Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mangkami Almaseh mpamasumanga' kamu', na ia to pangpakamoja'-Na mpamasannangmo kamu', na Roh Allataala mpamesa' penawamo kamu', ammisipakamoja', misikamasean.

² Iamo joo la'bi la mipemasannangngina', iamo to la sipahang melo kamu', la sipakamoja' kamu', la mesa' pattuju kamu',

³ na danggi' miangahhi to mipumelo mesa, ba'tu pangpuji tangkebattuan. Apa sibalikanna, la mpupengkajiongan kamu' kalemi, na la mikasiri' to tau laen na kalemi.

⁴ Na danggi' na ia manda to kaparalluan mesammi miangah, apa la miangah too to naparalluinna tau laen.

⁵ Na ia to penawammi la susi penawan-Na Puang Isa Almaseh:

⁶ Moi sangrupa Puang Allataala to Almaseh, apa te'da napapajanni to kapuangan-Na.

⁷ Apa canning atinna napatorroi to kapuangan-Na, namenjaji susi kaunan. Mentolino, natuo susi tolino.

⁸ Mpupengkajiongan kalena anna menturu' tongan lako Puang Allataala, naarannai mate. La'bi pole'pi mate jaoi kaju sitamben.

⁹ Iamo joo nagaja mpamajaoi Puang Allataala, nabenni kuasa kaminang majao,

¹⁰ anna sininna to kepenawa mengguntu' ssompa Puang Isa, la jaona langi', la lanna lino, la jiong lino nanii tomate.

¹¹ Na sininna tokepenawa la mangngaku kumua, "Puang to Isa Almaseh", anna la dipakala'bih to Ambe' Puang Allataala.

¹² Ee, tomala'bihku' sola ngasan to kupakamoja'! Susi tongkutorropa lan tangnga-tangngami, la'bi-la'bi tee too moi mambelana' jio mai kalemi, la tatta' kamu' nturu'i to pangngajahku'. Mangkamo kamu' napasalama' Puang Allataala. Jaji, la mipengkulle-kullei tuo susi sipato'na umma'-Na Puang Allataala, iamo to ssompa Puang mimalaja' mpugauk kasalan.

¹³ Puang Allataala mpupembalik penawammi ammimadoang, mikulle tooi mpugaukki to pakkaeloran-Na.

¹⁴ Danggi' mimangnuku-nuku iarika site'geh ke denni apa mipugauk,

¹⁵ dikua namanassa lako tolino to tangmaruruh na togaja', kumua tomelo kamu' mimaruruh na te'da caccami, apa taun-Namo kamu' Puang Allataala. Miarrangngii to tolino to tangnturu' Puang Allataala susi arrang lako tosala lalan,

¹⁶ ke mipangpeissenanni to Kareba Kasalamatan. Na ia ke susii joo, wa'dingna' mpumasannangngi ke ratu pole'mi Almaseh, sanga te'da nalao sala to jamanku'.

¹⁷ Ia tee aku' mangkana' mpaissenni kamu' to Kareba Kasalamatan ammimemmatappa'. Na moi nadipato'do to raraku', nabutung dipatibolloh susi karoba lako Puang Allataala nasaba' ia to mangka kupugauk lako kalemi, la masannangna' antamasannang sola.

¹⁸ Na susi too kamu' la masannang, antapada-pada masannang.

¹⁹ Ia ke napuelohhi Puang Isa, madoangna' ssuai madoi' mati' to Timotius, dikua na ianna pole mai, ia to karebammi mpamasannang penawangku'.

²⁰ Nasaba' ia manda kusolan sangpenawa mpikkiri' tonganni to miparalluinna.

²¹ Ia to tau laen pada mparinawa bangri kalena, tangngia pakkaeloran-Na Puang Isa Almaseh.

²² Mikitamo kumua wa'ding dikatappa'i to Timotius. Mangkamo' natulung mpangpeissenan Kareba Kasalamatan susi anak ntulung ambe'na.

²³ Iamo kuakkattai la kusua male mati', ke mangkami to kara-karaku' dira'tah.

²⁴ Apa kurannuan kumua la naeloranna' Puang Allataala kumadoi' toda male mati'.

²⁵ Ia to sangpangjamanku' padanta' tomatappa' Epafroditus, to mangka misua ratu inde' ntulungna', kusanga parallu too kusua pole mati',

²⁶ sanga gaja nakamali' kamu', nanawa-nawa tooi, nasaba' misa'ding kumua masakii.

²⁷ Masaki tonganni ia, na garapai mate. Apa nakamaseii Puang Allataala, na te'da na ia manda nakamasei apa moi aku', dikua nadanggi' kusamaparri'-parri'na.

²⁸ Iamo joo kumadoi' ssuai mati', ammimasannang ke mikitami, nadanggi' nakerangngan to sussaku'.

²⁹ Masannang kamu' ntarimai susi sipato'na ntarima to mpangjaman Puang. Parallu mikasiri' to tau susi joo,

³⁰ nasaba' garapai mate tonna mpangjaman Almaseh, iamo to mpugaukki to apa la mitulunganna', na te'damo nacirinnai sunga'na.

Filipi

Video Filipi 2

Ikuti Kami:

KONTAK | PARTISIPASI | DONASI