Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini Jahowa ma hubani si Musa,
2 “Hatahon ma hubani halak Israel, anggo dong sada dalahi atap naboru na marbagah-bagah, ai ma bagah-bagah ni halak Nasir. Sihol mangondoskon dirini bani Jahowa,
3 maningon paholanganni dirini humbani anggur pakon siinumon na koras, seng bulih inumonni anggur na marraru pakon siinumon na marraru, anjaha seng bulih inumonni buah ni anggur atap panganonni buah ni anggur na baru binuat atap na dob pinahorah.
4 Sadokah panorang hanasironni, seng bulih panganonni age aha na pinauli humbani hayu anggur, age na humbani batuni, age na humbani pusukni.
5 Sadokah panorang bagah-bagah hanasironni ai, seng bulih dais pisou parsuhur hubani uluni, paima gok panorang ni hanasironni ai bani Jahowa, maningon pansing do ia, maningon paturutonni do ganjang jambulan ni uluni.
6 Sadokah panorang ni bagah-bagah ni hanasironni ai, seng bulih dohoranni halak na matei.
7 Age halani bapani barang inangni, anggini barang botouni pe, anggo matei sidea, seng bulih butakanni dirini, ai bagah-bagah hanasiron bani Naibatani do i atas uluni.
8 Sadokah panorang ni hanasironni ai, pansing do ia bani Jahowa.
9 Anjaha anggo matei sompong atap ise i lambungni, gabe butak ibahen ulu hanasironni ai, jadi maningon suhuronni do uluni; bani ari pangurasion, bani ari papituhon ma suhuronni ai.
10 Bani ari paualuhkon maningon boanonni dua kuhuy barang dua anak ni asas hubani malim, hu labah ni lampolampo partumpuan ai.
11 Hoseihononni malim ai ma sada bahen galangan situtungon, bahen pardearanni, halani na dob mardousa ia binahen ni bangkei ai. Anjaha maningon papansingonni do uluni bani ari na sasada ai.
12 Hoseihononni ma use panorang hanasironni ai bani Jahowa, anjaha boanonni ma homa sada anak ni biribiri na marumur satahun bahen galangan pardousaon. Tapi seng be hiraon anggo panorang na parlobei ai, halani na dob butak hanasironni ai.
13 Anjaha on do titah bani halak Nasir, ʻAnggo gok ma panorang hanasironni ai, boanon ma ia hu labah ni lampolampo partumpuan ai;
14 maningon boanonni do galangan hubani Jahowa, sada anak ni biribiri tunggal na marumur satahun na so martikas bahen galangan situtungon, sada anak ni biribiri boru-boru na marumur satahun na so martikas bahen galangan pardousaon, pakon sada biribiri tunggal na so martikas bahen galangan pardameian,
15 pakon sada raga ruti na so niigaran, kuei humbani itak na lumat na marlapu minak, pakon pahpah na so niigaran, na marlapu minak, ambah ni galangan sipanganon ampa galangan siinumon na mardomu hujai.
16 Dob ai boanon ni malim ai ma ai hun dohor hu lobei ni Jahowa anjaha hoseihononni ma ai bahen galangan pardousaonni pakon galangan situtungonni,
17 anjaha galangkononni ma biribiri tunggal ai bahen galangan pardameian hubani Jahowa, rap pakon raga na marisi ruti na so niigaran ai; maningon galangkonon ni malim ai do homa galangan sipanganon ai pakon galangan siinumon ai.
18 Dob ai maningon suhuron ni halak Nasir ai ma ulu hanasironni ai bani labah ni lampolampo partumpuan ai, anjaha buatonni ma jambulan ni ulu hanasironni ai, anjaha inahkon ma ai hubani apuy na i toruh ni galangan pardameian ai.
19 Anjaha buaton ni malim ai ma hae-hae lobei ni biribiri tunggal ai, anggo domma ilompah, ambahni ai sada kuei na so niigaran, anjaha inahkon ma ai hu tangan ni halak Nasir ai haduasi, dob isuhur jambulan hanasironni ai.
20 Dob ai tatangon ni malim ai ma ai bahen galangan sitatangon i lobei ni Jahowa; parbagianan na pansing ma ai bani malim, rap pakon tonton ni galangan sitatangon ai pakon hae-hae lobei ni na ginalangkon ai; dob salpu ai bulih ma minum anggur halak Nasir ai.ʼ
21 Ai ma titah bani halak Nasir na dob mambahen bagah-bagah; maningon domu hubani hanasironni galanganni ai bani, ambah ni na legan na boi ope galangkononni; romban hubani bagah-bagah na dob binagahkonni, maningon sonai do bahenonni, romban hubani titah ni hanasironni ai.”
22 Dob ai nini Jahowa ma hubani si Musa,
23 “Hatahon ma hubani si Aron pakon anakni ai, sonon ma pamasu-masunima bani halak Israel, hatahon hanima ma bani sidea,
24 ʻSai ipasu-pasu anjaha iramoti Jahowa ma ham.ʼ
25 Isondangkon Jahowa ma bohi-Ni bamu, anjaha maidop ma uhurni mangidah ham.
26 Idompakkon Jahowa ma bohi-Ni bamu, anjaha ibere ma damei bamu.ʼ
27 Sonai ma ampeihonon ni sidea goran-Ku bani halak Israel, anjaha pasu-pasuon-Ku ma sidea.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA