Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri lappara’ Moab, ri biring Binanga Yordan, ri ampi’na kota Yerikho, Nakana Batara mae ri Musa,
2 "Pabattui mae ri bansa Israel angkanaya anjo butta pisaka lanatarimaya ke’nanga, nia’ siapa are kota siagang parang ruku’ niaka ri tammulilina musti napassareangi ke’nanga mae ri tu Lewi sollanna akkulle ke’nanga ammantang anjoreng.
3 Anjo kota-kotaya a’jari napatangi tu Lewi untu’ pammantangnganna ke’nanga. Parang ruku’ niaka ri tammulilina ke’nanga iamintu untu’ sikontu olo’-olo’ piarana ke’nanga.
4 Luara’na anjo parang rukuka iamintu 450 metere’ battu ri tembo’ kotaya attammulili.
5 Jari anjo daerana tu Lewi assulapa appaki, 900 metere’ luara’na tasse’rea sa’ri, nampa kotana ammantang ri tangnga-tangngana anjo paranga.
6 Musti nupassareangi mae ri tu Lewi annang kota untu’ a’jari palarianna tau ammunoa mingka tena nakunjungi. Pantaranganna anjo musti nisare tongi tu Lewi patampulo anrua kota maraengannaya,
7 siagang parang ruku’na. Jari yangasenna nia’ patampulo assagantuju kota untu’ tu Lewi.
8 Ia jaina kota-kotana tu Lewi lalang ri massing daerana suku-suku Israel musti niatoroki situru’ jaina anjo kotaya siagang lompona anjo daeraya."
9 Nasuroi Batara anjo Musa
10 ampabattui mae ri bansa Israel anne kana-kanaya, "Punna le’ba’ mako a’limbang ri Binanga Yordan siagang antama’ ri pa’rasangang Kanaan,
11 musti nupattantui kota-kota palarianga, sollanna punna nia’ tau ambunoi paranna tau natena nakunjungi, akkullei lari mange anjoreng.
12 Anjo taua laamangi anjoreng ri kota-kotaya battu ri larrona bija-bijanna anjo tau mate nabunoa, eroka a’balasa’. Nasaba’ anjo tunitudua ambunoi paranna tau takkulleai nibuno punna tenapa nale’ba’ niparessa parkarana ri pangadelanna tau jaia.
13 Pattantui anjo annanga kota palariang,
14 tallu ri bageang rayana Binanga Yordan nampa tallu todong ri butta Kanaan.
15 Anjo annanga kotaya a’jari kota palariannu, ikau tu Israel, siagang mae ri bansa maraeng battu-battua yareka ammantang tulia ri tangnga-tangnganu. Manna inai, punna le’baki nabuno paranna tau mingka tena nakunjungi, akkullei lari mange ri kalase’renna anjo kotaya.
16 Mingka punna nia’ tau ammake bassi tarang yareka kayu untu’ ambunoi paranna tau, anjo tau kammaya pabuno tau; salai siagang musti nihukkung matei.
17 (35:16)
18 (35:16)
19 Bija ma’reppese’na anjo tau mate nabunoa akkullei nagaukang anjo hukkungang matea. Punna nagappai anjo tau ammunoa, akkullei nabuno.
20 Punna nia’ tau angkabirisi paranna tau, nampa napatappasaki na nabuno yareka nasambilai apa-apa namate,
21 yareka naba’ji siagang panja’guru’, anjo taua pabunoi; salai siagang musti nihukkung matei. Bija ma’reppese’na anjo tau mate nabunoa akkullei nagaukang anjo hukkungang matea. Punna nagappa anjo tau ammunoa, akkullei nabuno.
22 Mingka akkulle tongi angkanaya nia’ tau ambunoi paranna tau iamintu tenaya nakabirisi, lanri tena nakunjungi, apaka napatappasaki yareka nasambilai apa-apa.
23 Yareka gassingka tanacinikai paranna tau na teai musunna, nammuang batu nampa natuju paranna tau sa’genna mate, kammayatompa tena nania’ ri atinna ero’ ampitujui bala anjo paranna tau.
24 Punna kammai anjo parkaraya, musti asse’rei ummaka nampa naadeli anjo tau ammunoa siagang bijanna anjo tau matea eroka a’balasa’.
25 Anjo umma’ asse’rea musti najagai anjo tau tenaya nakunjungi ammuno battu ri pa’balasa’na bija-bijanna anjo tau matea. Anjo taua musti nierangi ammotere’ mange ri kota palarianga, iamintu tampa’ palarianna. Musti ammantangi anjoreng sa’genna matemo anjo tau a’jari Imang Malompoa anjo wattua; punna le’ba’mi anjo nampami akkulle ammotere’ mange ri kamponna. Mingka punna nabokoi anjo kota tampa’ palarianna, nampa nigappa siagang nibuno ri bijanna anjo tunibunoa, anjo panggaukang kammaya teai pammunoang.
26 (35:25)
27 (35:25)
28 (35:25)
29 Anjo paratorang-paratorang kammaya nipakei untu’ ikau ngaseng siagang untu’ jari-jarinu, manna pole kemaeko ammantang.
30 Lalang kara-kara pammunoanga, anjo tau nitudua salaku tau ammuno, iapa nakkulle nikana salai siagang akkulle nihukkung mate punna akkullei nipa’nassa buttina ri rua yareka la’bi tau sa’bi. Punna se’reji sa’bi tanggannakkai untu’ a’jari butti angkanaya kammatojengi anjo tuduhanga.
31 Tau ammunoa musti nihukkung matei. Tena nakkulle nasambei anjo hukkunganga siagang doe’.
32 Punna nia’ tau lari mange ri kalase’renna kota palarianga, tena nakkulle nipa’biang assare doe’ sollanna akkulle ammotere’ mange ri balla’na lalang tenanapa namate Imang Lompoa.
33 Punna nugaukangi anjo kammaya, nura’massimi butta nupammantangngia. Anjo pammunoanga nara’massi pa’rasanganga; jari tena cara maraeng untu’ antangkasi anjo pa’rasanganga pantaranganna angkanaya musti niallei nyawana anjo tau ammunoa.
34 Teako ra’massi butta nupammantangngia, lanri iNakkemi Batara, siagang niaka’ ammantang ri tangnga-tangngana bansa Israel."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA