Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E tana lapang Mo’ab, e penggirra Songay Yordan, e seddi’anna kottha Yerikho, PANGERAN adhabu ka Mosa,
2 "Kabala ka bangsa Isra’il, ja’ dhari tana sangkolan se etarema’a reng-oreng jareya, badha tha-kottha ban talon e kangan kacerra se kodu ebagi ka oreng Lewi, sopaja oreng Lewi jareya ngennenga neptep e jadhiya.
3 Tha-kottha jareya daddi andhi’na oreng Lewi me’ olle ekagabay kennengnganna. Talon e kangan kacerra kaangguy kaparlowanna ebin sarta ban-keban peyara’anna.
4 Talon jareya rajana, lanjangnga ban lebarra padha pa’ ratos saeket meter, eokor molae dhari pagar alassa kottha.
5 Daddi tana andhi’na oreng Lewi reya masagi empa’, se okoranna saneyap penggirra sangang atos meter; kotthana badha e nga’-tengnga’anna.
6 Oreng Lewi jareya kodu eberri’i kottha suaka bannya’na nem-ennem menangka kennengnganna sowakana oreng se ta’ etengnget mate’e oreng laen. Laen dhari jareya oreng Lewi jareya kodu eberri’i keya kottha laenna pa’ polo dhuwa’ meggi’
7 ban talonna. Daddi kabbi badha pa’ polo ballu’ kottha kaangguy oreng Lewi.
8 Bannya’na tha-kottha Lewi e dhalem saneyap baba kakobasa’anna suku Isra’il kodu etantowagi menorot bannya’na kottha ban rajana baba jareya."
9 PANGERAN makon Mosa
10 manapa’ dhabuna ka bangsa Isra’il, "Mon ba’na la entas Songay Yordan ban la maso’ ka nagara Kana’an,
11 ba’na kodu mele tha-kottha se egabaya kottha suaka, se ekennenga kagabay sowakana oreng se ta’ etengnget mate’e oreng laen.
12 E tha-kottha jareya, oreng buru aman dhari la-balana oreng se ekenneng pate’e se malessa sake’ atena. Sabab oreng se earane mate’e oreng laen, ta’ olle epate’e mon parkarana gi’ ta’ epareksa e pangadilan omom.
13 Pele kottha suaka nem-ennem,
14 se tatello’ e temorra Songay Yordan ban se tatello’na e tana Kana’an.
15 Kottha se nem-ennem jareya daddi kottha suaka monggu ka ba’na, oreng Isra’il, ban oreng manca se dhateng ka nagara Isra’il otaba se neptep e nagarana ba’na. Sapa’a bai se ta’ etengnget mate’e oreng, olle buru ka sala settonga kottha jareya.
16 Tape mon oreng mate’e oreng ngangguy sanjata besse otaba bato otaba kaju, jareya nyamana etengnget mate’e oreng; oreng jareya sala, ban kodu eokom mate.
17 (35:16)
18 (35:16)
19 La-bala semma’na oreng se epate’e olle ngokom mate oreng gella’. Mon oreng se mate’e jareya etemmo, la-bala semma’na oreng se epate’e olle mate’e oreng gella’.
20 Mon oreng baji’ ka oreng laen, pas abantengngagi otaba ngotep oreng jareya sampe’ mate,
21 otabana ngothem oreng jareya sampe’ mate, oreng jareya nyamana mate’e oreng. Oreng jareya sala ban kodu eokom mate. La-bala semma’na oreng se epate’e olle ngokom mate oreng gella’. Mon oreng se mate’e jareya etemmo, la-bala semma’na oreng se epate’e olle mate’e oreng jareya.
22 Tape olle daddi badha oreng se ta’ etengnget mate’e oreng se ta’ ekabaji’i, olle daddi polana abantengngagi otabana ngothem oreng jareya sampe’ mate.
23 Otabana olle daddi badha oreng se ta’ ngabas magaggar bato, batona ngenneng ka oreng sampe’ oreng jareya mate, mangkana oreng jareya banne mosona, ban oreng se magaggar bato jareya ta’ amaksod macalaka’a oreng jareya.
24 E dhalem parkara se kantha jareya kodu ebadha’agi rapadda ommat se kodu ngadili antarana oreng se daddi lantaranna matena oreng laen ban oreng se malessa patena oreng se mate.
25 Rapadda ommat jareya kodu nolong oreng se ta’ etengnget mate’e oreng jareya, se eara balana oreng se mate gella’. Oreng jareya kodu egiba abali ka kottha suaka kennengnganna sowakana, ban kodu neng e jadhiya sampe’ oreng se e bakto jareya daddi Imam Agung la mate; buru saellana jareya olle mole ka kampongnga. Tape mon oreng jareya kalowar dhari kottha sowaka kennengnganna sowakana, pas etemmo sarta epate’e bi’ la-balana oreng se mate gella’, oreng se males pate jareya nyamana banne mate’e oreng.
26 (35:25)
27 (35:25)
28 (35:25)
29 Atoran-atoran reya kodu etoro’ bi’ ba’na sarta toronanna ba’na, e dhimma’a bai kennengnganna.
30 E dhalem parkara mate’e oreng, oreng se earane mate’e, olle enyata’agi sala coma mon ekenneng bukteyagi bi’ sakse kadhuwa otaba lebbi. Mon saksena pera’ kasorang, ta’ cokop ekagabay bukte ja’ panyangka jareya bendher.
31 Oreng se mate’e oreng kodu eokom mate. Okoman jareya ta’ olle etebbus ban pesse.
32 Mon oreng buru ka kottha sowaka, ja’ sampe’ oreng jareya eedine aberri’ pesse sopaja olleya mole ka bengkona sabellunna Imam Agung mate.
33 Mon sampe’ kantha jareya, ba’na nyamana macemmer tana se ekennengnge. Mate’e oreng reya lalakon se macemmer nagara; daddi tadha’ cara laen kaangguy maberseya nagara jareya kajabana nyabut nyabana oreng se mate’e oreng jareya.
34 Ja’ sampe’ ba’na macemmer tana se ekennengnge, sabab Sengko’ PANGERAN, ban Sengko’ badha e antarana bangsa Isra’il."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA