Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E bakto Sanbalat ngedhing ja’ oreng Yahudi mateppa’ geddhungnga kottha, aba’na pas ce’ peggella sarta ca’-ngoca’e oreng Yahudi.
2 E adha’na ca-kancana ban e adha’na tantara Samaria, Sanbalat ngoca’ cara reya, "Apa se elakone oreng Yahudi se la’nat se ta’ bisa apa-rapa rowa? Apa kottha reya epaddegga pole? Esanggu lalakon jareya mareya e dhalem saare, pera’ kalaban ngatorragi kurban? Apa tombuganna rombu se la potthon rowa ekenneng kagabay to-bato geddhung?"
3 Tobiya se manjeng neng e seddi’anna ngoca’ keya, "Abas, ra, geddhung gabayanna reng-oreng jareya! Ebentor pate’ alas bai tanto gujur!"
4 Daddi sengko’ adu’a, "Adhu, Guste Allah, kasokana Junandalem meyarsa’agi kadi ponapa abdidalem sadaja ka’dhinto eya-seya sareng reng-oreng ka’dhissa’! Pabaliyagi ka reng-oreng gapaneka dibi’ sadajana oca’ se ya-nyeya ka abdidalem sadaja ka’dhinto. Mandar dhi’-andhi’epon reng-oreng gapaneka ekennenga abigal, sareng reng-orengngepon etawan ka nagara manca.
5 Ja’ sapora kajahadannepon reng-oreng gapaneka, GUSTE, sareng kaemodi terros dusaepon reng-oreng gapaneka, sabab reng-oreng gapaneka ya-nyeya abdidalem sadaja se parappa’epon maddek geddhungnga kottha ka’dhinto."
6 Sabatara jareya oreng Yahudi terros mateppa’ geddhung jareya, ban ta’ abit saellana jareya geddhung buru la mare epateppa’ sampe’ saparona tenggina, sabab ra’yat ce’ tarongguna se alako.
7 E bakto Sanbalat, Tobiya ban reng-oreng dhari Amon ban Asdod sarta reng-oreng Arab ngedhing ja’ geddhungnga Yerusalim se epateppa’ jareya sajan bannya’ ollena, sarta ja’ bang-lobangnga la molae etambel, kabbi padha ce’ peggella.
8 Reng-oreng jareya pas asakongkel nyerranga Yerusalim sarta masalbuda kabadha’an.
9 Daddi sengko’ ban reng-oreng Yahudi padha adu’a ka Allah, sarta ajaga kottha jareya seyang ban malem.
10 Tape oreng Yehuda molae aserrowan sambi ekejungngagi kantha reya: "Sengko’ la lesso se ko’-ngangko’, mangkana rombu gi’ apo’-tompo’. Sengko’ ta’ sanggup alako kantha reya maddek geddhungnga kottha."
11 Sabatara jareya moso andhi’ rancana nyerranga bareddagan, mateyana reng-oreng se alalakon jareya sopaja lalakon jareya ta’ epaterros.
12 Tape reng-oreng Yahudi se enneng e seddi’na so-moso jareya li-baliyan dhateng ka kennengnganna sengko’ ban reng-oreng Yahudi laenna, malae pa-apa se erancana’agi so-moso jareya.
13 Daddi bi’ sengko’ ra’yat eberri’i peddhang, tombak ban pana, saellana jareya reng-oreng se la neggu’ sanjata jareya eator esaba’ noro’ kaomma bang-sebang e budhiyanna geddhung e sakabbinna bagiyan se gi’ ta’ mare epateppa’.
14 Sengko’ tao ja’ ra’yat jareya tako’, daddi sengko’ ngoca’ ka reng-oreng jareya sarta ka para pamimpin, "Ta’ osa tako’ ka moso!" Kaenga’e ja’ Pangeran reya kowat ban nako’e, daddi mara aperrang kaangguy bangsana ba’na, kaangguy na’-ana’ ban ne-binena ba’na sarta bengkona ba’na!
15 So-mosona tang bangsa jareya ngedhing ja’ rancanana la ekataowe bi’ tang bangsa. Daddi reng-oreng jareya apangrasa ja’ rancanana jareya la epabuddhu bi’ Allah. Saellana jareya tang bangsa materros lalakonna se mateppa’ geddhungnga kottha jareya.
16 Molae dhari jareya reng-oreng se epalako coma saparo, dineng saparona epajaga sambi ngangguy kalambi perrang ban neggu’ sanjata tombak, tameng ban pana. Para pamimpinna ra’yat aberri’ bantowan se ta’ gung-nanggung ka ra’yat
17 se parappa’na mateppa’ geddhung jareya. Reng-oreng se ngangko’ bahanna bangonan jareya ngangko’ ngangguy tanang salaja, tanang salajanna neggu’ sanjata.
18 Kang-tokang bato alako sambi nyongkel peddhang. Oreng se esoro nope tarompet menangka tandha babaja, badha neng e seddi’na sengko’ terros.
19 Sengko’ pas ngoca’ ka ra’yat ban ka para pamimpin, "Lalakon reya malanjang ce’ jauna, sampe’ sengko’ ban ba’na kabbi tapesa ce’ jauna se settong ban settonganna e salanjangnga geddhung reya.
20 Daddi mon ba’na ngedhing monyena tarompet, duli akompol ka seddi’na sengko’ e dhinna’. Guste Allah se esemba ba’na ban sengko’ se bakal aperranga nolonge ba’na ban sengko’."
21 Daddi reng-oreng Isra’il jareya alako terros molae dhari sobbu sampe’ tang-bintang tep-ngarettep e langnge’. Saparona ra’yat mateppa’ geddhung, saparona aga-jaga sambi neggu’ tombak.
22 Saabidda jareya, sakabbinna oreng se epassrae lalakon, bariya keya reng-oreng se nolonge, bi’ sengko’ esoro ngenep e Yerusalim. Daddi e bakto malem ngenneng ajaga kottha jareya, ban e bakto seyangnga maddek geddhung gella’.
23 Sengko’ dibi’, tang ca-kanca, reng-oreng se noro’ sengko’ sarta sakabbinna pangawal, ros-terrosan ngangguy kalambi lako, seyang ban malem. Sengko’ kabbi padha aya-sadhiya, sambi neggu’ sanjata.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA