Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb lun mula' ineh nengerieng Yésus sikal ninger bala Allah, kareb Ieh netuped déi' tangeb Takung Genésaret,
2 idi Ieh nenier dueh alud inabet déi' tangeb takung ineh; iamo' lemulun luk ngerabat ineh pangeh netemurun rat bang alud ineh maru' rabatdeh.
3 Yésus netemaleb bang aceh alud, ieh ineh alud Simun, idi Ieh nemutuh neneh ngatad alud ineh mado sesuut rat ku tangeb. Idi Ieh netudo nemada' lun mula' ineh rat bang alud.
4 Pangeh Ieh nugka' mada', idi Ieh nepebala ni Simun, "Do' amé' su luk medalem idi mepet rabatmu pad iko ngalap lawid."
5 Idi kebala Simun, "O Tuhan, kedangan-kedangan kai nengerabat, sebuleng pana' nateh luk ilap kai; iamo' ngaceku ratnan ecukMu ui miak mepet rabat ineh."
6 Kareb pangeh rabat ineh pipetdeh, idi ideh nengalap lawid pelaba ula', pad rabat ineh lélé nedarak peh.
7 Idi ideh nengayep lun dengandeh luk bang alud baken ineh amé' ngeruyung nedeh. Idi ideh nacing idi nemanu' dueh alud ineh, pad macing lélé turem.
8 Kareb Simun Pétrus nenier ineh, idi ieh netekeradung pa kiung Yésus, keburi'neh, "O Tuhan, buro rat negku, ngaceku ui lemulun luk panu' ku sala'."
9 Simun idi lun denganneh pelaba awa, ngaceku mula' lawid luk ilapdeh.
10 Kudeng ineh teh Yakub idi Yahya, anak Sabdi, luk mepad kekamen dengan Simun. Idi kebala Yésus ni Simun, "Aleg matot, rat pad kareb ini iko miak ngerabat lemulun."
11 Kareb alud pangeh rinuiddeh amé' tangeb, idi ideh nenecan amung-amung ineh idi nemaya' Yésus.
12 Kareb Yésus bang aceh bawang, inan aceh lemulun luk mét susud dengan pelaba bura'. Kareb ieh nenier Yésus idi ieh netekeradung idi nemutuh Neneh, keburi'neh, "O Tuhan, kudeng Iko pian, miak Iko ngedo' negku."
13 Yésus nenatang ticu'Neh idi nengakem neneh, kebalaNeh, "PianKu, do' iko meligan peh!" Idi petacu susud ineh nepali'.
14 Idi Yésus neperiteteng neneh, "Aleg iko mala kuan seburur lemulun pana', iamo do' iko amé' mada' bururmu siren lun imam, idi maré luk barén mangun ku liganmu, maya' kudeng luk icuk Musa, pad ngegala' kuan lun mula' ratnan iko pangeh nedo'."
15 Iamo' meluun mepiar bala ratnan Yésus, idi pelaba ula' lemulun nepamung sikal ninger balaNeh idi pian uen ngedo' ratnan étdeh.
16 Iamo' Yésus iné' su luk ali-ali idi nesembayang.
17 Bang seaco kareb Yésus nemada', inan tuda'-tuda' lun Parisi idi guru Ukum tudo déi', luk nacing rat anid-anid bawang bang babpat Galilia idi Yudia idi rat Yerusalim pana'. Idi lalud Tuhan idi luun Yésus, pad Ieh nengedo' nelun mét.
18 Idi inan teh seburur lemulun luk mét naté urat luk binirir, idi ideh nenakap dalan sikal nguit neneh semuet pad ngerareng neneh pa kiung Yésus.
19 Iamo' ideh na miak nguit neneh semuet ngaceku lemulun pelaba peri'. Idi ideh numak iné' luun apo ruma' ineh, idi ideh nengukab apo idi nengurur neneh arangdeh bang birirneh pa kiung Yésus.
20 Kareb Yésus nekali' anudeh ineh, idi Ieh nepebala nan lemulun ineh, "Iko pangeh nengalap do' ratnan sala'mu.
21 Idi guru-guru Ukum idi lun Parisi nepebala arangdeh sebuleng, "Idéké lemulun luk nguyo ini? Idéké miak maré do' ratnan sala', iamo' Sebuleng mo', ieh ineh Allah?"
22 Iamo' ngaceku Yésus nekali' terawédéh, idi Ieh nengitun nedeh, "Ngudehké muyuh ngerawé luk kudeng ineh?
23 Sapehké luk meluun malé belén, 'Iko pangeh nengalap do' ratnan sala'mu,' kian, 'Tumui idi nalan'?
24 Iamo' pelé muyuh kali' idi Anak-Lemulun ngimet lalud bang tana' ini maré do' ratnan sala'," (idi keburi'Neh kuan lemulun luk mét naté urat ineh) "Ui pebala kuanmu, tumui iko, ngiding luk inanmu rudap idi muli'."
25 Idi petacu ieh netumui pa kiung lun mula' ineh idi nengiding luk inanneh telubid, idi ieh nuli' idi nengerayeh Allah.
26 Idi amungdeh ineh mawa idi nengubur Allah. Ideh nepanu' ku tot, kebaladeh, "Bang aco sini kai nekali' kekamen luk nan mawa!"
27 Pangeh ineh Yésus neremuat, idi nekali' aceh lemulun luk ngamung usin pupuk, ngadanneh Liwi, luk tudo bang ruma' luk inan ngamung usin pupu. Idi kebala Yésus neneh, "Do' maya' Negku."
28 Liwi netuped idi nenecan luk amung-amung, idi nemaya' Yésus.
29 Idi Liwi nenganau' aceh irau luk rayeh kuan Yésus bang ruma'neh. Idi déi' inan mula' lemulun luk ngamung usin pupuk idi lun baken teh luk tudo kuman dengandeh.
30 Idi lun Parisi idi guru-guru Ukum dureng-dureng kuan anak-anak sekola' Yésus, keburi'deh, "Ngudehké muyuh kuman idi ngirup dengan lun luk ngamung usin pupuk idi lun mesala' teh?"
31 Idi kebala Yésus, "Lemulun luk do' burur na ulek kuan lun ngubat, iamo' lemulun luk mét.
32 Baken Ui macing nawar lemulun luk matu iamo' lemulun luk mesala', pad ideh uren."
33 Kebala sebuang lemulun inan Yésus, "Anak-anak sekola' Yahya megéi mawa' idi sembayang, kudeng ineh teh lun Parisi; iamo' anak-anak sekola'Mu kuman idi ngirup mo'."
34 Idi kebala Yésus nedeh, "Miakké lun rurum deléi luk sikal ngaweh ineh duken muyuh mawa', kareb deléi luk sikal ngaweh idi dengandeh?
35 Iamo' aconeh miak macing, kareb deléi luk sikal ngaweh miak lapen rat arangdeh, idi kareb ineh teh ideh miak mawa'."
36 Yésus nemada' kuandeh aceh luk pinginud teh, "Na luk idi seburur lemulun luk narak sengirit kibung ratnan aceh kuyu' luk mebaruh, pad mubpul luun aceh kuyu' luk mon; kudeng nganau' kudeng ineh, luk mebaruh ineh pana' medarak, idi sengirit kibung luk mebaruh ineh na petulu dengan luk mon.
37 Idi na luk idi seburur pana' ngutang abpa' anggur luk mebaruh bang seréi kubil luk mon; ngaceku abpa' anggur luk mebaruh ineh miak mila' seréi' kubil luk mon ineh, idi abpa' anggur ineh pana' mutat, idi seréi' kubil ineh mepau teh.
38 Na! Abpa' anggur luk mebaruh meluun do' ruen bang seréi' kubil luk mebaruh!
39 Idi na luk idi seburur pana' ngirup abpa' anggur luk mon, idi miak melili ku abpa' anggur luk mebaruh, ngaceku keburi'neh, 'Luk mon ineh do' én'.'"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA