditus, saq side pade utus jari nulung tiang, tiang anggep perlu suruq ie tulak ojok side. Ie sampun bareng kance tiang lẽq dalem pegawẽan dait perjuangan tiang.

²⁶ Sẽngaq ie sampun kangen gati lẽq side selapuqne, dait ie ndẽq tenang sẽngaq side pade sampun mauq berite bahwe ie sakit.

²⁷ Mule tetu ie sakit jangke gen ninggal. Laguq Allah periak lẽq ie; dait ndẽqne cume ie doang, laguq tiang ẽndah, adẽq tiang ndaq jari sayan sedih malik.

²⁸ Keranaq nike sayan belẽq ẽndah angen tiang gen suruq ie tulak ojok side, adẽq side pade seneng malik lamun side pade bedait kance ie, dait kuatir tiang jari sayan kurang.

²⁹ Jari, terimaq ie siq sukecite lẽq dalem Tuhan. Hormatin selapuq dengan saq maraq ie.

³⁰ Sẽngaq ie jangke gen ninggal demi pengabdianne tipaq Almasih dait nyawene tetaroqang jari genepang napi saq kurang lẽq dalem usahe side pade nulung tiang.

Filipi

Video Filipi 2

Ikuti Kami:

KONTAK | PARTISIPASI | DONASI