Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini Jahowa ma hubani si Musa, i halimisan dohorhon Sinai, padua-tahunkon dob luar sidea hun tanoh Masir, bani bulan sada,
2 “Maningon marpesta Paskah halak Israel bani panorang na dob binuhul hinan.
3 Bani ari sapuluh ompat bulan on malele bodari, maningon hoseihononnima do in bani panorang na dob binuhul hinan, maningon romban bani aturanni pakon titahni do ia hoseihononnima.”
4 Dob ai ihatahon si Musa ma halak Israel marpesta Paskah.
5 Jadi saud ma sidea marpesta Paskah bani ari sapuluh ompat bulan sada malele bodari i halimisan dohorhon Sinai; romban hubani na tinonahkon ni Jahowa hubani si Musa, sonai do ibahen halak Israel.
6 Tapi adong do dalahi na butak halani bangkei ni jolma, jadi seng be tarbahen sidea marpesta Paskah bani ari ai. Roh ma sidea hu lobei ni si Musa pakon si Aron bani ari na sasada ai;
7 ihatahon sidea ma hu bani, “Na butak do hanami binahen ni bangkei ni jolma. Mase ma tarlarang hanami mamboan galangan bani Jahowa bani panorang na dob binuhul i tongah-tongah ni halak Israel?”
8 Dob ai ihatahon si Musa ma hubani sidea, “Paima nasiam ijon, ase hutangar lobei barang aha do hatahonon ni Jahowa pasal nasiam.”
9 Nini Jahowa ma hubani si Musa,
10 “Hatahon ma hubani halak Israel: Anggo adong na butak barang ise bannima barang bani ginomparnima halani bangkei, atap sanggah pardalanan na madaoh, tarbahensi do marpesta Paskah bani Jahowa.
11 Bani bulan dua ari sapuluh ompat malele bodari ma sidea marpesta Paskah; maningon panganon ni sidea ma ai marhasoman ruti na so niigaran pakon lowoh na mapaet.
12 Seng bulih tebaan ni sidea hunjai ronsi patarni, anjaha seng bulih ponggolhononkon holiholini age sada, maningon romban hubani ganup aturan ni Paskah do pestahonon ni sidea ai.
13 Tapi barang ise na pansing anjaha seng ipardalanan ia, hape langlang ia marpesta Paskah, maningon siapkononkon ia hun tongah-tongah ni bangsani, halani na so binoanni galangan bani Jahowa bani panorang na dob binuhul hinan; maningon manginsonoh hubani dousani ai.
14 Anggo adong panginsolat manginsolat i tongah-tongahnima, na sihol marpesta Paskah hubani Jahowa, maningon dalankononni do ai, romban hubani aturan pakon titah ni Paskah hinan; maningon sada do aturan bennima, bani halak dagang pakon bani pangisi ni tanoh in.”
15 Dob ai bani ari parjongjong ni lampolampo ai irongkob hombun ai ma lampolampo hasaksian ai, anjaha humbani bodari das ronsi patarni ai, sai ibabou ni lampolampo ai do ai songon rupa ni apuy idahon.
16 Sonai ma tongtong hombun ai manrongkob ia arian, anjaha bodari songon rupa ni apuy idahon.
17 Anjaha anggo manaik ma hombun ai hun babou ni lampolampo ai, bingkat ma halak Israel mardalan; anjaha ija marsaran hombun ai, lanjar ijai ma marsaran halak Israel.
18 Ase marguru hubani hata ni Jahowa do bingkat halak Israel, anjaha marguru hubani hata ni Jahowa do sidea marsaran; sadokah marsaran hombun ai i atasni lampolampo ai, marsaran ma sidea.
19 Anggo dokah marsaran hombun ai i atasni lampolampo ai, sai ihorjahon halak Israel do parentah ni Jahowa, seng bingkat.
20 Sipata piga-piga ari do hansa hombun ai i atasni lampolampo ai; jadi marsaran ma sidea mardomu hubani hata ni Jahowa, anjaha domu hubani hata ni Jahowa do sidea bingkat use.
21 Sipata humbani bodari das ronsi sogod do marsaran hombun ai; anggo manaik ma hombun ai sogod, bingkat ma sidea. Atap arian atap bodari anggo manaik ma hombun ai, bingkat ma sidea.
22 Anggo dua ari barang sabulan barang lobih hunjai, marsaran hombun ai i atasni lampolampo ai, marsaran ma halak Israel, lang bingkat sidea; tapi manaikkonsi hombun ai, bingkat ma sidea.
23 Romban hubani hata ni Jahowa do sidea marsaran anjaha romban hubani hata ni Jahowa do sidea bingkat use; idalankon sidea do na pinarentahkon ni Jahowa, romban hubani hata ni Jahowa marhiteihon si Musa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA