Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Ai pe, hanima malim-malim, mangonai do bannima hata lumba-lumba on.
2 Anggo seng ra hanima manangihon, anjaha anggo seng ra hanima marimbagaskon, laho pasangapkon goran-Ku,” nini Jahowa Zebaot, “tongoson-Ku ma papa hu tongah-tongahnima, anjaha gabe papa bahenon-Ku pasu-pasu na bannima in; domma tongon hona papang-Ku ai, halani na so ra hanima marparimbagaskon ai.
3 Tonggor ma, rotapon-Ku do tangannima, anjaha lapuhonon-Ku do kotoran bani bohinima, ai ma kotoran ni galangannima, anjaha saradon do hanima hunjai.
4 Jadi botohonnima ma, Ahu do na manongos haputusan on bannima, laho patotapkon padan-Ku na bani halak Levi,” nini Jahowa Zebaot.
5 “Ia padan na Hubahen ai bani, ai ma padan hagoluhan ampa hadameion, anjaha Hubere do ai bani, ase unduk ia marhabiaran bani goran-Ku.
6 Titah na sintong do bani pamanganni, anjaha seng jumpah hagedukon bani bibirni, ibagas damei ampa hasintongon do ia marparlahou i lobei-Hu, anjaha buei do halak ipaulak humbani hajahaton.
7 Ai maningon ramotkonon ni malim do habotohon, anjaha humbani pamanganni pindahan pangajarion, ai suruhan ni Jahowa Zebaot do ia.
8 Tapi anggo hanima domma manlembang humbani dalan ai, anjaha buei halak jomba ibahen hanima marhitei pangajarionnima, iparseda hanima do padan na bani halak Levi,” nini Jahowa Zebaot.
9 “Halani ai do ase hiri anjaha dorun hanima Hubahen i lobei ni ganup bangsa in, halani na so nidalanannima dalan-Kai, tapi martonggor jumbak do hanima bani pangajarion.”
10 Ai lang sada do bapa ni hita on ganup? Ai lang sada do Naibata na manompa hita? Mase ma marsioseian hita samah hita, anjaha ibutaki hita padan na bani ompungta?
11 Mosei do halak Juda, anjaha masa do sihagigihononkon i Israel ampa i Jerusalem; ai ibutaki halak Juda do rumah hapansingon ni Jahowa, na hinaholonganni ai, anjaha iompoi do boru ni naibata na legan.
12 Sai siapkonon ni Jahowa do halak na mangkorjahon na sonai ai, sipangadu ampa sipangapiti, hun lampolampo ni si Jakob, age humbani halak na mamboan galangan bani Jahowa Zebaot.
13 Anjaha on do na binahennima. Irungkub hanima do anjapanjap ni Jahowa marhitei iluh-iluh, partangison ampa hoih-hoih, halani na so pinardiateihon-Ni ai be galangan ai, anjaha na so rosuh ai be uhur-Ni manjalo ai humbani tangannima.
14 Nini hanima sungkun-sungkun, “Mase sonai?” Halani Jahowa do saksi ni parpadanan na binahenmu ampa naboru bani haposoonmu, na dob nioseimu age pe ia do huanmu ampa parinangonmu mangihutkon padan.
15 Ai lang Naibata na sasada in do manjadihon ampa patotapkon banta tonduy hagoluhan? Anjaha aha do na pinarsinta-Ni? Bonih ni Naibata. Halani ai marjaga-jaga ma hanima ibagas tonduynima, ulang ma adong na mosei humbani naboru hinaholonganni sanggah poso.
16 “Ai Huhagigihon do parsirang-sirangon,” nini Jahowa Naibata ni Israel, “ampa na manrungkubkon hiouni bani hajahaton,” nini Jahowa Zebaot. “Halani ai jaga hanima ma dirinima, anjaha ulang be mosei.”
17 Ilojai nasiam do Jahowa marhitei sahap-sahap nasiam. Tapi nini nasiam, “Marhitei aha ilojai hanami Ia?” Marhitei na mangkatahon, “Sagala sihorjahon hajahaton, dear do uhur ni Jahowa mangidah ai, anjaha rosuh do uhur-Ni bani sidea.” Barang marhitei na manungkun, “Ija do Naibata, sidabuh uhum?”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA