¹ Zao hom holo gweꞌak, Yesus ki zep e-e san amjanbir song gweka. Desan Alap Zen de irik gin hip de ol dawemna golten daka. Dua-blas enkam de zere hon ang ta gwen wenya man ang neblanda gwek.
² Hen we walya mensa dowal de tilbiridan nakon hen sang-sang nakon dawem tabirki man hen ang tanda gwek. Ahana Maria– mensa nen gwibik Magdala kore we. Zebon onakon dowala tuju enkam mes golealsa soneka.
³ Ahana Kuza Bak mo wenya Yohana. Kuza zen teipsin zini Herodes mo golak de aha mamna. Ahana Sosana, hen ahakore we walya beya nik ang ta gwek. We walya in hen man Yesus maesa zere hon de ang ta gwen wenya ban zere mae mo te-alakam mas neibirida gwek.
⁴ Zi beyana ki zep etan Yesus hon dep zi-e zi-e nakon yaing gwe-gweꞌanzak. Yesus ki zep ze ola gulk sun blaonzimki,
⁵ “Zini man orep gandum dansa de hling gilsin hip song gweka. Kim hling gilsiki, hwena ahakon oranak altink. Zi zep ze nyaublunda gwek, hen ahakon mawa ze dwensiblindak.
⁶ Hen ahakon kaso-kasonak altink. Kim sap esip gwek, hwena ki zep tol eboneng gwek, sap kasona in sal-sala.
⁷ Hen ahakon dokot te ngi-ngi ausunak altink. Kim sap tol esaltik, hwena dokot te ngi-ngina in zep nabakam eblal-blal gwek. Zen zep dahalebik, hendep eini hom teka.
⁸ Hwena ahakon hen kama dawemnak altink. Zen dawemkam zep esip gwek, hendep dawemkam zep hataka, hendep dawemkam teka. Aha-ere timni, zeno dan beyana seratus maenak zep hata gweꞌak.” Ola insa kim tonsuku, ki zep hwena ol mamkam gubiridaka, “Em dwan i nibanke. Em esal gwen!”
⁹ Dua-blaskam de zere hon ang ta gwen wenya in ki zep nenblak, “Bian, gulk sun de ol blaoranna insa emki ap srip gulsuzimdin.”
¹⁰ Yesus ki zep ding gulzimki, “Abon de ang ta gwen wenya ebe mae hap Alap mes golzimki– em dikim zere mo irik gin hip denaka tame gul gwen hap denaye. Hwena aha zi hip hom kirekam golzimꞌira. Ëe in zebe zebe mae hap gulk en san ola blaon gwizimnin. Sap Alap man desa dwam gwibiridaꞌara– men kirekam zere mo olak lwakke, kirekam de hendep zebe mae hap anakan lwa gwizimdin hip, ‘Zen sap sa hla nul gwer, hwena san de hlaun sremna. Hen sap sa esane gwe-gwer, hwena zen molya tol dam nulsuk gwek.’”
¹¹ “Ola insa gulk sun blaonzim, dam gulsunnu a kirekam moye: Gandum danna, zen Alap mo ol.
¹² Gandum dan de oranak altirinni, zen men kiye: Zini men zen Alap mo ola insa esane gwe-gwenan, hwena dowal mo kigina dekam zep hata gwenan zala– ola insa de zeno mae mo enhonak alal gul gwizimdin hip. Mae hap ki kirekam gweibirida gwenda: Zen dikim eei gwen srem hap, hen engaya gwen srem hap.
¹³ Gandum danna men zen kaso-kasonak altirinni, zen men kiye– zini men zen sap esane gwenkam isrip-sri naban dokwak nul gwenanke. Hwena ola in bejen zeno mae mo enhonak sa gwen. Zen dekam en de sap eei gwen, hwena kim karekna noltowe gwenan, zen dekam zep Alapsa hli da gwenan.
¹⁴ Gandum danna men zen dokot te ngi-ngi ausunak altirinni, zen men kiye– zini men zen sap ola insa esane gwe-gwenan, hwena enlala ngalapna man zeno mae mo enhonak ebeya gwe-gwenan– te-ala beya gwen hap dena, hen syan-syan en hap dena. Kirekam de enlalana in zep Alap onakare ol dawemna insa zeno mae mo enhonak hule gwenan, hendep eini bejen dawemkam bil gwen.
¹⁵ Gandum danna men zen kama dawemnak altirinni, zen san de men kiye– zi enlala dam-damna hen enho dawemna. Zen kim ola insa esane gwe-gwenan, zen dawemkam ing nul gwenan, hen tatem zewe ezauk gwenan, hendep dawemkam eini ete gwenan.”
¹⁶ “Zini hom pelita ngatannak yuna utuk nul sone gwenan– dekam de ngatanna insa aning gun hupye. Hen pelitana hom tum iltikinnik si nulin gwenan. Zen diki meja maenak nonne gwenan– dekam de ngatannak zini zi niban goleteinikirin hipye.
¹⁷ Hen kirekam, ola mensae gulk sun de blaonzimdinkim zi beya hap aning gul gwizimꞌin, zen sa lamkam wet sol. Hen ano enlala aning tanna dekam sa tawa neblal. Zen diki dekam sa zini dam nulsuk gwer.
¹⁸ Zen in zep ano ola mensa ena esane gwe-gweꞌan, dawem enkam emki enhonak lone gwen. Sap men zen Alap mo irik gin nika de tame gun hup ehohle gweꞌan, zebe mae en hap sa etan Alap dekam de tame gun hup de enlala blala sowe henkam ing ta sone gwizimdi. Hwena men zen ehohle gwe srem gweꞌan, tame gun hup de enlalana men zen betek enkam nama lwazimꞌira, mensa zena enlala ne gweblanan, ‘Abon ki lwaꞌara,’ desa sa hwena Alap al tazimdi.”
¹⁹ Yesus mo anena ki zep oso wal zeban Yesussu de zertoran hap goleyaing gwezak. Hwena golek de tanna ba kon dep? Sap zi trana dekam mes ekyang gwesik.
²⁰ Dekam zep ahanik Yesussu gubluka, “Bian, eno anena oso wal oban e nakon emsa ziesblaꞌanon. Man eban de zertowen hap edwam gweꞌan.”
²¹ Yesus ki zep ding gulzimki, “Tingan men zen Alap mo ola esane gwe-gwenan hen desan ang ta gwenan, zen diki zen– ano anena hen oso walyaye.”
²² Aha yaklakam, ki zep Yesus zere hon de ang ta gwen wenyaka gubiridaka, “Nen ho gutu men eihya san gweyo gwen.” Dekam zep hendep bulkum sek gwek.
²³ Yesus hwena nisi ze taka. Mumuk ennak zep asese yawala hataka. Hona dekam zep buluk hlewehe kinzi gweꞌak, hendep bulu in keing gwen hap alp gwesiꞌik.
²⁴ Dekam zep li dak, ki zep nenblak, “Bian, Bian, nen an em-am angkam juweꞌan!” Yesus kim luweka, ki zep asesena insa serkam de ho ngepna in han jalse gwizimki. Dekam zep tangan hendep se nehek.
²⁵ Yesus ki zep gubiridaka, “Ki san em home Asa laibliblaꞌan?” Dekam zep airin niban denggwanblaꞌak. Ki zep zenaka nenbiridak, “Eiwa, zini an wehasa hom! Ba hap tangan zeno jalse gwizimdin enkam asese naban ho ngep naban nyausunun?!”
²⁶ Dekon zep hendep bulkum sek gwek– hendep Gerasa mo langnak, Ho Gutuna Galilea mo men eihya san.
²⁷ Yesus kim ho alpnak ati gwe ineka, zao zep dowal mo bi gweblan zi niban zertoweꞌanka. Zen sap orep enak gwe gweka, hwena dowal-dowala kim bi neblak, dekam zep irkan gwe gweka. Hen golak de gwe gwen hap man baes gwe-gweka. Hwena zi lo tasik gwibin kaso-hul kaso-hul en san gwenda gweka. Zini in mes tangan holo gweka– kirekam de gwenda gwenna.
²⁸ Bwi maenak sap taha-tana naka besi dokotkam de tatak soblan naka tak da-in gwek. Hwena dowala in hen-henkam napta gweblak, zep soson gwenkam besi dokotna insa blom tabir inhal gweka. Dekam zep dowala in zi srem lang san dep nerhal gwek. Zen kim Yesussu hla taka, ki zep herheka, deban Yesus mo nwenak ik gwehe zaka. Yesus ki zep dowala insa gubluka, “Dowal, em zebon onakon wet son!” Ki zep etan mamkam herheka, “Yesus, Teipsin Zini Alap mo Tane! Em aban toton banakan de syal en hap? Ëe ama Emsa abe taꞌan: Bahem asa karek tan!”
²⁹ (8:28)
³⁰ Yesus ki zep takensiblika, “Eno bosena nara?” Ki zep ding gulbluka, “Ano bosena Jal Zi Tra Bak.” Zen mae hap ki kirekam ding gulbluka: Sap zebon dowal-dowala tra tangan nik lowehe gwek.
³¹ Dowal-dowala in ki zep Yesussu etan-etankam aberbe daꞌak, “Asa bahem gubiridan– juwen zi mo bwi kawesinnik dep de atiti gwe inen hapye.”
³² Zeno mae mo nwe kara gwen san zahona beya tangan nik tembane hap kwatap tini san ehakaꞌak. Dowal-dowala in man aberbe daꞌak, “Em wehe tol asa gubiridaꞌanka? – zaho trana wakuwe de biti gwen hapye.” Yesus ki zep gubiridaka, “Dekam biti gwek.”
³³ Dowal-dowala in kim zini in kon wet so gwek, dekam zep hwena zahona iwe biti gwek. Zaho trana in dekam zep heya-hya gwek, li san zep hendep esyalk tak, hendep ho gutunak zep ekei-king gwek.
³⁴ Zahona insa men zen dekam kara dabiꞌik, kirekam kim hla nulidak, dekam zep zaho bi naka de gubiridan hap e san dep hen ena in mo golek denak de gol-gol san dep ehlu-hluk gwek.
³⁵ Zewe de zini kim esak, dekam zep hendep nolesal kinik. Yesus hon kim yaing gwezak, zao zep hla dazak– zini insa dowal-dowala tapbla dakye. Zen Yesus mo tana alp nakon pakean naban nikinꞌinka, hen enlalana mes sewe heblaka. Dekam zep ze eairiꞌak.
³⁶ In zen hla nuk, zen zep e nakon in zen yaing gwezak desa donbiridaꞌak, “Zini ansa kirekam dawem tala.”
³⁷ Dekam zep tangan serkam eairik, dekam zep tingan Yesussu abe dak– Zen de nabakam dekon song gwen hap.
³⁸ Zini in desa dowal-dowala tapbla dak ki zep Yesussu aberbe taꞌanka, “Ëe wehe tol Emsa ang gweblaꞌak?” Hwena man gubluka,
³⁹ “Em gol san song gwe hen tawa tabir– mensa Alap dawemna ebe hap mamkam golblalake.” Dekam zep Yesus hli yuludaka. Zini in ki zep song gweka, e yala iwe de zini kitak tangan tonbirida gweka– Yesus mensa zebe hap dawemna mamkam golblakake.
⁴⁰ Yesus kim etan lwahal zaka– Ho Gutuna Galilea mo an eihya san dep, dekam zep zi trana dawem enkam dokwak dak, sap zen man nesblaꞌak.
⁴¹ Zao zep hen zi bosena Yairus hata zaka. Zen Yahudi mo zewe de but srem golak de aha mamna. Zen ki zep Yesus mo nwenak ik gwehe zaka, dekon zep aberbe ta seka– zeno golak de hatan hap.
⁴² Sap zeno wenam tol aha-erena man tin hip alp gwesiꞌik– dua-blas tahun nik. Yairus mo gol san kim song gweꞌanka, zi trana in man ngirinnik neblahak, hendep man engiltitik gwe-gweꞌak.
⁴³ Wenya hen dekam man ang gwese haꞌak. Zen dua-blas tahunkam karekkam aura gwe-gwek. Zini man sap dawem gun hup naka gwibik, hwena hom kim mae dawem gwe-gwek.
⁴⁴ Wenya in ki zep Yesussu tahan nakon golek de tazak, zao zep baju sihi top nakon olk ta sonek. Dekam zep hendep kala in tewesibik.
⁴⁵ Yesus ki zep takensibiridaka, “Asa an nara olk tanda?” Tingan man eguk, “Ëe home.” Petrus ki zep ding gulbluka, “Bian, zini an beya tangan nakake! Man-am emsa dot dasil.”
⁴⁶ Hwena Yesus ki zep gubiridaka, “Hwena ahana man asa olk tala, sap Ëe ama anakan eisbirin, ‘Zini man Asa de olk tankam dawem gwenda.’”
⁴⁷ Wenya in dekam zep enlala gwek, “O hare mes-am asa dam gulsunda!” Zen dekam zep yal-yala ban Yesus mo nwenak ik gwe hezak, dekon zep tingare zi mo ngirinnik iwe ton seblak, “Ëe dawem gwen habe dwam gwer, zebe Emsa olk tal. Ano kala dekam zep hendep tewesinin.”
⁴⁸ Yesus ki zep kwasang tola ban gubirki, “Anyan, em ema Asa taibliblala, in zebe dawem gwenda. Aha-ere enlalakam song gwe.”
⁴⁹ Yesus in kim nama ola tonꞌanka, Yairus mo gola kon ki zep zini hata zaka, ki zep Yairuꞌu gublu zaka, “Eno wenamna mes tol tilsinin. Bahem etan Bian Gurusa blostablan.”
⁵⁰ Hwena Yesus kim kirekam salka, dekam zep Yairuꞌu gubluka, “Bahem airin. Asa em taibliblan, zen dekam sa eno wenamna ngaya gwer.”
⁵¹ Golak kim goleyaing gweka, Yesus dekam hom aha zi niban de golebiti gwen hap gubiridaka, diki Petrus, Yohanis, Yakobus, hen wenam tola in mo ane-bia ensa.
⁵² Zewe tingare zini wenam tola insa gosa dabiꞌik, hwena Yesus zep gubiridaka, “Gona olzausuk. Wenam tola in hom til. Zen nisi am taꞌan.”
⁵³ Hwena man swre daꞌak, sap zen mes wenam tola insa tame nuk, “An mes-am tangan tilke.”
⁵⁴ Hwena Yesus wenam tola in mo aha taha naka zep teisyabir ineka, deban zep gubirki, “Time, em luwen!”
⁵⁵ Wenam tola in mo maumnu dekam zep etan hata zaka, hendep dekam zep luwek. An-bi zemka dekam zep tembanesa de olbin hip guzimki.
⁵⁶ Zeno ane-biana man tangan lenggwanblak. Hwena Yesus man jalse gwizimki, “Owasna an zen ki lwanan, bahem ahasa lonbiridan.”