Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 TUHAN ngerana man Musa i gurun pasir Sinai i bas bulan si pemena tahun si peduaken kenca bangsa Israel nggo nadingken Mesir. Nina,
2 "I bas wari pesepulu empatken bulan enda, kenca matawari sundut, bangsa Israel arus mperingeti wari Paskah rikutken kerina peraturen ras cara-cara guna si e."
3 (Bil 9:2)
4 Emaka isuruh Musa bangsa e mperingeti Paskah,
5 jenari i bas berngi wari pesepulu empatken bulan si pemena, ibahanna me bage i gurun pasir Sinai. Kerina idalanken Israel payo kal bagi si ipedahken TUHAN man Musa.
6 Tapi lit i je piga-piga kalak si la bersih rikutken peraturen agama sabap nggo idadapna mait, janah la banci iperingetina Paskah i bas wari e. Emaka lawes ia ndahi Musa ras Harun
7 janah nina, "Kami la bersih sabap nggo idadap kami mait, tapi ngkai maka kami la iatanken nehken persembahen man TUHAN radu ras kalak Israel si debanna?"
8 Nina Musa erjabap, "Timai lebe seh aku ngaloken pedah i bas TUHAN nari."
9 TUHAN nuruh Musa,
10 ngataken man kalak Israel nina, "Ise i bas kam ntah pe kesusurenndu si la bersih erkite-kiteken njemak mait ntah pe sangana i bas perdalanen, tapi merincuh ia mperingeti Paskah e,
11 banci iperingetindu sada bulan kenca si e, i bas berngi wari pesepulu empatken bulan si peduaken. Rayakenlah e alu roti si la tama ragi ras gule-gulen si pagit.
12 Ula tadingken sitik pe pangan e seh erpagi-pagina janah ula penggelken sada pe tulan asuh-asuhen e. Peringetilah Paskah e sue ras kerina peraturen-peraturenna.
13 Tapi ise pe si bersih rikutken peraturen agama janah la ia i bas perdalanen si ndauh, adi la iperingetina Paskah e, lanai ikira bangsangKu, sabap la isehkenna persembahen man bangKu i bas paksa si nggo itentuken. Ia la banci lang ngenanami kiniseran erkiteken dosana e.
14 Adi sekalak asing si ringan i tengah-tengahndu merincuh mperingeti Paskah e, arus idalankenna sue ras kerina peraturen ras cara-carana. Undang-undangna seri man tep-tep kalak, bali man kalak Israel asli ntah kalak asing."
15 Kenca Kemah Perjumpan e nggo pajek, i bas wari e reh sada embun nutupisa. Tep-tep berngi, embun e teridah bagi api.
16 (Bil 9:15)
17 Adi nangkih kenca embun e, bangsa Israel nadingken inganna erkemah, jenari ipajekkenna ka kemahna i bas ingan embun e nusur ku teruh.
18 Bangsa e nadingken inganna erkemah rikutken perentah TUHAN, janah arah PerentahNa ka ia majekken kemahna. Kidekah embun e ringan denga i babo Kemah e, bangsa Israel tetap ringan i je.
19 Adi embun e ndekah ringan i babo Kemah e, ipatuhina TUHAN, la ia pindah ku ingan si deban.
20 Maun-maun embun e ringan i babo Kemah e piga-piga wari saja ngenca; aminna uga gia, ia tetap ringan i bas inganna erkemah e ntah pindah sue ras perentah TUHAN.
21 Maun-maun embun e ringan i je karaben nari seh erpagi-pagi ngenca, janah minter kalak e pindah nggo kenca embun e nangkih. Adi nangkih kenca embun e, minter kalak e pindah.
22 Aminna gia dua wari, sada bulan, sada tahun ntah pe dekahen asa e, adi embun e ringan denga i babo Kemah e, bangsa Israel la pindah, tapi adi nangkih kenca, pindah ia minter.
23 Ipajekkenna, ntah pe ipindahkenna kemahna alu patuh nandangi perentah si ibereken TUHAN arah Musa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA