Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini Jahowa ma hubani si Musa bani pamah Moab, dohorhon Jordan, tontang ni Jeriko.
2 “Hatahon ma hubani halak Israel, ase ibere sidea huta humbani bagian siteanon ni sidea ai hubani halak Levi bahen ianan ni sidea, anjaha maningon bereonmu do sampalan hubani halak Levi inggot ni huta ai ganup.
3 Bani sidea ma sagala huta ai bahen ianan ni sidea, anjaha sampalanni ai bani pinahan ni sidea ampa bani pinahan ni sidea na marbagei-bagei ai.
4 Sampalan ni huta sibereonnima hubani halak Levi ai maningon sibaron do humbani darat ni dingding ni huta ai saribu asta inggot.
5 Anjaha maningon sibaronnima darat ni huta ai, hampit hapoltakan dua ribu asta, hampit dangsina dua ribu asta, hampit hasundutan dua ribu asta pakon hampit utara dua ribu asta, ase huta ai do i parsitongahanni; ai ma gabe sampalan ni huta ai bani sidea.
6 Ia huta sibereonnima hubani halak Levi, ai ma huta haporusan na onom ai, ai ma sibereonnima bahen haporusan ni sibunuh jolma; ambah ni ai maningon bereonnima ope hubani sidea ompat puluh dua huta.
7 Jadi buei ni ganup huta sibereonnima hubani halak Levi ai ma ompat puluh ualuh huta rap pakon sampalanni.
8 Ia pasal huta sibereonnima humbani parbagianan ni Israel, bueinan ma ai buat humbani marga na buei parbagiananni, anjaha otikan humbani na otik parbagiananni; ganup marga marguru hubani parbagianan na jinaloni, bereonni humbani hutani hubani halak Levi.”
9 Dob ai nini Jahowa ma hubani si Musa,
10 “Hatahon ma hubani halak Israel, anggo domma idipari hanima Jordan masuk hu tanoh Kanaan,
11 maningon papuligonnima ma bennima huta bahen huta haporusan bennima, ase tarbahen maporus hujai halak na mambunuh jolma, na so iutuskon,
12 ase haporusan ma huta ai bennima dompak jolma siparlulu, ase ulang matei halak sibunuh jolma ai anggo lape jongjong ia i lobei ni tumpuan ase iuhumi.
13 Anjaha humbani huta na binerenima ai, maningon onom ma ai gabe huta haporusan bennima.
14 Maningon tolu huta ai bereonnima i dipar Bah Jordan, tolu huta nari bereonnima i tanoh Kanaan, bahen huta haporusan.
15 Na onom huta ai gabe haporusan ma ai bani halak Israel, age bani halak silopah horbou, age bani halak dagang na i tongah-tongahnima, ase tarbahen maporus hujai barang ise na mamunuh jolma na so niutuskonni.”
16 Tapi anggo ibunuh ia marhitei parugas bosi, pala matei, sibunuh jolma ma ia tongon, maningon marutang hosah do pamunuh ai.
17 Anjaha anggo ibogbog ia marhitei batu na i tanganni, na boi mambahen matei, gabe matei ia, sibunuh jolma ma ia tongon, maningon marutang hosah do pamunuh ai.
18 Barang anggo ibogbog ia marhitei palu-palu hayu, na boi mambahen matei, gabe matei ia, sibunuh jolma ma ia tongon, maningon marutang hosah do pamunuh ai.
19 Maningon jolma siparlulu ai sandiri mamunuh halak pamunuh ai; anggo jumpahsi ia, bulih do bunuhonni ia.
20 Barang anggo itenju ia halani domdom ni uhurni, barang iutuskon manggijigsi gabe matei ia,
21 barang itompas ia sanggah ibagas partinggilan, pala matei ia, maningon marutang hosah panompas ai, ai sibunuh jolma do ia; maningon jolma siparlulu ai mamunuh halak pamunuh ai, anggo jumpahsi ia.
22 Tapi anggo sompong itenju ia seng halani partinggilan, barang igijigkon atap aha bani, na so niutuskonni,
23 barang igijigkon batu, na boi mambahen matei, anjaha idabuhkon ai bani, tapi lang ididah ia, gabe matei ia, tapi seng dong partinggilanni hinan pakonsi anjaha seng isurahon hinan hamagouanni ai;
24 maningon kuria in ma na manguhumi jolma pamunuh ai pakon jolma siparlulu ai, romban hubani uhum nongkan;
25 maningon kuria in paluahkon jolma pamunuh ai hun tangan ni jolma siparlulu ai, maningon kuria in mangarahkonsi mulak hu huta haporusanni hinan; maningon ijai ma ia marianan, paima matei sintua ni malim, na dob niminakan marhitei minak na mapansing.
26 Tapi anggo luar jolma pamunuh ai salpu hun parbalogan ni huta haporusanni ai hinan,
27 anjaha jumpah jolma siparlulu ai ia i darat ni parbalogan ni huta haporusanni ai, gabe ibunuh siparlulu ai halak sipamunuh ai, seng marutang daroh ia ijai.
28 Ai maningon tading ia ibagas huta haporusanni ai, paima matei sintua ni malim ai, tapi dob matei sintua ni malim ai, bulih ma jolma pamunuh ai mulak hu tanoh parbagiananni hinan.
29 Ganupan in maningon gabe titah pakon aturan ma bennima marsundut-sundut bani ganup huta ianannima.
30 Barang ise na mamunuh jolma, maningon bunuhon do pamunuh ai, dob nabogei hata ni na manaksihon; tapi anggo pitah sahalak do na manaksii, seng bulih marutang hosah sada halak uhumon.
31 Seng bulih jaloonnima duit partobus ni hosah ni halak sibunuh jolma, na maningon marutang hosah hinan maningon bunuhon do ia.
32 Anjaha seng bulih jaloonnima duit partobus humbani jolma na dob maporus hu huta haporusanni, laho palopaskonsi mulak marianan hu tanohni hinan, i lobei ni parmatei ni sintua ni malim ai.
33 Ulang ma butaki hanima tanoh na iiankonnima in; ai daroh do na pabutakkon tanoh in, anjaha lang jumpah pardearan tanoh in, halani daroh na dob niduruskon ijai, sobali marhitei daroh ni jolma na manduruskon ai.
34 Halani ai ulang ma butaki hanima tanoh na niianannima in, ai Ahu do na marianan i tongah-tongah ni ai, ai Ahu, Jahowa do na marianan i tongah-tongah ni halak Israel.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA