¹ Dawem Bian Teopilus Bak, Lukas onakon: Alap mensa orep nesa gu-gubirida gweka– zere mo Walassa de nep zer sonezimdin hip dena, Zen mes ki hendep ner hom neno mae mo ngirinnik kirekam syal gwibirki. Zeno awe de gwen hap dena angkam aisili an desae kon gwisibir hanaꞌan. Zini men zen nonol kon gwisibir hanan nakon zere mae mo nwekam hla nul gwek, zen zep aisili ansa zi-e zi-e san dep nol halada gwek. Dekam zini beya nik sap dawem enkam de aisili ansa ale gun hup eakasik gwek.
² (1:1)
³ Ëe hwena men zen nonola kon hla nul gwek, ee ama desa dawem enkam takensibirida gwek. Hen zen men desa ale nul gwek, ee ama desa baca gul gwek. Zen zebe hendep anakan enlala gwibik, “Aisili an ee asa Bian Teopilus hup dam-dam enkam ale gulblul– aha-en mae de hli yul guk kinin sremkam.”
⁴ Ëe mae habe ansa ebe hap ale gulbluk: Em ekakim anakan tawa gwe, “Nonol men desa emsa tawa da gwek, zen eiwa de tanganna.”
⁵ Herodes in kim teipsinkim Yerusalem mo langnak irik gilki, Alap mo golak de syal gwe-gwen zini bosena Zakaria, zen hen dekam zewe. Zakaria, orep de Alap mo golak de syal gwe-gwen zini Abia Swe mo hliknak hen syal gwe-gweka. We zem bosena Elisabet. We zik mo auyan-azana hen Alap mo golak de syal ta gwen zi.
⁶ We-zi darena in man tangan Alap mo nwenak oto eisik. Hen zen aha-ere enlalakam tingare Alap mo ol san hen titi tabin sin ang e gwek.
⁷ Zen hwena hom walasna we lak. Zen Alap ki kirekam Elisabetsa enlala gwibirki. Zep hendep walas sremkam bogol ek.
⁸ Abia mo hliknak dinik dikim Alap mo golak syal tan hap denak kim zauk, zao de yaklanak dekam zep Zakariasa zen de syal gwen hap dam dasik.
⁹ Men kirekam Alap mo golak de syal ta gwen zini zisi dam dasik gwibirin, zen kirekam Zakariasa dam dasik. Zen mae hap dam dasik: Zen de ze-en Alap zere en hap de teksonnak tin hip– irase dawem nabare te kilsi de ze Alap hap ang gulsublun hap.
¹⁰ In kim ki kiresa de syal gwibin hip denak zauꞌuk, zi beyana dekam zep eihya lip nakore tekson nakon Biansa nen soneblaꞌak.
¹¹ Kim zewe irase dawem nabare te kili insa ang gulsuꞌunka, ki zep hwena Alap mo dam taha nakore zini ang gul gwen hap de meja alpnak zauꞌun zaka– Zakaria mo dam taha san dekam.
¹² Zakaria kim hla taka, ki zep auna hloblaka, hendep man ze airiblaka.
¹³ Hwena Alap mo dam taha nakore zini in ki zep gubluka, “Zakaria, bahem asa airiblan. Alap mes eno ol gu sonenna salka. We om Elisabet zi walassa sa ebe hap we tablal. Yohaniskim bose ta.
¹⁴ Kim de jaha gweꞌak, em dekam esa tangan sam gwesik gweblala, hendep esa isrip-sri gwe-gweblala. Aha zi hen beya nik sa isrip-sri ne gweblal.
¹⁵ Zen Bian mo nwenak zi yawal hap sa jowera. Alap mo Enhona jaha gwen nakon sa ki hendep bi gweblala. Zep angguru ban ho jal-jala ban bap zen otde gwen.
¹⁶ Zen Zen sa Israelk de zini beyakam Bian osan dep kwang guludahal zala– zere mae mo Alap hon depye.
¹⁷ Hen Zen Zen sa Biansa ngeirbli zala. Zeno tahana Alap mo ol ayang gul gwen zini Elia Bak mo kim sa soson neblal, hen zeno enhona zeno kim sa lwablala. Hen Israelk de zini men zen iye zeban zenaka gil-gil neibirida gwenan, zen zen sa desa siri gulsulu. Hen sre de ora san de egwahan wenya, zen zen sa desa eiwa de ora san dep kwang guludahal zala. Zen kirekam sa zi beyana Bian de hata zannak dep hamal gulu.”
¹⁸ Zakaria ki zep takensiblika, “Banakarekam asa tawa gwer? – eiwa diki lwankam. Sap ee mese bogol gwek, hen ano wenya mes-am tangan bogol gwek.”
¹⁹ Ki zep ding gulbluka, “Ëe an Gabriel. Bian mo dang nakone zauk gwenan. Zen zep asa emsa de ol dawemna ansa tawa tan hap zer sonera.
²⁰ Insa ki emsa gublunan, Alap sa ki hendep kirekam ebe hap syal gwibir-blira. Hwena em home asa taibliblanda. Zep hendep angkam em molye ola tonka. Em esa ol srem gwera, hendep mes ki lwanan.”
²¹ Kim nesbla tinek, ki zep hendep denggwanblaꞌak, “Zen ba hap kire tangankam holo gweꞌan ora?”
²² Kim kon wet so zaka, zen banakan dep? – ol tonbiridanna. Taha enkam zep akan-akan gwibiridaꞌanka, sap zen mes ol srem gweka. Zi beyana in dekam zep anakan tame dak, “O an nwe nik ze lirisin neblaon.”
²³ Zakaria Bak mo Alap mo golak de syala kim tap gweblak, dekam zep zere mo gol san dep song gweka.
²⁴ Hom holo gweꞌak, dekam zep hendep we zem Elisabet u gweꞌak. Dekam zep saher hap gol ennak gwe gwek– holona benna aha-ere taha-tap enkam.
²⁵ Zen man enlala gwe-gwek, “Na-en babe tawa tabin. Dikire tingan anakan asa tame nuk, ‘In Bian kwasang gwibirki.’ Ëe an sap bogola, hwena ano walas we tan srem hap de sahera zi nwenak Bian Zen ap ngan gulsubiꞌira.”
²⁶ Elisabet kim benna enam enkam u nuban gweꞌak, Alap ki zep zere mo dam taha nakore zini Gabrielsa etan Galilea mo langnak de ena Nazaret san dep zer soneka.
²⁷ Gabriel ki zep kwalbasa lam gunnu Maria osan dep song gweka. Zen Yusup hup de golgu gweblanna. Yusup mo auyan-azana teipsin zini Daud onakon.
²⁸ Alap mo dam taha nakore zini in ki zep Maria hon hataka, zao zep gubir zika, “Dawem! Em Alap mo kwasang-kwasangnake gweꞌara! Bian man emsa dawem tangankam kara gul gwenda!”
²⁹ Zeno ola insa de sankam, Maria ki zep auna hlok, dekam zep zenaka enlala ennak mae hap takensibik, “An ba hap ki kirekam asa gubirida?”
³⁰ Hwena ki zep etan gubirki, “Bahem airin, Maria, sap em ema Alap mo nwenak sam gwesiꞌira.
³¹ Em esa u gwera. Zi walassa esa jaha gwera. Yesuskum bose ta.
³² Zen sa teipsili, hendep dekam sa nen gweblal, ‘Alap Teipsin Zi nik mo Tane.’ Bian Alap sa Desa gublula– Zen de Israelsa bi gwibin hip, zere mo auyanna Daud Bak mo kim.
³³ Zen Zen sa hendep denaban kitak Yakob mo auyan-azana irik gili. Zeno irik ginni in molya tap gwek.”
³⁴ Maria ki zep gubluk, “Hwena ee an home zi mae naban gaing eꞌan. Ëe banakan asa walas gwer?”
³⁵ Ki zep ding gulbirki, “Alap mo Enho sa ebon ing gwehe zala, hen Alap mo soson sa emsa bi gwibiri. Zen zep sa walas tola insa nen gweblal, ‘Zen Alap mo Tane– enho lalak enna.’
³⁶ An kirekame emsa gubirin, zen mes ki iye om Elisabet hon kirekam lwak. Zen mes u gwek– benna angkam enam enkam. Zen sap bogola, hen zini mes anakan nenbik, ‘An Alap ki walas srem gulku.’
³⁷ Hwena zen angkam u nuban gweꞌan. Sap Alap hap hom– banakare maena, Zen de syal gwibin srem hap denaye.”
³⁸ Maria ki zep ding gulbluk, “Ëe an Bian mo tana iltikinnik de gwe gwen wesyake. Sap sa ki kirekam abon onak lwal– in kirekam em asa gubiridaye.” Alap mo dam taha nakore zini in ki zep hli yulku.
³⁹ Alap mo dam taha nakore zini in kim hli yulku, holo gwehan sremnak Maria dekam zep hen soson tola ban Yerusalem mo kwatap lang san dep song gwek– Zakaria ne Elisabet nik mo e san dep.
⁴⁰ Zakaria mo golak kim hatak, ki zep Elisabetsa dawem gul kinik.
⁴¹ Elisabet kim Maria mo dawemna insa salbik, ungala mwanak de walasna in dekam zep soson gweka. Alap mo Enhona dekam zep Elisabetsa ing gwe hebirki,
⁴² ki zep Mariasa ol mamkam gubik, “Em ene tingare we walya kon dawemna hlauꞌura! Hen Alap eno walasna in hap dawemsa sa golblala.
⁴³ Ëe an betekna, hwena em in Teipsin Zini Bian mo anee ano golak hatanda!
⁴⁴ Ëe kime eno dawemna sal, ano ungala mwanak de walasna dekam zep isrip-sri naban soson gwera.
⁴⁵ Ebe hap Bian heꞌho gwibin tangan naka golbiꞌira, sap men zen ebon onak Bian mo ola hatak, em ema taiblibirki, hen zen kirekam sa ki lwal!”
⁴⁶ Maria ki zep guk, “Ëe ama Bian Alapsa boltere taꞌan,
⁴⁷ hen ano enhona man isrip-sri gweblaꞌara, sap Zen Zen sa asa ngaya gulu.
⁴⁸ Zen man asa enlala gwibirki, hwena ee an Zebon de babu gwe-gwen we– bose srem tola. Hwena angkam tingare zi ausuna hendep denaban sa asa nen gwibir, ‘Heꞌho gwibin tanganna zen zen hlauk.’
⁴⁹ Sap soson Zini Alap, Zen eiwa lalak tanganna, hwena Zen man kirekam-kirekam yawala abe hap syal gwe-gwibir-biꞌira.
⁵⁰ Auyan-aza nakon hendep auyan-azana, Zenaka de airiblan zi hip Zen man zere mo kwasangna gol gwizimnira.
⁵¹ Bian men kirekam orep zere mo sosonna goltrei gwizimki, Zen kirekam etan angkam goltreizimꞌira: Zen orep zi zena-zenana man sekwak gulsuk gweka, hen zeno mae mo kalang karekna man blaonsuk gwizimki.
⁵² Zen hen orep teipsin-teipsin wenyaka zere mae mo teinikin gwen nakon man yal gul sone gweka, hwena bose srem wenyaka zep kang gulse gweka.
⁵³ Usak nabare wenya desa man derek-derekna kim itri ta gwibirki. Hwena men zen nonol tahalha sremkam lowehe gwek, desa man gubirida gweka, ‘Usak naban sekwak gwek.’ Hwena angkam Alap etan kirekam nebe mae hap syal gwibir-zimꞌira.
⁵⁴ Neno mae mo auyanna Abrahamsa hen zeno auyan-tane walya men kirekam gu-gubirida gweka, Zen angkam kirekam Israelsa mas gwibiridaꞌara. Zen man anakan gu-gubirida gweka, ‘Ano ebe mae hap de kwasang-kwasangna hendep denaban sa lwa gwer. Ëe molye golzausuk gwek.’ Zen desa angkam enlala gwibiꞌira.”
⁵⁵ (1:54)
⁵⁶ Maria Elisabet han san ha dan-ahare benkam ek, ki zep etan zere mo e san dep lwahak.
⁵⁷ Elisabet de jaha gwen hap denak kim zauk, zi walassa zep jaha gwek.
⁵⁸ Gol golek dena hen iye zem kim anakan esak, “Bian mes Elisabet hap kwasangna mamkam golbiri,” dekam zep tagal neisibirzik, hen dekam zep ze apdekam eisrip-sri gwek.
⁵⁹ Walasna in kim mingguna aha-en gweblak, ki zep etan tagal neblak– to mip naka dikim blaonsublun hap. Zen man ekil giꞌik, “An zere mo Bian mo bosekam esa bose lal– ‘Zakaria’kam.”
⁶⁰ Hwena an zik zep gubiridak, “Kirekam bejen nen bose tan! An ‘Yohanis’kim esa bose lal.”
⁶¹ Dekam zep denggwanbiꞌik, “Iye wal om hom tanganke– kire bose naye!”
⁶² Ki zep tahakam Zakariasa akan-akan neblak– anakan de takensiblin hap, “Ena banakan de bose tan habe dwam gweblaꞌara?”
⁶³ Zakaria hom nama dekam ola tonꞌanka. Ki zep te hlang hap abe gweka, dekam zep ze ale gulku, “An bosena Yohanis.” Dekam zep tingan denggwanblak.
⁶⁴ Dekam zep hendep ola etan tonka. Alap mo bose ensa zep ilman gul tineka.
⁶⁵ Zeno gol golek denak dena dekam zep serkam denggwanblaꞌak, hen tingare Yerusalem mo kwatap lang san de lowe hendan wenya desa man donbirida gwek.
⁶⁶ Tingare zini men zen esak, ki zep enlala ennak eenlala gwe-gweꞌak, “Walasna in banakare zi hip wehe yap joweꞌanka?” Zen mae hap ki kirekam egu gwek: Sap Bian mo sosonna man Zebon lwa gweꞌak.
⁶⁷ Walas zemka in kim “Yohanis”kim bose dak, dekam zep Alap mo Enhona Zakariasa bi gweblaka, dekam zep Alap onakore hamal hap de ola tonbiridaka,
⁶⁸ “Bian en hap nen dawemsa golbla tine gwen– Israel mo Alap hap. Zen mes hatala– zere kore naka de kwasang gwibiridan hap, hen dekam de dowal mo kigi mo irik gin nikon gwiswe sonen hap.
⁶⁹ Zen mes nebe mae hap Zi sosonna zer sonezimki– nesa de ngaya tabin hip de Zi niye, teipsin zini Daud Bak, men zen Alap mo dwam gwibin sin ang gwe-gwekake, zeno auyan-aza nakore naka.
⁷⁰ Alap mo ol ayang gul gwen zini orep tangan mes anakan egu-guk gwek,
⁷¹ ‘Nesa de ngaya tabin hip de Zini sa hatala– Zen de nesa jal zi mo taha nakon alal gul gwen hap.’
⁷² Hen anakan mes gu-gubirida gweka, ‘Ëe asa Ëre mo ebe mae hap de ol gu-gubiridanna enlala gwibir, zep asa hendep emsa kwasang gwibiridal.’
⁷³ Alap mes neno mae mo auyanna Abrahamsa anakan gu-gubluka,
⁷⁴ ‘Emsa de tamera gwen zi mo taha nakon Ëe asa emsa al gul halzal. Zen dekam esa airin sremkam Asa betek e gweblal.’
⁷⁵ Zep nen enho lalakkam esa Alap en hon etal gwesil, hen zeno nwe kara gwennak esa hendep denaban lowehe gwer.”
⁷⁶ Zakaria ki zep hwena tane zikhip dena aisil gwenkam ayang gulku, “Em, ano walas, emsa sa nen gweblal, ‘Alap Teipsin Zi nik mo olsa de ayang gul gwizimdin hip de zini.’ Em esa Biansa ngeirblira– zebe hap de orasa sal tablan hap,
⁷⁷ hen Bian mo hlil irin wenyaka esa anakan tawa ta gwibiri, ‘Alap sa emsa eno mae mo karek-kareksa de tap gulsuzimdinkim ngaya tabiri.’
⁷⁸ Sap neno mae mo Alapna Zen kae-kaena hen kwasang-kwasang enna. Zen zep sa nesa de ngatan tabin hip de Zini insa zer sonera. Zen ngatan zi mo lang nakon kaknak de yakla hata sezan mo kim sa zilsi zila.
⁷⁹ Zen dekam sa tingare zi ausuna ngatan tabir zira hen ngaya tabiri, sap zen tingan kawesinnik lowe heꞌan, hen tin hip eairi gwenan. Zen Zebon onakon esa Alap han erumlae gwer, hen zi bosyan naban eumlae gwer.”
⁸⁰ Zakaria mo tanena Yohanis in kim mam gweꞌanka, Alap osan dep de enlalana hen dekam zep mam gweblaꞌanka. Zen zi srem langnak gwe gweka– hendep yaklana mensa Bian Alap dam tasiblika. Zao kim hatak, zen dekam zep tingare Israelk de zi hip zenaka zertreizimki.