Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E tanggal pa’ lekor bulan jareya keya ra’yat Isra’il akompol. Reng-oreng jareya apowasa noduwagiya ja’ la atobat dhari sa-dusana. Reng-oreng manca ejauwi. Menangka tandha ja’ atena sossa, reng-oreng jareya akalambi karong, cethagga eburburi abu. Saellana jareya pas padha manjeng, ngakone dusana dibi’ ban dusana bangatowana.
2 (9:1)
3 Ra-kera tello ejjam abidda ketab Hokomma PANGERAN, Allahna reng-oreng jareya, ebaca’agi e adha’na reng-oreng jareya, saellana jareya tello ejjam abidda reng-oreng jareya ngakone dusana. Saellana mare laju padha asojud nyemba ka PANGERAN, Allahna.
4 E jadhiya badha panggung kaangguy reng-oreng Lewi. Yesuwa, Bani, Kadmiyel, Sebanya, Buni, Serebiya, Bani ban Kenani manjeng e jadhiya, padha adu’a ka PANGERAN, Allahna; sowarana se adu’a epakaja.
5 Kabakteyan jareya emolae bi’ reng-oreng Lewi se anyama Yesuwa, Kadmiyel, Bani, Hasabneya, Serebiya, Hodiya, Sebanya ban Petahiya. Ca’na reng-oreng jareya, "Mara manjeng padha moji GUSTE Allah! Poji Pangeran salanjangnga! Poji Pangeran se talebat moljana, asma se ngalebbi’i sakabbinna pojiyan."
6 Ra’yat Isra’il pas adu’a kantha reya, "Junandalem PANGERAN Se Settong, se abadhi bintang sareng langnge’ sadajana, jugan tase’ sareng bume ban saessena, sareng Junandalem pas eparenge odhi’ sarta epeyara. Ka Junandalem asojud sadajana kobasa e langnge’, padha nondhu’ abakte.
7 Junandalem Allah, PANGERAN Se Settong. Junandalem mele Abram dhari antarana bangsana. Abram adinggallagi Ur e Babil sabab etonton sareng Junandalem dibi’. Sareng Junandalem laju eparenge asma se anyar, enyamae Ibrahim kaangguy saterrossa.
8 Sareng Junandalem epanggi ja’ Ibrahim ka’dhinto ka Junandalem ta’at sareng esto. Junandalem sareng Ibrahim pas abadhi parjanjiyan se koko. Tana Kana’an, Het sareng Amori, tana Feris, Yebus sareng Girgasi, sareng Junandalem sadajana eparengngagi badhi kalenggiyanna Ibrahim sareng sadajana toronanna. Junandalem neptebbi janji gapaneka sabab Junandalem adil sareng esto ka dhabuna.
9 Junandalem ngoladi kasangsara’anna bangatowa abdidalem sadaja gi’ jaman lamba’; Junandalem meyarsa se nanges e Tase’ Galagas sareng e Messer.
10 Junandalem alampa’agi rang-barang se ajib ka rato Messer, kadi ka’dhinto jugan ka ba-ponggabana sareng ra’yat e nagarana, sabab Junandalem ngagali kadi ponapa ommat Isra’il eseksa sareng oreng Messer. Asmaepon Junandalem pas kasohor kantos samangken ka’dhinto.
11 Sareng Junandalem tase’ eseba’ sopaja ommadda bisa’a lebat; sareng Junandalem sadajana eaterragi lebat e dhasarra tase’ se ampon kerreng. Mosona se nyerser padha mate tasellem e aeng se dhalem, akadi bato se nyellem e sagara se omba’na raja.
12 E bakto seyang sareng Junandalem reng-oreng se ajalan etonton ngangguy ondhem menangka cer-ancer. E bakto malem jalanna sareng Junandalem etera’e ngangguy pelar apoy se tera’ mancorong.
13 E Gunong Sinay Junandalem toron dhari langnge’, pas abu-dhabu sareng ommadda dibi’. Junandalem apareng hokom, atoran sareng parenta se sae, lerres, sareng aguna.
14 Ommattepon Junandalem ewajibbagi araya’agi are Sabat, kalaban parantara’anna Mosa Junandalem apareng hokom ka manossa.
15 E bakto sadajana kalaparan, ban kakorangan teddha’an, Junandalem matoron rote dhari langnge’. Ban e bakto sadajana padha pelka’ dhari bato gunong se ce’ galina Junandalem manancel aeng se masegger badanna. Sareng Junandalem reng-oreng gapaneka epakon ngennengnge tana se sareng Junandalem sabellunna ampon ejanjiyagi kalaban asompa.
16 Namong bangatowa abdidalem sadajana padha angko tor songar atena ta’ poron atoro’ ka sadajana parenta se edhabuwagi Junandalem sabellunna.
17 Reng-oreng gapaneka padha ta’ ta’at, padha loppa ka sadajana kabecce’annepon Junandalem, padha ta’ enga’ ka sadajana kaajiban se elampa’agi Junandalem. Pekkerra gathak, daddi laju mele oreng se epadaddiya pamimpinna, epangaterra aba’na abali ka Messer, daddiya dunorra oreng pole. Namong Junandalem Allah se gampang apareng sapora, sabbar, lamba’ sareng bellas ase. Kataresna’annepon Junandalem tadha’ batessa; Junandalem ta’ adinggallagi reng-oreng gapaneka.
18 Reng-oreng gapaneka abadhi brahala se epabangon pe-sapeyan. Pas padha ngoca’, ‘Areya’ Allahna ba’na, se ngeba ba’na dhari Messer, se mabebas ba’na dhari se ekadunor oreng.’ Guste Allah, Junandalem dibi’ se eya-seya reng-oreng gapaneka!
19 Namong e sagara beddhi reng-oreng gapaneka sareng Junandalem ta’ edinggallagi, sabab bellas asena Junandalem talebat rajana. Pelar apoy sareng ondhem se daddi cer-ancerra jalan e baja malem sareng e bakto seyang, sareng Junandalem ta’ epaelang salanjangnga.
20 Junandalem ngajar reng-oreng gapaneka kalaban kobasana Junandalem se ce’ saena. Sareng Junandalem eparenge manna menangka teddhana, sareng aeng enom sacokobba.
21 Pa’ polo taon abidda e sagara beddhi sadajana kabutowanna sareng Junandalem ecokobi. Kalambina ta’ oneng rosak otaba beddha, sokona ta’ oneng sake’ otaba bara.
22 Reng-oreng gapaneka sareng Junandalem epamennang ka karaja’an sareng sa-bangsa sabannya’na se badha e batessa nagarana. Hesybon nagarana Rato Sihon ekobasae; Basan nagarana Rato Og ekennengnge.
23 Na’ potona sareng Junandalem epabannya’, epakadi bannya’na bintang e langnge’. Sareng Junandalem eparenge tana se badhi ekennengngana, tana se ampon ejanjiyagi sabellunna sareng Junandalem ka bangatowana.
24 Tana Kana’an epakala sareng na’ potona; pandhudhu’na sareng Junandalem epatellok sadajana. Junandalem marenge ommadda kakobasa’an ngala’ sakarebba ka sa-bangsa Kana’an sareng ka to-ratona.
25 Ommattepon Junandalem arebbu’ teng-binteng partahanan, tana se landhu, sareng po’-compo’ se bannya’ dunnyana. Mor-somor sareng somberra aeng ekobasae, kebbun anggur, bungkana jaitun sareng wa’-buwa’an se laen. Reng-oreng gapaneka lempo lantaran neddha sakarebba atena. Sadajana paparengnga Junandalem se sae padha erassae.
26 Namong ommattepon Junandalem aberonta’ ban ta’ ta’at ka Junandalem, ngenthengngagi hokom sareng atoran se ewajibbagi sareng Junandalem. Bi-nabbi se maemot kasala’anna, se makon sopaja padha’a abali ka Junandalem, Allahna, padha epate’e sadajana. Adhu, GUSTE, Junandalem eya-seya li-baliyan tadha’ ambuna,
27 daddi sareng Junandalem ommat gapaneka laju epassra’agi ka mosona, moso se pas ngobasane odhi’na, se nendhes ommat gapaneka ce’ kejjemma. Namong e dhalem kasossa’an se talebat berra’ rassana, reng-oreng gapaneka aera’ nyo’on partolongan. Dhari sowarga Junandalem meyarsa’agi serrona; Junandalem apareng jawaban lantaran bellas asena. Junandalem madhateng pin-pamimpin, se mabebas ommat gapaneka dhari so-mosona.
28 Namong manabi nagarana ampon aman, reng-oreng gapaneka duli ngolange dusana. Daddi sareng Junandalem epassra’agi pole ka so-moso se nendhes aba’na. Namong, e bakto apangrasa sareng atobat, laju aserro ka Junandalem nyo’on salamet. Junandalem meyarsa’agi dhari sowarga, li-baliyan apareng partolongan sabab Junandalem bellas ongguwan.
29 Junandalem maemot sopaja pangajaranna Junandalem etoro’, namong reng-oreng gapaneka atena angko, ta’ poron ajalannagi hokom se edhabuwagi Junandalem. Sanare manabi hokommepon Junandalem ejalannagi tanto oreng manggi jalanna odhi’. Ommattepon Junandalem ka’dhinto cengkal sareng angko, ta’ poron merengngagi ban atoro’ ka hokommepon Junandalem.
30 Dhari taon ka taon Junandalem sabbar maemot; kalaban parantara’anna nabbi sadajana Errohepon Junandalem abu-dhabu ka ommadda. Namong ommat gapaneka topo kopengnga, daddi sareng Junandalem pas epakala ka sa-bangsa laenna.
31 Namong sarrena Junandalem taresnana talebat raja, ommadda ta’ epaancor sareng ta’ edinggal. Pajat lerres, Junandalem paneka Allah se tadha’ bandhinganna, ta’ kabilang bellas asena.
32 Ya, Allah, Allah kaula, Junandalem Allah se kowat! Allah se agung sareng nako’e parana! Junandalem esto koko neggu’i dhabuna; ji-janjina Junandalem elampa’agi sadajana. Molae to-rato Asyur nendhes bangsa abdina, kantos mangken, bannya’ kasangsara’an se ealame abdidalem sadaja, To-rato sareng pin-pamimpin, mam-imam sareng bi-nabbi, ra’yat sareng bangatowa sadajana padha oneng nyandhang sangsara. Kaemodi kasangsara’an gapaneka sadajana! Ja’ paelang dhari engeddannepon Junandalem!
33 Junandalem adil, ngokom se dusa; Junandalem paggun esto sanare abdidalem padha daraka.
34 Bangatowa abdidalem sadajana, to-rato, para imam sareng pamimpin sadajana, ta’ atoro’ sareng ta’ parduli ka sadajana Hokom. Sadajana dhabu sareng parengeddan dhari Junandalem ta’ eedhingngagi, ta’ eparduli.
35 Junandalem apareng para rato se marenta ommattepon, e bakto ommat gapaneka enneng e nagara se landhu sareng lebar paparengnga Junandalem. Namong reng-oreng gapaneka ta’ aginjek dhari kajahadanna, ta’ poron ngabdi otaba abakte ka Junandalem.
36 Samangken abdidalem sadaja daddi dunor e tana se eparengngagi Junandalem menangka tana sangkol. Tana ka’dhinto landhu bannya’ hasel bumena, se samasthena makobassa abdidalem sadajana.
37 Sadajana hasella tana ka’dhinto kodu eatorragi ka to-rato. Junandalem ngangkat para pangobasa se ngobasane ommattepon Junandalem, menangka okomanna sa-dusana abdidalem sadajana. Samangken abdidalem padha nyangsara, odhi’ sossa sareng taseksa, sabab to-rato gapaneka, ngala’ rep-sakarebba atena e dhalem marenta ommattepon Junandalem sadajana sareng bin-ebin peyara’anna."
38 Lantaran sakabbinna kadaddiyan jareya, sengko’ ban bangsa Isra’il se laen agabay parjanjiyan se koko ban se etoles, epobuwi eccabba pamimpinna, reng-oreng Lewi ban para imam.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA