Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani panorang ai ibasa sidea do buku titah ni si Musa itangar bangsa ai; anjaha jumpah do tarsurat ijai, paboa na so bulih do masuk halak Amon, ampa halak Moab hu tumpuan ni Naibata,
2 ai seng ialo-alo sidea halak Israel mamboan ruti ampa bah, tapi lambin iupahi sidea do si Bileam mangimbang halak Israel, laho mamapai sidea, hape ipahusor Naibata do papa ai gabe pasu-pasu.
3 Jadi dob ibogei sidea titah ai, ipapulig sidea ma ganup halak na legan hun Israel.
4 Tapi i lobei ni on, ipasirsir si Eliasib, malim ai, na pinabangkit manramotkon kamar ni rumah ni Naibata, na martondong hubani si Tobia,
5 do sada kamar bani, ai ma kamar parnahan ni galangan sipanganon, dahupa, parugas, parsapuluhan ni gandum, anggur pakon minak hinan, na binoan ni halak bahen parbagianan ni halak Levi, halak sipandoding ampa sijaga horbangan, ambah ni ai tumpak hubani malim.
6 Sanggah masa ganupan ai, seng i Jerusalem be ahu, ai patolu-tahunkon dob manrajai si Artasasta, Raja Babel ai, mulak ma ahu hubani raja ai, anjaha dob piga-piga dokah mangindo mulak ma ahu use hubani raja ai.
7 jadi das ma ahu hu Jerusalem, gabe huidah ma hasamboron na binahen ni si Eliasib, laho manatap si Tobia, ai ma na pinasirsirni ai hubani sada kamar i alaman ni rumah ni Naibata.
8 Jadi manringis tumang ma ahu, pala hupanggijigkon ganup parugas ni rumah ni si Tobia hu darat ni kamar ai.
9 Dob ai huparentahkon ma, ase iuras kamar ai, anjaha hupasuang ma hujai use parugas-parugas ni rumah ni Naibata, galangan sipanganon ampa dahupa.
10 Tarbortik do homa hu bangku, paboa na so ibere parbagianan ni halak Levi bani sidea, gabe lintun mulak halak Levi ampa halak sipandoding, na mandalankon horja ai, ganup hu jumani bei.
11 Mangonai hata ma ahu dompak kopala-kopala ai, ningku ma, “Mase ma tarulang rumah ni Naibata?” Dob ai hupatumpu ma sidea, anjaha hupasuang sidea use bani horjani hinan.
12 Jadi iboan halak Juda ma use parsapuluhan ni gandum, anggur ampa minak hu rumah parartaan ai.
13 Anjaha hupabangkit ma bendahara ni rumah parartaan ai, ai ma malim Selemya, si Sadok juru tulis ai, pakon si Pedaya halak Levi; pangurupi ni sidea si Hanan, anak ni si Sakkur, anak ni si Matanya, ai hatengeran ni uhur do sidea; horja ni sidea, ai ma na mambagi-bagihon hubani sanina ni sidea.
14 Ingat Ham ma ahu, ale Naibatangku, marhalani on, anjaha ulang ma sasap Ham pambahenanku na madear in, na hubahen bani rumah ni Naibatangku ampa horja na mardomu hujai.
15 Bani panorang ai, huidah ma i Jerusalem halak na marhorja i kilang anggur bani ari Sabat, na pahutahon gandum, na pausungkon bani halode; sonai homa anggur, buah ni anggur, buah ni hayu ara ampa bagei-bagei ni siusungon, na binoan ni sidea hu Jerusalem bani ari Sabat. Anjaha hupalumba do homa bani ari ai na manjual sipanganon.
16 Sonai homa halak Tirus, na marianan i huta ai, iboan sidea do dengke ampa marbagei-bagei barang-barang, anjaha ijual sidea do ai bani ari Sabat hubani halak partanoh Juda ampa par Jerusalem.
17 Jadi mangonai hata ma ahu hubani halak na sangap ni Juda, anjaha ningku ma bani sidea, “Pambahenan na masambor ja do, na binahen nasiam on, gabe ipabutak nasiam ari Sabat?
18 Ai lang sonai do pambahenan ni ompungta, gabe iparoh Naibata haganup na masambor hu banta ampa hu huta on? Hape lambin itambahi nasiam ope use papa bani Israel, marhitei pambutaki nasiam bani ari Sabat.”
19 Jadi mamungkahkonsi samun ari i lobei ni horbangan ni Jerusalem marayak ari Sabat, huhatahon ma tutupon horbangan ni Jerusalem, anjaha huparentahkon ma, na so bulih bukaon ai paima salpu ari Sabat ai. Anjaha husuruh ma deba juakjuakku jongjong i atas ni horbangan ai, ase ulang adong na pamasukkon siboanon hubagas huta ai sanggah ari Sabat.
20 Marborngin ma sahali dua hali saudagar, sijual barang na marbagei-bagei i darat ni Jerusalem.
21 Tapi hupalumba ma sidea, ningku ma dompak sidea, “Mase marborngin nasiam i darat ni tembok in? Anggo ibahen nasiam use sonai, maningon tangkapon do nasiam.” Jadi olat ni ari ai, seng ongga be roh sidea bani ari Sabat.
22 Dob ai huparentahkon ma hubani halak Levi, ase marsiuras dirini bei sidea, anjaha ase roh sidea manjaga horbangan ai, laho papansingkon ari Sabat. Ingat Ham ma homa ahu, marhalanihon ni on, ale Naibatangku, anjaha ramotkon Ham ma ahu romban hubani buei ni idop ni uhur-Mu.
23 Ambah ni ai huidah do bani panorang ai ijia, deba halak Jahudi, na mambuat boru hun Asdod, Amon ampa Moab;
24 anjaha satongah humbani anak ni sidea mamakei hata Asdod, seng ibotoh sidea be marsahap Jahudi, tapi sahap ni bangsa on atap bangsa ai do.
25 Jadi mangonai hata ma ahu dompak sidea, hupapai ma sidea; hupabija deba humbani sidea anjaha hutarik jambulan ni sidea; hupabija ma sidea ibagas goran ni Naibata, ningku ma, “Seng bulih buaton nasiam boru ni sidea bani anak nasiam atap bani nasiam sandiri.
26 Ai lang domma mardousa si Salomo, raja ni Israel, marhalanihon ni naboru na sonai ai? Seng dong raja songonsi i tongah-tongah ni buei bangsa, ai ihaholongi Naibata do ia, anjaha ipabangkit Naibata do ia gabe raja ni ganup Israel; hape ia pe mardousa do ipadari-dari naboru na legan.
27 Mintor nasiam ma siihutonkon laho mangkorjahon hasamboron na sonai banggalni, pangoseion i lobei ni Naibatanta, marhitei na mambuat boru na legan?”
28 Anjaha sada humbani anak ni si Joyada, anak ni sintua ni malim Eliasib, ai ma hela ni si Sanballat, halak Horoni ai, huusir do ia hun lambungku,
29 Ale Naibatangku, dingat Ham ma sidea, ai ipabutak sidea do hamalimon ampa parpadanan ni malim pakon halak Levi.
30 Dob ai huuras ma sidea humbani ganup aturan-aturan ni halak na legan, anjaha hupatotap use parhorinan ni malim ampa halak Levi, ganup bani horjani bei.
31 Ambah ni ai pambereon bani soban bani panorang na dob tinotapkon, sonai homa pasal limbuah. Ham Naibatangku, dingat Ham ma manumpakkon na madear bangku, balasni ai!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA