Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas bulan si pemena kerina perpulungen Israel seh i bas taneh si mesawang, Sin gelarna, jenari ibahanna inganna erkemah i Kades. I je me Miriam mate ras ikuburken.
2 La lit lau i bas inganna erkemah e, emaka pulung bangsa e ngkeleweti Musa ras Harun.
3 Janahna jungut-jungut nina, "Ulin kin min mbarenda kami mate i lebe-lebe Kemah TUHAN radu ras teman-teman kami kalak Israel.
4 Ngkai maka kami ndarat ku taneh si mesawang enda? Ntah gelah kami mate ras asuh-asuhen kami kin atendu?
5 Ngkai maka ibabandu kami ndarat i Mesir nari ku bas ingan si mesera enda? Kai pe la lit turah i jenda. La lit gandum, la lit buah ara, la lit buah anggur, la lit buah galiman. Lebih asa si e, lau pe la lit man inemen!"
6 Lawes Musa ras Harun i bas jelma si enterem e nari, jenari tedis ia i bas dalan bengket ku Kemah e. Erjimpuh ia duana, ayona seh ku taneh, jenari sinalsal terang TUHAN teridah man bana.
7 Nina TUHAN man Musa,
8 "Buatlah ciken si lit i lebe-lebe Peti Perpadanen, jenari pepulung kam ras Harun bangsa e kerina. I lebe-lebena kerina ngeranalah kam kempak batu si ah, gelah reh lau ergeruhguh i bas nari. Alu dalan si enda iberekenndu lau man bangsa e i bas batu nari, man inemenna ras man asuh-asuhenna."
9 Lawes Musa, ibuatna ciken ndai sue ras si nggo ikataken TUHAN.
10 Ipepulung Musa ras Harun kerina perpulungen i lebe-lebe batu e, jenari nina Musa, "Begiken, o kam si tukang berontak! Terpaksa kin ipedarat kami man bandu lau i bas batu enda nari?"
11 Kenca bage iangkat Musa ciken ndai, ipaluna batu e dua kali alu ciken e, jenari mbincar me lau mbelin ergeruhguh ndarat, emaka kerina bangsa e ras asuh-asuhen minem.
12 Tapi irawai TUHAN Musa ras Harun nina, "Erkite-kiteken la cukup kinitekenndu ernalem i bas kuasangKu si badia i lebe-lebe bangsa Israel, emaka la banci babandu ia bengket ku negeri si nggo Kupadanken e."
13 Enda jadi i Meriba, ingan kalak Israel jungut-jungut man TUHAN, i je IcidahkenNa man bangsa emaka Ia badia.
14 Isuruh Musa piga-piga kalak persuruhen i Kades nari njumpai raja Edom. Nina persuruhen ndai, "Berita enda eme i bas kade-kadendu nari, i bas suku-suku kalak Israel. Nggo itehndu uga kiniseran si nggo inanami kami,
15 uga nini-nini kami lawes ku Mesir, i ja kami ndekah tading. Seh kal jahatna perbahanen kalak Mesir man nini-nini kami bage pe man kami.
16 Emaka nderkuh kami man TUHAN mindo penampat. IdengkehkenNa penderkuh kami jenari IsuruhNa sada malekat si maba kami ndarat i bas Mesir nari. Genduari kami i Kades, sada kuta i bas perbalengen daerahndu.
17 Ngarap kami gelah iberendu kami mentas arah tanehndu. Kami ras asuh-asuhen kami labo pagi nilah i bas dalan e nari ntah pe lawes ku bas jumandu ntah ku bas kebun anggurndu, janah labo inem kami lau sumurndu. Kami tetap i bas dalan si mbelin seh kami nggo ndarat i bas daerahndu nari."
18 Tapi erjabap kalak Edom nina, "La ibere kami kam mentas arah negeri kami. Adi icubakenndu kin, la banci la reh kami ndarat, maka iserang kami kam."
19 Nina bangsa Israel, "Tetap nge kami arah dalin si mbelin, janah adi iinem kami, ntah iinem asuh-asuhen kami laundu, igalari kami gia pagi. Mentas saja ngenca ate kami."
20 Iulihi kalak Edom sekali nari nina, "La ibere kami!" Jenari ndarat ia alu tentera si megegeh, guna nerang kalak Israel.
21 Erkite-kiteken la ibere kalak Edom kalak Israel mentas arah daerahna, nilah kalak Israel jenari lawes ia arah dalin si deban.
22 Kerina perpulungen Israel berkat i Kades nari jenari seh ia i Deleng Hor,
23 i perbalengen Edom. I je nina TUHAN man Musa ras Harun.
24 "Harun labo bengket ku bas negeri si nggo Kupadanken merekenca man bangsa Israel; mate ia sabap duana kam ngelawan perentahKu i Meriba.
25 Babalah Harun ras anakna Eleasar nangkih ku Deleng Hor,
26 jenari tangtangilah jubah-jubah keimamen Harun i je, pakeken kempak Eleasar. I je me Harun mate."
27 Ibahan Musa bagi si nggo iperentahken TUHAN. Lawes ia teluna ku das Deleng Hor, janah kerina perpulungen e natapsa.
28 Emaka itangtangi Musa kerina jubah-jubah keimamen Harun, jenari ipakekenna kempak Eleasar. I das deleng e mate Harun, jenari Musa ras Eleasar mulihken ku teruh.
29 Kenca iteh perpulungen e kerina maka Harun nggo mate, itangisina ia telu puluh wari dekahna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA