Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sanbalat, Tobiya, Gesyem ban reng-oreng laenna se ngamoso sengko’ ban reng-oreng Yahudi padha ngedhing ja’ reng-oreng Yahudi la mare se mateppa’ geddhungnga kottha reya, ban ja’ lobangnga la etotobi kabbi, maske e bakto jareya labangnga bang-labang sakethengnga kottha jareya gi’ ta’ epobu.

² Sanbalat ban Gesyem laju akerem onjangan ka sengko’. Sengko’ epenta mabadha rapat ban reng-oreng jareya e sala settongnga disa neng e Cora Ono. Tape sengko’ tao ja’ reng-oreng jareya andhi’ maksod macalaka’a sengko’.

³ Daddi sengko’ laju akerem balessan kantha reya, "Kaula ta’ kengeng dhateng polana kalerressan badha lalakon se penting. Lalakon paneka tanto ta’ ajalan mon bi’ kaula edina’agi kaangguy arapat sareng panjennengngan."

⁴ Sampe’ pa’ kale reng-oreng jareya se akerem onjangan ka sengko’ se essena padha ban onjangan se dha’-adha’, ban sabban narema onjangan jareya sengko’ akerem balessan se padha akantha se dha’-adha’ keya.

⁵ Se kapeng lema’na orengnga Sanbalat magi sorat se abukka’ ka sengko’,

⁶ se essena kantha reya, "Gesyem ngakone ja’ pajat lerres badha rarasan e kalangan sa-bangsa e ma’-semma’na ka’iya, se ngoca’ ja’ panjennengngan ban sadajana oreng Yahudi agabay rancana aberonta’a, ban ganeka sababba panjennengngan malerres geddhungnga kottha. Gesyem ngoca’ jugan ja’ panjennengngan terro daddiya rato Yehuda,

⁷ sarengngan ampon mele bi-nabbi se epakona ngangkat sampeyan daddi rato e Yerusalim. Rarasan gapaneka dhi-budhina tanto napa’ ka rato. Daddi ngereng panjennengngan earep rabuna ka ka’dhinto, eajaga aparembagan."

⁸ Tape sengko’ ngerem balessan kantha reya, "Sadaja se edhabuwagi sampeyan ganeka lecek, karanganna sampeyan dibi’."

⁹ Reng-oreng jareya ngoddi ko’-nako’e sengko’ ban en-laenna, maksodda sopaja lalakon rowa eambuwana. Sengko’ adu’a, "Adhu, Guste Allah, nyo’ona kowat abdidalem, Guste!"

¹⁰ Ra-kera e baja teya sengko’ entar ka bengkona Semaya ana’na Delaya kompoyya Mehetabe’el, sabab oreng jareya andhi’ alangan ta’ ngenneng entar ka sengko’. Oca’na ka sengko’, "Ngereng panjennengngan sareng abdina ngetek e Padalemman Socce. Labangnga konci sadaja, sabab badha oreng se mateyana panjennengngan. Olle daddi dhaggi’ malem panjennengngan epateyana oreng."

¹¹ Tape sengko’ nyaot, "Masa’ sengko’ buruwa! Sengko’ reya oreng biyasa, ta’ olle maso’ ka Padalemman Socce, dhaggi’ sengko’ mate. Enja’, sengko’ ta’ endha’."

¹² Saellana ebang-tembang bi’ sengko’, sengko’ pas apangrasa ja’ pangajagga Semaya jareya banne dhari Allah, tape dhari Tobiya ban Sanbalat. Semaya esogo’ esoro ngoca’agi nobuwat jareya ka sengko’.

¹³ Maksodda me’ olle sengko’ tako’ sarta pas norodi oca’na reng-oreng jareya, daddi sengko’ pas dusa. Kalaban cara se kantha jareya, reng-oreng jareya pas olle kasempadan majuba’ tang nyama sopaja sengko’ daddiya rasanna oreng.

¹⁴ Sengko’ adu’a, "Adhu, Guste Allah, kaemodi ponapa se elakone Tobiya sareng Sanbalat ka’dhinto. Okommagi se kadhuwa gapaneka, Guste. Sapaneka jugan nabbi babine’ se anyama Nowaja sareng bi-nabbi laennepon se ko’-nako’e abdidalem."

¹⁵ Se mateppa’ geddhung rowa ngabi’ bakto saeket dhuwa’ are, ban mare e tanggal sagame’ bulan Elul.

¹⁶ E bakto so-moso e antarana sa-bangsa se badha e sabingkerra kottha ngedhing parkara jareya, arassa tako’ ta’ andhi’ mowa, sabab oreng padha tao ja’ lalakon jareya ejalannagi kalaban partolonganna Allah.

¹⁷ Sabatara jareya para pamimpin Yahudi gi’ rat-soradan bi’ Tobiya.

¹⁸ Bannya’ oreng Yahudi akanca ban Tobiya, sabab Tobiya jareya mantona Sekhanya ana’na Arah. Apa pole Yokanan, ana’na Tobiya, abine ana’na Mesulam ana’na Berekhya.

¹⁹ Maske Tobiya ros-terrosan noles sorat ka sengko’, se maksodda ko’-nako’ana sengko’, tape para pamimpin Yahudi ros-terrosan but-nyebbut e adha’anna sengko’ sabarang kabecce’anna Tobiya, ban sabarang se ekoca’agi sengko’ ekabala ka Tobiya jareya.

Nehemia

Video Nehemia 6

Ikuti Kami:

KONTAK | PARTISIPASI | DONASI