¹ Aha yaklakam Yesus Biansa gu soneblaka. Kim hya gwesiki, ki zep hwena zere hon de ang ta gwen wenya in ahanik gubluka, “Bian, asa Emki hen ol gu sonensa tawa tabin– men kirekam baptis ta gwibin zini Yohanis Swe zere hon de ang ta gwen wenya tawa ta gwibirkike.”
² Yesus ki zep ding gulzimki, “A kirekam em egu sone gwen: Bian, dikire eno bosena teip nulsuk gwek. Diki okamana awe Em hen irik gilzin.
³ Abe mae hap tembanena mwin-mwankam gol gwizim.
⁴ Ano mae mo karek-karekna ap tap gulsuzim, sap karek-karekna mensa aha zi abe mae hap nol gwizimnin, ee ama desa eititi ei gwibirin. Hen asa de akasibiridannak bahem nwe enkam asa kara ta gwibin.”
⁵ Ki zep etan Yesus ayang gulzimki, “Hwena emki eenlala gwen: Eme ki ahanik wal bose uk mo gol san ngirin tatem song gweꞌanam– zao de abe tan hap, ‘Wal bose, abe hap tol tembanena golbla.
⁶ Ano aha e nakore wal bosena ner hom ano golak tilin zala, hwena ano tembanena hom– zebe hap de desa golblan hapye.’
⁷ Hwena wal bose om in maka ep ding gulbluꞌara, ‘Bahem asa blostablan. Lilikinni mese solhlasindal, hen ee ama walas naban nisi goletruweꞌan. Ëe molye luwek– ebe hap de tembanesa golblan hapye.’
⁸ “Ëe ama emsa gubiridaꞌan: Zini in sap hom anakan dwam gweꞌara, ‘Zen ano dokot. Ëe anik mas gweblak,’ hwena eme saher ing gul sonen sremkam aberbe ta tineꞌanam, zen hendep dekam maka luweꞌara. Em men desae zebon dwam gwibiꞌinam, hendep dekam maka ebe hap golblaꞌara.
⁹ Zen in zebe emsa gubiridaꞌan: Em Alapsa aberbe ta tine gwen, dekam sa ep golzimdi. Em teibir tine gwen, dekam esa hendep hla kul. Lilikinsi em gaꞌga so tine gwen, dekam sa ebe hap lilikinni talusuk gwizimdi.
¹⁰ Sap zini men zen abe gwe-gwenna, zen gul irinkim. Men zen tei gwibinni, zen hlaunkum. Hen men zen lilikinni gaꞌga so gwenna, zebe hap talusublunkam.
¹¹ Ere mo tane de emsa hogwe hap abe taꞌanam, san ha emaka wanyana golblaꞌara?
¹² Ayang sik hip de emsa abe taꞌanam, san ha emaka dare eksa golblaꞌara?
¹³ Em sap jal-jala, hwena eno anakare kwasang enlalana hen ki, ‘Ëe anik dawem naka ere mo walas hap golblak.’ Hen kirekam– nere mae mo Bianna ngatan zi mo langnak de Zini: Desa de abe tankam Zen dawem naka gol gwizimnira, hendep zere mo Enhosa hen hle ta sone gwizimnira.”
¹⁴ Aha yaklakam, Yesus ol ton gwen srem zi nikon dowalsa zeralsa soneka. Dowala in kim wet soka, zini in dekam zep ola tonka. Zi trana in zen zao lowe heꞌak man tangan denggwanblaꞌak.
¹⁵ Hwena Farisikam de zini ki zep zi trana in mo inik etonꞌanzak, “Zebe hap mes dowal mo kigina Beelzebul Bak sosonna golblaka, in zep zeno sosonkam aha dowal-dowala zeralsa sone gwibiꞌira.”
¹⁶ Hen ahakon, men zen Yesussu saher tan hap dwam neblaꞌak, zao hen lowe heꞌak. Zen zep abe dak, “Emki ngli nakore owassa ap syal gwibir-zimdin– ee akakim emsa dam lasik, ‘An eiwa Alap zer soneka.’”
¹⁷ Hwena Yesus mes zeno mae mo enlalana tame tazimki, ki zep ola gulk sun blaonzimki, “Aha-ere irik gin nik de hlik-hlik gweꞌanam, zen de eeijaꞌanam, zen molya etatete gweꞌanam. Nabakam maka zenaka timbwas nuꞌin. Hen zenaka de gil-gil gwibiridan nakon de aha-ere golak dinik hliweꞌanam, zen maka hendep sekwak gweꞌan.
¹⁸ Zep hen kirekam, dowal mo kigi mo irik gin nik de hliweꞌanam, etan zenaka de goleeijan hap, zen molya eholo gweꞌanam. Zep Ëe dowal mo sosonkam home dowal-dowala zeralsa sone gwibiꞌin– in kirekame asa lonsublu sanye.
¹⁹ Ki ahakore Farisikam de zini zen hwena nara mo sosonkam nakasik gwibirin? – dekam de dowal-dowalsa golealsa sonebin hipye. Zep ere mae mo ahakorena in maka emsa anakan nenbiridaꞌan, ‘Em ema ekarek gwer– kirekam de Yesussu tonsublunkamye.’
²⁰ Hwena Ëe dowala Alap mo sosonkame zeralsa sone gwibiꞌin. Zen dekon zep anakan dam gwesiꞌin, ‘Alap Zen de irik gilzin hap angkam man sap kon gwisibir hanaꞌara, hwena em ema desan de ang tan hap baes taꞌan!’
²¹ “Sap Ëe dowal mo kigi mo bi gwibin kire-kire dawemsae jal zi mo kim alal ta gweblaꞌan. Zi jal-jal de zere mo golsa kara taꞌanam– gwetap tangal inen naban, zebe hap de jal zini na-en molya tiꞌin zanam.
²² Zini in dekam maka zenaka anakan enlala gweblaꞌara, ‘Jana ngi ben-ben hap sa asa airiblala.’ Hwena zeno jal zi mo soson de taman kiniꞌanam, zen maka golak tilbliꞌan zala, hen maka zeno jana tanena insa alal tablaꞌara. Dekam sa jal zini in zeno kire-kirena alal tablala, hen dekam sa zere korena kip kae gwebla-zimdi. Ëe hen kirekame jal zi mo kim awe gweꞌan, zebe dowal mo kigi mo irik gin nikon zisi alal gul gweꞌan.
²³ Hwena em de Asa zerzaun sremkam, em ema aban erdarak gweꞌan. Hen em de Asa mas gweblan sremkam, em ema ano syala tru-tru uꞌin.”
²⁴ Yesus ki zep tawa tabirki, “Dowal de totoresa zi nikon wet sonna, dekam gwana-gwana san sa hakalada gwera– zao de aha zi maenak tin hip. Hwena aha maenak de tin sremkam, dekam sa dowala in enlala gwera, ‘Ëe asa etan ere mo gol hli tan san dep lwahal.’
²⁵ Kim de lwa haꞌan zaka, gola insa anakan sa hla ta zala, ‘O ano epba gol gwe gwenna mes tangan gol bina oto tasiki hen ngan tasiki.’
²⁶ Dekam sa dowala in song gwera– aha dowalsa de zere onakon de jal-jal taman kinin tangan naka tuju enkam kwang guluda halzan hap. Deban kim de zini iwe golebiti gweꞌan zaka, zini in mo gwenna dekam tangan sa karek gweblal– nonol gwen nakonye.”
²⁷ Yesus kim kirekam gubiridaka, wenya ki zep mamkam gu anek, “Wenya men zen emsa jaha gwek hen momkam taizi gwek, zen eiwa heꞌho gwibin nika hlauk.”
²⁸ Ki zep ding gulbirki, “Sap eiwa, hwena diki zini men zen Alap mo ola esane gwe-gwenan hen syal nei gwibirin, zen zen heꞌho gwibinnik lowehe gwenan!”
²⁹ Zi trana kim etan emas-mas gwe-gweꞌanzak, ki zep etan ayang gulzimki, “Angkam de zini em eiwa jal-jal tanganna. Em hwena owassa de ebe mae hap syal gwibir-zimdin hibe Asa aberbe la gwenan. Hwena angkam bejene syal gwibir-zimdin. Diki ngein sin de yaklanak asa aha-en syal gwibir-zim: Men kirekam Yunus hon lwakke.
³⁰ In kirekam owasna e yala Niniwek de zi hip Yunus Bak hon lwakke, orapna dan-ahan de hogwe ungala mwanak gwenkam, ngatan zi mo lang nakore Zi Tanganna Abon hen kirekam sa owasna lwal– angkam de zini em de hen hlaun hupye.
³¹ Alap de aumwa hap angkam de zini emsa klis gunnuk, selatan kore teipsinkim de wenya in, zen sa hen olsa de mas gun hup zaul– men zen orep teipsin zini Salomo Baksa duwebla zakke. Zen dekam sa anakan emsa swre tabir, ‘Ëe ama langa en nakon Salomo mo enlala blala kore olsa de sane gwen hap hatak. Hwena ebon mae onak kim ngatan zi mo lang nakore Zi Tanganna hataka, em hwena ema asalsik gweblak.’
³² Hen kirekam, Alap de aumwa hap angkam de zini emsa klis gunnuk, dekam Niniwek de zi mo angna sa olsa de mas gun hup ezaul. Zen dekam sa emsa anakan swe dabir, ‘Yunus Bak kim ehalen hap de ola ban abon mae golhataka, ee dekam ama ehalek. Hwena ebon mae onak kim ngatan zi mo lang nakore Zi Tanganna ehalen hap de ola ban golhata zaka, em hwena ema ehalen hap baes tak.’”
³³ Yesus Zen kirekam ola gulk sun blaon gwizimki, “Zini hom pelita ngatannak yuna utuk nul sone gwenan– dekam de ngatanna insa aning gun hupye. Zen diki meja maenak nonne gwenan– dekam de ngatannak zini zi niban goleteinikirin hipye.
³⁴ Nwena zen tim hip de lilikin– enho dikim ngatan gwen hap. Nwe nik de lalak nenna, dekam enhona hen ngatanna. Hwena nwe nik de hai nenna, enhona hen kawesin tanganna.
³⁵ In zep nwekam dawem enkam em ekara gwe-gwen. Eno mae mo ngatanna in mana kawesin hip jowenank.
³⁶ Enlala kawesin sremkam de enho ngatan gwenna, eno gwehan san dekam ngatan en sa lwa gwer– lampu de zil inen makan.”
³⁷ Yesus kim aisil tonbiridanna golzausuku, Farisi walya ki zep zeno golak de goletembane tan hap abe taka. Yesus ki zep golebiti gweka– zao de tembane tan hap.
³⁸ Farisi walya in man ze Yesussu tenggwanblaꞌanka, sap Zen hom tembane gwen hap de nonol tahasa su tazimdin sin ang gweꞌanka– men kirekam Yahudi mo auyan-aza mo epba olak lwakye.
³⁹ Hwena Bian Yesus zep ding gulbluka, “Eiwa, em an Farisikam de zini eno mae mo lowe henna mae makan: San de zi de piring-moksa e-en nakon ngan tasik gwibinni, hwena olk san bejen. Ere mae mo timni hen kirekam. Em sap ema tahan sopna ngan lasik gwibirin, hwena olk kon eno mae mo enhona mes beya gweka– kire-kire beya gwen hap de hole-hle enlalakam hen jal-jal enlalakam. Em ema desa de hen ngan tasin hip baes taꞌan!
⁴⁰ Em an eiwa enlala joblo-top tanganna! Alap mes ki syal gwibirki– tahan nakon dep dena insaye. Hen olk kon dep dena mes syal gwibirki. Desa hen man kara gulzimꞌira.
⁴¹ In zen eno mae mo enhonak kire-kire beya gwen hap dena lwaꞌan, desa eititi eibik. Dekam ere mae mo kire-kirena tahalha wenyaka kim kae eibiridak. Zen dekam sa eno mae mo timni hendep enho naban Alap mo nwenak engan gweher.
⁴² “Farisi zi, kwasang tol! Em engalap gwen, sap em karekna mam wenyaka esa oltower. Em sap ema nganak de kire-kire betekna Alap hap de hlikna ol gweblanan, hwena Alapsa de ensa lwablanna hen zi bose omka de dawemkam golelowe henna, desa ema eititi ei gwibirin. Zen diki zen– bol-zaun tangan wenyaye. Zen diki nonol desa emaka syal ei gwibirin. Zao etan nganak de kire-kirena insa lun em hen mas gul gweblan.
⁴³ Farisi zi, kwasang tol! Em engalap gwen, sap em karekna mam naka esa hla kul. Em but srem gol-golak ngeinnik de komal tum dawemnak de teinikirin hibe edwam gwe-gwenan. Hen em ema edwam gwe-gwenan– zi de tagal gwen maenak anakan emsa gubirida gwen hap, ‘Dawem, bian guru.’
⁴⁴ Em karekna mam naka esa hla kul. Em in men kiye– gol taublun sremkam de zi tok dre nwanunna. Desan de zi song gwenna, dekam bejen tame gun, ‘Ëe zi tok tahan sane zauk ane kinil.’ Zep em hen kirekam. Zini man emsa tim di gwibirin, ‘Zini an dawemna,’ hwena enhona ase naban.”
⁴⁵ Dekam zep hwena Musa mo titi tabin olsa de tawa ta gwibin zini gubluka, “Bian, insa kirekam Farisikam de wenya jalse gwibiridala, in asae hen lamang tabirida!”
⁴⁶ Yesus ki zep hwena ding gulbluka, “Kwasang tol, em hen Musa mo titi tabin ol tawa ta gwibin zini! Em engalap gwen, sap em hen karekna mam naka esa oltower. Eno mae mo tawa tabinni man nwe-mase gwe-gwenan– san de zi de aha zi hip nihin dohon-honsa mam enkam wewek ta sone gwizimdinni kiye. Sap em ema Musa mo titi tabin olak etan ere mae mo aha titi tabinsi mas-mas ul zahe gwenan, zep tangane hendep dohon-hon la gwibirin. Ena hwena home desan ang ta gwenan.
⁴⁷ Em engalap gwen, sap em karekna mam naka esa hla kul. Sap em in zi tamera gwen zi mo wei-wik gun walas! Eno auyan-azana Alap mo olsa de ayang gul gwizimdin hip de zini man damera gwek. Em hwena angkam desa de lo tasik gwibin golsae sam-sam la gwibir-zimꞌin.
⁴⁸ Hwena em insa kirekam syal ta gweꞌan, zen man nwe-mase gwe-gweꞌan– san de auyan-aza oban de anakan enlalasa siri tanna kiye, ‘Em sap esa lamera gwer. Ëe asa hwena lo lasik gwibir.’
⁴⁹ Zen in zep Alap zere mo enlala blalkam guku, ‘Ëe asa ere mo olsa de ayang gul gwen hap de zisi lup gul sone gwizim. Ahakon sa karek da gwibir, hen ahakorena sa damera gwer.’
⁵⁰ Zen in zep sa Alap angkam de zini ebe mae hap karekna serkam golzimdi– kitak de zeno ol ayang gul gwen zisi de tamera gwen hap de karekna, nonol lonesen nakon hendep angkam dena. Nonol lonesen nakon kim Kaen Bak Habelsa taka, dekon hendep eno auyan-azana Alap mo ol ayang gul gwen hap de zini man damera gwek, hendep aumwa hap Zakaria Baksa Alap mo gol mwanak dak. Zen Alapsa de airiblan sremkam Alap hap de tweran nin ang gulsuk gweblan kals alpnak dak. Ëe ama emsa gubiridaꞌan: Kitak de zi tamera gwen karekna insa Alap mes lam gulku– dekam de otan ere mae hap ngero gulzimdin hip!
⁵¹ (11:50)
⁵² “Musa mo olsa de tawa ta gwibin zini, em engalap gwen, sap em karekna mam naka esa hla kul! Em sap Alap mo nwenak dikim esam gwesin hip de orana tawana, hwena em home desan ang ta gwenan. Hen zini men zen sap desan de ang tan hap edwam gwe-gwenan, hwena eme zebe mae hap orana layalsik gwizimnin.”
⁵³ Hendep dekon, in kim lwasek, dekam zep Musa mo titi tabin olsa de tawa ta gwibin hip de zi niban Farisikam de gubirida gwen zi niban zi tra mo inik Yesussu serkam donsuk gweblaꞌak. Hen dekam zep u siweblan hap dakensibli tine gwek–
⁵⁴ anakare enlala naban, “Zeno ol-gun mae de karek gweꞌak, dekam esa klak lal.”