¹ Yesus kim tawa tasibirki, ki zep Kapernaum sun dep song gweka.
² Zao Roma mo jana nabare zi mo mamna ki. Zebon de babu gwen zini man serkam sang-sang gweka, hendep tin hip alp gwesiꞌinka. Jana nabare zini in man tangan anakarekam ngalap gweblaꞌanka, “Bap zen tol tin.”
³ Zen kim salblaka, “Yesus awe gweꞌara,” zen dekam zep Yahudi zi mo mam-mam naka gubiridaka– zen de Yesussu abe tan hap, Yesus de zi sang-sangna insa dawem tazan hap.
⁴ Zini in kim zeno abe naban Yesus hon yaing gwezak, dawem enkam zep anakan abe dak, “Jana nabare zi mo mamna in dawemna. Emki mas gweblan.
⁵ Zen sap aha zi wal, hwena zen man nere korena ansa kwasang gwibirida gwenda, hen zen mes te-alana zerzimki– neno mae mo but srem golsa dikim taun hupye.”
⁶ Yesus ki zep zebon mae onak ang gweka. Golak dep kim golegolek de gweꞌanka, jana nabare zi mo mamna in ki zep ahakore naka gubiridaka– Yesus hup dikim zeno olsa anakan ayang gulblun hap, “Zen man emsa gublula, ‘Bian, Em bahem Enaka karek tan– ano golak de hatankamye. Ëe ama Em de ano golak sewen hap saher gweꞌan.
⁷ In zebe baes gwer– aen de Ebon hatazan naye. Hwena anakan-en Em gun, “Zi sang-sangna in zen dawem gwen,” dekam sa dawem gwera.
⁸ Sap ee mese Emsa taibliblak, “Eno ol-gunnu bejen kirekam lwa srem gwen.” Sap abon onakon de teipsin zini ki. Ano otdenak dena hen ki. Ëye ere mo otdenak denaka gubluꞌanam, “Em song gwen,” zen dekam maka song gweꞌara. Hen ahanakae gubluꞌanam, “Haen,” zen hen dekam maka song gweꞌan zala. Ëye ere hon de babu gwen zisi gubluꞌanam, “A desa syal gwibir,” zen dekam maka hendep syal gwibiꞌira. Ëe sap teipsin tola, zep ano ol san kirekam ang ta gwenan. Hwena Em in teipsin tanganna, zep eno ol san sa ki kirekam lwal.’”
⁹ Yesus man tangan tenggwanblaka– zebon onakore olsa de kirekam sane gwenkam. Dekam zep zi trana in zen ang neblan daꞌak, desa lero gwibiridaka hen gubiridaka, “Eiwa, zini in man Asa taibliblaꞌara. Ëe home mae Israelk kirekam de serkam Asa taibliblan zini zertowek.”
¹⁰ Zen kim etan jana nabare zini in mo golak dep lwanda halzak, dekam zep babu gwen zini insa hla dak, “Eiwa, zen mes tangan dawem gwenda.”
¹¹ Zao hom holo gweꞌak, Yesus ki zep ena Naen san dep song gweka. Zere hon de ang ta gwen wenya hen aha zini beya nik ang neblak.
¹² Yesus kim e top wet so kininnak golek de gweꞌanka, zao zep goletoweꞌanka– zi beyana kim wal seiwir tokna berya ban dre nwanun hap nerte soꞌanzak. Wal seiwiri in zen tilki, zeno anena semna, hen zeno walasna ahana hom.
¹³ Bian Yesus kim we semna insa hlaulku, Zen man tangan kwasang gwibirki, ki zep gubirki, “Anyan, bahem gona gweblan!”
¹⁴ Ki zep berya insa golek de so zaka, ki zep olk soka. Men zen neiren haꞌanzak dekam zep nerzausuk. Yesus dekam zep walas tokna insa gubluka, “Tane tol, Ëe ama emsa gubluꞌan, em luwen!”
¹⁵ Wal seiwir tokna in ki zep luweka, hendep nikinꞌinka, dekam zep hendep ola tonꞌanka. Yesus ki zep an zemka gubirki, “An de– eno walas naye.”
¹⁶ Dekam zep tingare zinik airinni hatazimzik, hen dekam zep anakan Alapsa boltere daꞌak, “Alap mo olsa de ayang gul gwizimdin hip de zi yawala an mes neno mae mo ngirinnik hata zala! Alap angkam man kon gwisibir hanaꞌara– zere mo hlil irin zisi de oto gulsunkumye!”
¹⁷ Yesus hup de ola dekam zep etan langa gwesik haladak– tingare Yahudi mo lang san hen zeno alpnak de lang san.
¹⁸ Tingan in desa ki Yesus syal gwe-gwibirki Yohanis hon de ang ta gwen wenya dekam zep Yohanissi bwinak nen gublu hana gwek. Dekam zep hendep etan dan-dan de aptazan hap gu soneka.
¹⁹ Desa zep guzimki– Yesussu de anakan lakensiblin hap, “Bian, Em an san ha Zen tangan? – men Desa anakan nen guk gweblakye, ‘Israelsa de oto gulsun hup de Zini sa hata zala.’ San ha ee asa etan ahanaka kara eblal?”
²⁰ Yesus hon kim apta zaka, ki zep enblaka, “Asa baptis ta gwibin zini Yohanis emsa de anakan lakensiblin hap guzimki, ‘Em an san ha Zen tangane ki hata zaka? San ha ee asa ahanaka kara eblal?’”
²¹ Dekam Yesus zi sang-sangna beya naka dawem ta gwibiꞌinka. Sap dowal de tilblinna, hen nwe diminni, Zen tingan dawem ta gwibiꞌinka.
²² Yesus ki zep ding gulzimki, “Sap esa etan Yohanis osan dep olahala. Mensa ki ena sane era hen hla kuli, desa anakan enbla, ‘Zi nwe diminni man ekara gwe-gweꞌak. Lek-lek wenya hen man sek gwe-gweꞌak. Sop sang-sang karek nabare wenya man hen edawem gwe-gweꞌak. I mat wenya hen man esane gwe-gweꞌak. Tok-tokna hen man engaya gwe-gweꞌak. Hen Alap onakore ol dawemkam man tahalha wenyaka tawa ta gwibiꞌira.’
²³ Hen anakan enbla, ‘Abon onakon men zen esyalhe srem gwe-gweꞌan, zen heꞌho gwibinni zebon mae lwaꞌan.’”
²⁴ Baptis ta gwibin zini Yohanis hon de ang e gwen zi darena in kim nama ehaꞌanka, Yesus dekam zep hwena Yohanis hip dena zi beyam-byana in hap srip gulsuzimꞌinka. Man ze gubiridaka, “Yohanis kim zi ol srem langnak tawa ta gwibirki, em ba habe desan sek gwe-gwek? Basa de ze hlaun hup? San ha ema etim gul gwek? – ‘Ëe desan asyas habe sek gweꞌan.’
²⁵ Em ba habe desan sek gwe-gwek? San ha ema etim gul gwek? – ‘Ëe pakean dawem ala son nabare zisi de ze hla tan habe sek gweꞌan.’ Kire hap desan bejen. Sap kirekam de zini– men zen tahalha sremkam lowehe gwenan, zen zi srem langnak hom. Zen diki teipsin zi mo e yawalak lowehe gwenan. Zi srem langnak bejen.
²⁶ Zep em ba habe zi srem lang san dep sek gwe-gwek? Em sap diki Alap mo olsa de ayang gul gwizimdin hip de zisi de ze sane tan habe sek gwe-gwek. Hwena baptis ta gwibin zini Yohanis in, zen Alap mo olsa de ayang gul gwen zi nikon man tangan taman kinika.
²⁷ Sap Yohanis in zen– Israelsa de ngaya tabin hip de Zisi de ngeirblizan zi niye. Sap Alap man ngaya tabin hip de Zini insa hamal hap anakan gu-gubluka, ‘Ëe asa Emsa de ngeir gublun hap zisi zer soner– zen de nonol ere mo olsa ayang gul gwizimdin hip, ebe hap dikim orasa sal ta gublun hap.’”
²⁸ Etan ki zep gubiridaka, “Eiwa, okamanak de zini, sap nonol lonesen nakon hendep angkam em an zene lowe heꞌan, Alap mo nwenak de edakastinni, hom tangan ahana– Yohanissi de kwe ta sone kinin naye. Hwena sap kirekam, men zen angkam Alap mo irik ginnik Asa de taibliblan nakon biti gwe-gweꞌan, sap bose srem wenya, zen diki zen– Yohanissi de kwe ta sone kinin wenyaye.”
²⁹ Yesus mo ola insa de esankam, tingare zini, hen sap Roma mo irik ginnik dep de pajak te-ala alal tanda gwen wenya, man eisrip-sri gwek, “O hare Alap eiwa zere mo dwam gwibin sin am kirekam Yohanis hon syal gweka.” Sap zen man Alap mo zebe mae hap de dwam gwibin sin ang tak– zen kim Yohanis mo baptis tabinnik ang takye.
³⁰ Hwena Farisikam de zini hen Musa mo titi tabin olsa de tawa ta gwibin hip de zini, zen man Alap mo zebe mae hap de dwam gwibinni baes neibik, sap zen man Yohanis mo baptis tabinni ja nuk.
³¹ Etan ki zep Yesus ola gulk sun blaonzimki, “Angkam de zini, em in men kiye– walasna.
³² Walas tane-ne de pasarak teinikirinni, dekon de asyas bose zemka gubiridanna, ‘Nen isrip-sri hap de terya ban asyas tan.’ Hwena zen maka ding nulzimꞌin, ‘Ëe ama baes taꞌan.’ Dekam de sap etan gubiridanna, ‘Ki zi toksa de gweblan makan nen asyas tan.’ Hwena dekam hen maka ding nulzimꞌin, ‘Ëe ama kirekam hen baes taꞌan.’ Angkam de zini em hen kirekam. Em ema kitak Alap mo syala baes ei gwibirin.
³³ Sap Alap kim baptis ta gwibin zini Yohanissi ebe mae hap zer sonezimki, zen Alap dikim sosonsa golblan hap man tembanena lwa gweka, hen angguru hom otde gweka. Hwena em ema baes e gweblak, hen anakane lonsuk gweblak, ‘Zen dowal bi gweblaka.’
³⁴ Ki zep hen ngatan zi mo lang nakore Zi Tanganna Asa zer sone zaka. Ëe hwena home tembane naban angguru ban lwa gwenan. Hwena Asa hen ema baes e gweblaꞌan, hen anakane Asa lonsuk gweblanan, ‘Zini insa emki hla tan! Tembane ngalap-ngalapna hen anggur otdebin sosonna. Zeno wal bose walya Roma mo irik ginnik dep te-alasa alal danda gwenan, hen ahakon enlala kwae naban!’
³⁵ Hwena Alap kirekam zere mo enlala blalkam sren-srenkam de syal ta gwen hap lup gul sone gwenda. Zep men zen de Alap mo enlala blal san kirekam ang taꞌak, zen zen sa eiwa de ora san ewet so kini gwer.”
³⁶ Farisi walya bosena Simon, zen man Yesussu zeno golak de goletembane tan hap gubluka. Yesus ki zep ze goleteinikinꞌinka.
³⁷ Hwena ena iwe, kahalo soson wenya hen ki. Zen kim sak, “Yesus zeno golak tembane gweꞌara,” zen dekam zep serkam de irase dawem nabare minyak botol aban golhatazak– Yesussu dikim hle tablan hap.
³⁸ Zen serkam tangan Yesus hup kwasangna goltreblak. Nonol zen zeno tana gwe sonen nakon zauꞌunzak. Dekon gosa gweꞌak. Hendep nwe go-hokam Yesus mo tanasa bleble soꞌak. Zere mo nol ala blal-blalkam zep etan sasa soblak, deban bolk-bolk soblak, dekam zep ze hwena minyakna inkam hle tazim-blik.
³⁹ Simon kim hlaulku, zen ki zep enlala ennak Yesussu tonsubluꞌanka, “Zini an eiwa de Alap zer sonenanam, zen maka anakan tawa gwibiꞌira, ‘Wenya an zen asa olk taꞌan, zen kahalo sosonna.’ Maka anakan jalse gwibiꞌira, ‘Bahem asa olk tan.’”
⁴⁰ Yesus ki zep Simonsa gubluka, “Simon, ola sap ki– Ëe de desa emsa gublun hap denaye.” Simon ki zep ding gulbluka, “In airis, bian, sap esa asa gublula.”
⁴¹ Yesus ki zep gubluka, “Zini dan te-ala beya nabare zi nik man te-alasa bohe laka, ahana lima-pulu jutakam, ahana lima jutakam.
⁴² Hwena zi darena in etan bejen mae olblan. Te-ala beya zini in ki zep guzimki, ‘Ëe home eno nik mo te-ala bohe unni insa enlala gwibiꞌin.’ Hwena zi darena in kon, nara wehe te-ala beya zini insa mamkam kwasang gweblaꞌanka? San ha betekkam de bohe tan zini? San ha mamkam de bohe tan zini?”
⁴³ Simon ki zep ding gulbluka, “Ëe ama enlala gweꞌan, men zebe hap te-alana mamkam tap tasiblika, zen zen sa serkam kwasang gweblala.” Dekam zep Yesus gubluka, “In eiwa.”
⁴⁴ Ki zep hwena wenya insa lero gwibirki, ki zep hen Simonsa gubluka, “Wenya ansa wehe hlaulu? Ëe sap eno golake hatal, hwena em home hona hamal gulu– ano tanasa dikim ngan sosun hupye. Hwena wenya an mes zere mo nwe go hokam ano tanana ngan sosul, deban mes zere mo nol alakam sasa sol.
⁴⁵ Em home asa babang tala– ee kime awe til zilye. Hwena wenya an, Ëe kime awe hatazal, zen man ano tanana bolk-bolk so tiner.
⁴⁶ Em home ano nola minyak zaitunkam draulu– Asa de dokwak ta gun hupye. Hwena wenya an mes irase nabare minyakkam ano tanana hle tazim.
⁴⁷ Zebe emsa gubluꞌan: Wenya an mae hap kwasangna mamkam abe hap goltreblal: Sap zen mes anakan tame gul, ‘Ano karek-karek beyana mes namen ap tap gulsubirida.’ Hwena zini men zeno mae mo betekkam de ngip gul gwensa tap gulsuzimdinni, zen betek enkam sa ap kwasangna noltre gweblal.”
⁴⁸ Yesus dekam zep wenya insa gubirki, “Eno karek-karekna mese ep tap gulsubirin.”
⁴⁹ Ahakon men zen zewe teinikinꞌik dekam zep enlala ennak Yesussu donsubluꞌak, “Zeno karekna insa tap gulsubin hip gunda, zen man kil giꞌira, ‘Ëe an Alap han apdenak.’ Kirekam insa gunda, zen Alapsa lamang tanda.”
⁵⁰ Hwena Yesus ki zep wenya insa gubirki, “Em mese Asa taibliblanda, em zebe ngaya gwenda. Wake, amki aha-ere enlalakam song gwe.”