Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Inanké ulun muyuh bang Keristus ngetueh nemuyuh? Inanké awaNeh ngubuk nemuyuh? Inanké rurum muyuh dengan Roh? Inanké muyuh mawa idi méi' seburur dengan seburur?

² Ui mutuh nemuyuh ngeriput awangku. Do' muyuh sebuleng terawé idi pad-pad mawa. Do' muyuh sebuleng niat bang anu, idi sebuleng rurum.

³ Aleg nganau' anun-anun dengan sikal pa luun idi dengan medita' niat, iamo' dengan mebeneh niat anid-anid burur muyuh ngerawé nelun baken meluun do' ratnan burur muyuh sebuleng.

⁴ Aleg seburur lemulun ngerawé kekamenneh sebuleng mo', iamo' do' ieh ngerawé ratnan kekamen lun baken teh.

⁵ Do' terawé muyuh mepad kudeng terawé Keristus Yésus:

⁶ Sagan pana' Ieh dengan ayu Allah, na Ieh mesaad pian ngimet mepad kudeng Allah ineh.

⁷ Imao' Ieh nengasi' bururNeh mangun ku demulun bang ayuNeh mepad kudeng lemulun idi sinier mepad kudeng ayu lemulun teh.

⁸ Ieh nengebeneh niatNeh, idi lutep pad macing inan até — ieh ineh até sinalib.

⁹ Ngaceku ineh Allah nengedita' Neneh macing nan su luk meluun medita', idi nemaré Neneh sebuleng ngadan luk pa luun amung-amung ngadan.

¹⁰ Idi dengan ngadan Yésus ineh miak tekeradung amung-amung aleb luk déi' surga idi luk bang tana', idi pa liang tana' pana',

¹¹ idi amung-amung dila' miak ngamo idi Yésus Keristus ineh Tuhan, kuan rayeh Allah, ieh ineh Taman.

¹² Ngaceku ineh, O lun rurumku, mepad kudeng muyuh megéi' maya' balaku kareb ui idi dengan muyuh, do' muyuh maya' balaku nekini kareb ui mado rat nemuyuh. Do' muyuh ngakem dengan matot idi megegker pad ngeriput ulun muyuh bang Keristus.

¹³ Ngaceku Allah, Ieh ineh luk ngakem bang nemuyuh pad muyuh geregan idi ngakem teh sikal ngacing pianNeh luk do' ineh.

¹⁴ Idi do' muyuh ngakem dengan na dureng-dureng idi pekedaluh,

¹⁵ pad muyuh na mesala' idi niat muyuh pana' meligan peh, ieh ineh anak-anak Allah luk na mesala' arang uned pupu luk tekilu' idi luk mesala'. Do' muyuh merasat arangdeh mepad kudeng gituen-gituen déi' langit,

¹⁶ kareb muyuh nicul bala luk maré ulun, pad ui mawang niat ku muyuh kareb Aco Keristus, ngaceku kekamenku na mo'-mo', idi erurku pana' na mo'-mo' teh.

¹⁷ Iamo' kudeng ui ngeruat dara'ku pana', mepad kudeng aceh baré luk inutang luun baré anu muyuh, idi ui mawang niat teh idi pad-pad mawang niat dengan amung-amung muyuh.

¹⁸ Kudeng ineh teh do' muyuh mawang niat idi do' ria' pad-pad denganku.

¹⁹ Iamo' bang Tuhan tau Yésus ui merapet miak ngecuk Timotius ngikak nemuyuh dengan mesaget, pad nitku lutep kareb ui kali' amung-amung bala luk rat nemuyuh.

²⁰ Ieh mo' luk sebuleng niat denganku, luk mepad ngerawé nemuyuh dengan matu-matu.

²¹ Ngaceku amung-amungdeh nakap luk kuan bururdeh sebuleng, baken luk ratnan Yésus Keristus.

²² Iamo' muyuh kali' kudeng apeh Timotius nengegala' kélneh, idi kudeng apeh kai dueh nengakem pad-pad mepad kudeng anak dengan tamanneh ngaceku Bala luk Do' ineh.

²³ Ui merapet petacu ngecuk neneh amé' nemuyuh kareb ui pangeh kali' kudeng apeh luk mangun kuanku.

²⁴ Idi ui merapet inan Tuhan, pad ui sebuleng pana' miak macing nemuyuh dengan mesaget.

²⁵ Iamo' bang terawéku do' ui ngecuk Epaproditus, kinanak tau ineh, kuan muyuh, ieh ineh lun denganku bang kekamen idi bunu' Tuhan, idi luk duken muyuh ngasa' negku bang asi'ku.

²⁶ Ieh pelaba pian papu' nemuyuh, idi ieh mesusa' niat teh ngaceku muyuh pangeh neninger idi ieh mét.

²⁷ Idi sagan pana' ieh mét lélé maté, iamo' Allah méi' neneh, idi baken kuanneh sebuleng mo' iamo' kuanku pana, pad ui na pelaba dat niat.

²⁸ Ngaceku ineh ui saget-saget ngecuk neneh, pad muyuh mawang niat nier neneh sekua' teh, idi ui na pelaba dat niat.

²⁹ Ngaceku ineh do' muyuh ngalap neneh dengan ngadan Tuhan, dengan panu'-panu' awan ngiat muyuh, idi ngedita' lemulun luk kudeng ineh.

³⁰ Ngaceku ratnan kekamen Keristus ieh pangeh lélé maté, idi na ieh nengerawé ulunneh sebuleng, ngaceku ieh sikal ngelibal nemuyuh ngasa' negku ini.

Filipi

Video Filipi 2

Ikuti Kami:

KONTAK | PARTISIPASI | DONASI