Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E bulan settong bangsa Isra’il la napa’ kabbi ka ra-ara Zin; bangsa jareya pas aenggun e Kades. Miriyam mate e jadhiya, laju ekoburragi e jadhiya keya.
2 E settong bakto reng-oreng Isra’il ta’ nemmo aeng pole, laju padha agaribbung e seddi’na Mosa ban Harun,
3 sarta pas padha pek-ngacepek, oca’na, "Lebbi becce’ ja’ sakenga kaula padha mate e ajunanna PANGERAN asareng ban tan-taretan se laen.
4 Aponapa kaula bi’ sampeyan me’ egiba ka ra-ara paneka? Daddi kaula ban ebin kaula epamateya e ka’iya?
5 Aponapa kaula bi’ sampeyan me’ egiba dhari Messer ka kennengngan se ta’ ekenneng men-tamenne paneka? E ka’iya tadha’ gandum, tadha’ bungkana ara, anggur otabana dalima. La’-mala’ tadha’ aeng se eenoma balakka’!"
6 Mosa ban Harun laju nyengla dhari kennengnganna oreng se bannya’ jareya, laju meyos ka adha’anna Kemah Socce. E jadhiya laju asojud ka tana, saellana jareya pas badha sonar se nandha’agi ja’ PANGERAN rabu ka jadhiya.
7 Dhabuna PANGERAN ka Mosa,
8 "Kala’ tongkedda ba’na se e adha’anna Petthe Parjanjiyan rowa, ba’na ban Harun pas makompol ommat rowa. E adha’anna reng-oreng jareya ba’na nyoro ka gumo’ e dhissa’ rowa sopaja makalowara aeng. Aeng se kalowar dhari gumo’ jareya ekenneng enom ommat Isra’il ban ebinna."
9 Mosa mondhut tongket jareya menorot se epakonnagi PANGERAN.
10 Mosa ban Harun makompol ommat Isra’il kabbi ka adha’anna gumo’ gella’. Dhabuna Mosa, "E, reng-oreng se daraka, mara edhingngagi! Apa sengko’ ban Harun kodu makalowar aeng dhari gumo’ reya kaangguy kaparlowanna ba’na?"
11 Mosa laju ngangka’ tekkenna, pas epokollagi ka gumo’ bato gella’ dhu kale. Dhari gumo’ jareya pas nancel aeng se pas eenom bi’ reng-oreng Isra’il ban ebinna.
12 Tape PANGERAN nyala’agi Mosa ban Harun, dhabuna, "Sarrena ba’na ta’ parcaja ka Sengko’ kaangguy noduwagi Tang kakobasa’an e adha’anna bangsa Isra’il, ba’na bakal ta’ noro’a mimpin ommat Isra’il maso’ ka nagara se ejanjiyagi Sengko’ ka bangsa jareya."
13 Jareya se enyamae somber Meriba, kennengnganna oreng Isra’il ango’ngo’an ka PANGERAN ban kennengnganna PANGERAN noduwagi kakobasa’anna ka bangsa Isra’il.
14 Dhari Kades Mosa ngerem otosan ka rato Edom. Otosan jareya mator, "Abdidalem sakanca ka’dhinto otosan dhari bangsa Isra’il. Tantona junandalem ngagali kasossa’anna bangsa Isra’il.
15 Bangatowana bangsa Isra’il ngalle ka Messer terros neptep e ka’dhissa’ kantos ataonan abittepon. Bangsa Isra’il eseksa sareng bangsa Messer,
16 daddi laju aserro ka PANGERAN. PANGERAN meyarsa serrona ommattepon, laju ngotos malaekadda. Malaekat gapaneka se mimpin bangsa Isra’il kalowar dhari Messer. Samangken bangsa Isra’il ampon napa’ ka Kades, kottha se badha e batessa babaepon junandalem.
17 Abdidalem epakon nyo’onnagi edi ka junandalem, bangsa Isra’il terro ngamponga lebat e nagaraepon junandalem. Reng-oreng Isra’il sareng ebinna ta’ lebada e kennengngan se banne lorong, sareng ta’ lebada e gal-teggal otaba e bun-kebbun anggur, jugan ta’ ngenoma dhari mor-somor kaagunganna junandalem. Bangsa abdidalem namong ngamponga lebat e lorong raja, kantos kalowar dhari batessepon nagara ka’dhinto."
18 Saodda oreng Edom, "Sampeyan ta’ olle lebat e baba paneka. Mon maksa sampeyan ebasbasa bi’ peddhang kabbi."
19 Ca’na oreng Isra’il, "Bangsa kaula coma lebada e lorong rajana, mon oreng Isra’il otaba ebinna badha se ngenom aengnga sampeyan, ebajarana. Poko’na bangsa kaula nyo’ona edin ngamponga lebat."
20 Oreng Edom ngoca’ pole, "Ampon, ta’ olle!" Oreng Edom pas kalowar ngeba tantara se kowat merrangana bangsa Isra’il.
21 Daddi oreng Isra’il laju abali, nyare jalan laen, sabab bi’ oreng Edom ta’ ebagi lebat e nagarana.
22 Sakabbinna ommat Isra’il mangkat dhari Kades pas dhapa’ ka Gunong Hor,
23 e batessa Edom. E jadhiya PANGERAN adhabu ka Mosa ban Harun,
24 "Harun ta’ bisa noro’ maso’ ka nagara se bi’ Sengko’ ejanjiyagi ka bangsa Isra’il; polana ba’na ban Harun ta’ atoro’ ka Tang parenta e seddi’anna somber Meriba. Sateya Harun bakal mateya.
25 Kassa’ olok Harun ban ana’na se anyama Eleyazar, pas giba ongga ka Gunong Hor.
26 Sanapa’na dha’ essa’, pangangguyya Harun pas bukka’, pobu ka Eleyazar. Harun bakal mateya e jadhiya."
27 Mosa alampa’agi papakonna PANGERAN buru. Se katello jareya pas ongga ka Gunong Hor esakseyagi bi’ sakabbinna ommat Isra’il.
28 Mosa mokka’ pangangguyya Harun, pas epobu ka Eleyazar, pottrana. Harun seda e konco’na gunong jareya, dineng Mosa ban Eleyazar pas toron.
29 Reng-oreng Isra’il saellana tao ja’ Harun seda laju padha noduwagi kasossa’anna atena tello polo are abidda.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA