Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bangsa Israel mulai jungut-jungut man TUHAN kerna kesusahen-kesusahenna. Tupung ibegi TUHAN si e, nembeh AteNa jenari IpesusurNa api ku bangsa e. Api e gara i tengah-tengahna janah meseng ibahanna tepi ingan erkemah e.
2 Emaka nderkuh bangsa e mindo penampat man Musa; ertoto ia man TUHAN jenari minter nimpet api ndai.
3 Erkite-kiteken si e ingan ndai ibahan gelarna Taberah, sabap i bas ingan e gara api TUHAN i tengah-tengah bangsa Israel.
4 Lit piga-piga kalak asing ikut i bas perdalanen ras bangsa Israel e. Lanai kal lang-lang rincuhna ia man daging, janah bangsa Israel jine pe nggo mulai jungut-jungut nina, "Lit kin min daging man panganta!
5 Adi i Mesir biasa kita rate-ate man nurung, janah la nukur pe. Ma siinget denga kin biasa lit i bas kita cimen, mandike, pere, pia, lasuna?
6 Tapi genduari nggo kote kita kerina. Kai kal pe la lit man panganen, kai pe la lit seakatan manna enda saja tep-tep wari!"
7 (Manna seri ras buah jera, rupana mbentar megersing.
8 Manna e ndabuh i bas ingan erkemah e berngi radu ras remang. Pepagina bangsa Israel lawes pepulungsa, igilingna ntah pe itutuna jadi tepung, jenari itasakkenna, ibahanna jadi roti si menipes. Nanamna bali ras nanam roti si ipanggang ras minak saitun.)
9 (Bil 11:8)
10 Ibegi Musa kerina kalak ndai jungut-jungut janah tedis pulung-pulung i bas dalan bengket ku bas kemahna. Lesek kal ate Musa sabap nembeh ate TUHAN man kalak ndai kerina.
11 Emaka nina Musa man TUHAN, "Ngkai maka bage la ulina PerbahanenNdu man bangku? Ngkai maka la AteNdu keleng man bangku? Ngkai maka IsuruhNdu aku ertanggung jawab kerna kerina bangsa enda?
12 Labo aku si njadiken ia ntah pe si mupus ia! Ngkai maka IsuruhNdu aku ngerawat ia ras ngangkip-ngangkip ia desken anak-anak, terus ku bas taneh si IpadankenNdu ras nini-ninina?
13 I ja nge terbuat aku daging cukup man kalak enda kerina? Denge-denge ia lalap mindo daging.
14 I ja nge terurus aku ia kerina! Mberatsa kuakap bage!
15 Adi bagenda kin PerbahanenNdu man bangku, mekuahlah AteNdu, bunuh lah aku, gelah lanai padah kugengken PerbahanenNdu si kejam e."
16 Nina TUHAN man Musa, "Pepulunglah pitu puluh kalak dilaki si ihamati kalak selaku peminpin-peminpin bangsa e. Baba ia kerina ngadap man bangKu i bas Kemah Perjumpan e, janah suruh ia kerina tedis i deherndu.
17 Nusur Aku ku je, jenari ngerana Aku ras kam, janah Kubuat deba kuasa si nggo Kubereken man bandu jenari Kubereken man bana kerina. Kenca bage nggo banci isampatina kam ngepkep bangsa enda, janah lanai kam saja ngenca mersan tanggung jawab e.
18 Genduari kataken lah man bangsa e kerina, nindu, 'Bersihken lah dirindu guna si pepagi, sabap pepagi kam daten daging si man panganndu. TUHAN nggo megi kam denge-denge alu ngataken maka merincuh kam ndat daging, janah maka nindu sikapen iakapndu i Mesir. Emaka ate TUHAN mereken daging man bandu, janah arus ipanndu e.
19 Labo sada ntah dua wari saja ngenca arus ipanndu e, ntah pe lima, sepuluh, ntah pe dua puluh wari,
20 tapi dem sada bulan, seh ndaraten arah cupingndu, seh mutah kam ibahanna. Enda jadi erkite-kiteken nggo itulakndu TUHAN si ringan i jenda i tengah-tengahndu, janah nggo kam jungut-jungut man BaNa alu ngataken, maka erkadiola kam nadingken Mesir.'"
21 Nina Musa man TUHAN, "Kalak si kupinpin enda lit teremna 600.000 kalak, janah nindu IberekenNdu man bana daging cukup sada bulan dekahna?
22 Banci kin lit cukup lembu ras biri-biri igeleh mesuri ia? Kerina gia ikan i lawit cukup kin man bana?"
23 "Lit kin sibarna gegehKu?" nina TUHAN erjabap. "Idahndu me kai si Kukataken e tuhu-tuhu jadi ntah lang!"
24 Emaka lawes Musa ndarat janah iturikenna man bangsa e kai si nggo ikataken TUHAN. Ipepulungna pitu puluh peminpin, jenari isuruhna ia kerina tedis i sekelewet Kemah e.
25 Kenca bage reh TUHAN ku teruh i bas embun jenari ngerana ia man Musa. Ibuatna deba kesah si nggo IberekenNa man Musa, jenari IberekenNa man peminpin-peminpin si pitu puluh kalak e. Tupung kesah ndai reh man kalak ndai, minter ia ngerana kerina alu sora si megang desken nabi-nabi, tapi i bas paksa e ngenca.
26 Dua i bas peminpin si pitu puluh kalak e, Eldat ras Medat, tading ia i bas ingan erkemah e, janah la ia ndarat ku Kemah Perjumpan e. Emaka reh me kesah ndai ku ia duana i bas ingan erkemah e, jenari ia pe minter ngerana alu sora si megang bagi nabi-nabi.
27 Sekalak anak perana minter kiam ndarat ngatakenca man Musa kai sangana ibahan Eldat ras Medat.
28 Kenca bage Josua anak Nun, si nggo jadi pembantu Musa mulai anak peranana nari, ngerana man Musa nina, "O bapa, laranglah ia!"
29 Erjabap Musa nina, "Cemburu kin kam erkiteken aku? Adi banci merincuh aku maka ibereken TUHAN min KesahNa man kerina BangsaNa gelah banci ngerana bagi nabi-nabi!"
30 Kenca bage Musa ras peminpin-peminpin bangsa Israel si pitu puluh e mulihken ku ingan erkemah.
31 Jenari ibahan TUHAN me angin rembus. Ibaba angin e leto i lawit nari, ergun-gun seh sada meter ganjangna i babo taneh. Cinep ia kerina i bas ingan erkemah e ras i sekelewetna seh piga-piga kilometer ku tep-tep penjuru.
32 Emaka i bas gedang-gedang wari e, gedang-gedang berngi, terus ku bas wari si pepagina, kalak Israel kuskas nangkap leto. La lit sekalak pe si pepulungsa kurang seribu kilo. Ierapkenna i sekelewet ingan erkemah e guna ngkerahkenca.
33 Tupung melala denga daging si man panganna, merawa TUHAN man bangsa e, janah IpeturahNa penakit ngkenai nterem jelma i tengah-tengah bangsa e.
34 Ingan ndai igelari "Kuburen Kalak Rangap," sabap i bas ingan e ikuburkenna kalak si rangap man daging.
35 I bas ingan e nari bangsa e miser ku Haserot, janah i je ibahanna inganna erkemah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA