Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN ngotos Mosa
2 marengngagi atoran-atoran reya ka oreng Isra’il: Saneyap lalake’ otaba babine’ se andhi’ neyat odhi’a ngabdi ka PANGERAN malolo menangka oreng nazir,
3 ta’ olle ngenom aeng anggur otabana towa’. Ta’ olle ngenom nom-enoman apa’a bai se ekagabay dhari buwana anggur otabana wa’-buwa’an laenna. Oreng jareya ta’ olle ngakan buwana anggur se gi’ cengngar otabana se kerreng, otabana apa’a bai se asalla dhari bungkana anggur; bigina otabana konco’na balakka’ ta’ olle.
4 (6:3)
5 Saabidda ajalannagi neyadda, obu’na ta’ olle ketthok otaba ecokor. Saabidda jareya obu’na ban janggu’na kodu epanneng, epalanjang. Oreng jareya kodu ajalannagi neyadda sampe’ mare baktona pangabdiyanna aba’na ka PANGERAN malolo.
6 Obu’na jareya menangka tandha ja’ aba’na ngabdi ka Allah malolo. Saabidda jareya oreng jareya ta’ olle manajjis aba’na; ta’ olle nyemma’e mayyit, maske mayyidda eppa’na, ebuna otaba taretanna sakale.
7 (6:6)
8 Saabidda anyama oreng nazir, oreng jareya malolo ngabdi ka PANGERAN.
9 Mon obu’na oreng nazir se la eatorragi malolo ka PANGERAN daddi najjis lantaran oreng jareya badha e seddi’na oreng se mate dadagan, oreng jareya kodu anante’ pettong are abidda; saellana jareya obu’ ban janggu’na kodu ecokor, buru aba’na daddi berse pole.
10 E are se kapeng ballu’ oreng jareya kodu ngeba poter otaba pejji dhadhuwa’; mano’ jareya kodu egiba ka imam e labangnga Kemah Socce.
11 Mano’na se settong kodu eatorragi ka imam menangka kurban palebbaranna dusa, ban settonganna menangka kurban obbaran kaangguy maelang najjissa aba’na. E are jareya keya oreng jareya kodu ngatorragi pole obu’na ka PANGERAN malolo,
12 ban nganyare pamassra’anna aba’na menangka oreng nazir. Bakto se la kajalanan battal lantaran obu’na najjis. Menangka kurban tebbusanna kasala’anna oreng jareya kodu ngatorragi budhu’na dumba se gi’ aomor sataon.
13 Mon oreng nazir la mare ngessa’agi neyadda, pas kodu mabadha opacara. Oreng jareya kodu eaterragi ka adha’anna labangnga Kemah Socce
14 sambi ngeba tor-ator ka PANGERAN aropa ebin tatello’ se tadha’ calena: budhu’na dumba lake’ se aomor sataon kaangguy kurban obbaran, budhu’na dumba babine’ se aomor sataon kaangguy kurban pangamponanna dusa, ban dumba lake’ kaangguy kurban salameddan.
15 Oreng jareya kodu ngatorragi keya roti se ta’ eragi’i sacettheng, iya areya roti se kandel se ekagabay dhari teppong se paleng bagus se ecampor bi’ mennya’ jaitun, ban jajan se ebulidi mennya’ jaitun. Laen dhari jareya oreng buru kodu ngatorragi keya kurban sasajin ban kurban aeng anggur.
16 Imam kodu ngeba jareya kabbi ka ajunanna PANGERAN, pas ngatorragi kurban pangamponanna dusa sarta kurban obbaran.
17 Kurban roti se sacettheng gella’ kodu eatorragi epabareng ban dumba lake’ gella’ menangka kurban salameddan. Bariya keya kurban sasajin ban kurban aeng anggur gella’ kodu eatorragi ka PANGERAN.
18 Oreng nazir jareya kodu nyokor obu’na e labangnga Kemah Socce, obu’ jareya kodu eontallagi ka dhalem apoy kennengnganna kurban salameddan se teppa’na eobbar.
19 Saellana jareya, imam ngala’ pokang adha’na dumba lake’na se la eola, laju esaba’ ka tanangnga oreng nazir jareya etoro’e roti se kandel sarta jajan se dhari cettheng gella’ settong ebang.
20 Saellana jareya imam kodu ngatorragi kakanan jareya menangka tor-ator ka PANGERAN; jareya bagiyan se socce se daddi bagiyanna imam, salaenna dhadha ban pokangnga dumba lake’ se menorot atoran pajat daddi bagiyanna imam. Buru saellana jareya oreng nazir buru olle ngenom aengnga anggur.
21 Jareya atoranna kaangguy oreng nazir; tape mon oreng nazir ajanjiyagi kurban se ngalebbi’i rat-saradda neyadda, oreng jareya kodu pateppa’ ajalannagi janji jareya.
22 Dhabuna PANGERAN ka Mosa,
23 "Kabala ka Harun ban na’-ana’na mon aberkadi oreng Isra’il soro ngangguy ca’-oca’ kantha reya:
24 Moga-moga PANGERAN aberkadana ban ajaga’a ba’na.
25 Moga-moga PANGERAN saeya ban lamba’a ka ba’na.
26 Moga-moga PANGERAN bellasa ban aparenga kataremtemman ka ba’na.
27 Mam-imam kodu nyebbut Tang nyama e bakto aberkadi oreng Isra’il. Mon se kantha jareya ejalannagi, reng-oreng Isra’il bi’ Sengko’ eberkadana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA