¹ Tingare Kolosek de Kristen zi hip— men zen enho lalakkam lowehe gwenan, hen Kristus en onak men zen tatem ezauk gwenanke, Kristus mo dam tasin zini Paulus onakon, hen nere mae mo osona Timotius onakon: Dawem! Alap mo dwam gwibin sin ki kirekam lwak, zep Kristus asa dam tasiki– zere hap de olsa dikim gol halada gwen hapye. In zebe ebe mae hap ale gulzimꞌin. Diki Alap Zen sa ebe mae hap kwasang-kwasang zemka mamkam gol gwizimdi. Hen nen zeno taha terenak esa lowehe gwer.
² (1:1)
³ Ëe ere mo wal bose walya ban kime ebe mae hap Bian Yesus mo Biansa abe la gwenan, ee dekam dawemsae Alap hap olbla tine gwenan.
⁴ Sap ee mese anakan esane gwe-gwek, “Kolosek de Kristen zini in mes tangan Kristussu dawemkam daibliblak, hen zen tingare aya-wal oso-walya dawemkam kwasang neibirida gwenan.”
⁵ Em mae habe kirekam lowehe gwenan: Sap em anakare enlala nabane Alap hon eyaing gwe kini gweꞌan, “Ano mae mo dakal hap de gol dawemna mes ngatan zi mo langnak Alap nep hamal tazimki.” Ngatan zi mo lang hap dena insa, em mese etawa gwek– in kim eiwa de ol dawemna ebon mae onak hatakke.
⁶ Ol dawemna in angkam man tingare lang san langa gwesik haladaꞌan. Zini zep beyakam eei gwe-gweꞌan– in kirekam hen ebon mae onak lwakye. Em kime ol dawemna insa esane gwek, em dekam zebe anakan tame uk, “Hare Alap mo nebe mae hap de kwasang-kwasangna eiwa kike.”
⁷ Em Epafras Bak onake esak. Zen ano mae mo syal bose dawem tanganna. Hen zen ano mae mo weinak Kristus mo nganak iwe syal gwe-gwenda.
⁸ Zen kim awe hata zaka, zen man asa gubirida zaka, “Kolosek de Kristen zini man hen emsa Alap mo Enho nakore kwasang-kwasang naban kwasang neibirida gwenan.”
⁹ Zen in zep, ee kime kirekam emsa asalbiridak hendep angkam, ee home Alapsa de ebe mae hap abe ta gwenna olzausuk gwenan. Ëe anakane Alapsa abe la gwenan, “Bian, ere mo dwam gwibinsi de tawa gwibin hip de enlala blalsa emki zebe mae hap dawemkam ing ta sone gwizimdin– ere mo Enho nakore enlala blalkam.
¹⁰ Dekam Kolosek de Kristen zi mo lowe henna sa Bian, ere mo nwenak dakastil gwer, hen zen sa aha zi hip anakan noltrei gwizim, ‘Bian en hon de lowe henna, an kirekam.’ Dekam zeno mae mo lowe henna te makan sa te gwer– dawemsa de aha zi hip goltrei gwizimdinkim. Hen Bian, dekam zeno mae mo Emsa de tame tanna sa esek gwese gwizim.
¹¹ Bian, dikire ere mo serkam de sosonna zebon mae onak lwa gwek, hendep zen serkam etatete gwen– sap banakare karek maesa de goltowe gwenkam. Hen deban zen eisrip-sri gwe-gwen,
¹² hen dawemsa zen ebe hap gol gweblan. Sap Em mese zeno mae mo enhona oto tasizimki– zen dikim ngatan zi mo langnak biti gwen hapye, hen zen dikim ere mo hlil irin zi niban zewe hendep denaban lowehe gwen hapye.”
¹³ Ëe kirekame Biansa ebe mae hap abe la gwenan, sap Bian mes nesa lang kawesin nikon hil tibirin halzaka– zere mo dang tininak de Tane mo irik ginnik depye.
¹⁴ Tane zem in, Zen nesa karek-karek nakon hil ti sonebirki– men zen sap orep nesa hulekye. Sap Zen Zen– neno mae mo karek-kareksa de tap gulsuk gwizimdin hip de Zi niye.
¹⁵ Zini nen home Alapsa nwekam hla la gwenan. Hwena Alap mo nonol Walasna Kristus, Zen Alap zere mo nwe-mase naban apdenak. In zebe Kristus onakon Alapsa anakan tame la gwenan, “Alap Zena Zen hen kirena.” Tane zem Kristus, Zen hen Alap mo tingare yang tabin wenyik mo teipsinni.
¹⁶ Kitak de kire-kirena, zen Alap Kristus mo taha san yang tabirki– sap ngatan zi mo langnak dena, sap okamanak dena, sap hlauluda gwen wenya, hen sap hlauluda gwen srem wenya. Sap Alap mes Kristus de kitak bi gwibin hip kalang gweka– sap tingare irik ginni, mamna hen betekna, sap okamanak dena, hen sap ngatan zi mo langnak denaye.
¹⁷ Zep tingare Alap mo yang tabinni, zen ausuna Kristus. Zen Zen kitak zere mo sosonkam teirensik gwibirida– yakla nwena, benna, hen hi mae naye. Zen in zep dawemkam aha-erenak erlwa gwenan. Zen sremkam maka esekwak gweꞌan.
¹⁸ Zep Kristus hun de zeraha-en gwen zini, zen okamanak awe san de Kristus mo timni kiye. Kristus Zena Zen zeno mae mo nola. Zen nonol lonesen nakore Zi, Alap zere mo nonol Walas. Zen zep nonol tanganna tin nikon ngaya gweka– Zen dikim tingare engaya gwen wenyaka teipsibiridan hap.
¹⁹ Sap Alap Zena man tangan tingare enho naban de Tane zem in hon gwe gwen hap sam gwesiki.
²⁰ Sap Alap mes kalang gweka Zebon onakon de tingan etan zere han zerumlae gwen hap– sap okamanak de lowehe gwen wenya hen ngatan zi mo langnak de wenya. Zen Tane zem in mo kalkam kitak goleumlae gweka– men zen te-lidak son nakon neno mae mo karek-kareksa dikim ngan gulsuzimdin hip wet soblakke.
²¹ Zep nen hen menkam Alap mo jal zi mo kime lowehe gwek. Nen dekam Alap onakon langanak, sap dekam neno mae mo lowe henna hen enlalana karek enna.
²² Hwena angkam mes Kristus nesa Alap zere hon goleyaing gweka, hen mes nesa goleumlae gweka– Zen kim zi tangankam de tim niban neno mae mo karek-kareksa dikim ngan gulsuzimdin hip tilkike. Zeno syala in kon zep Alap angkam nesa anakan enlala gwibirida gweꞌara, “Zen mes tangan ere mo nwenak edakastil– san de ekarek gwen srem zini kiye.”
²³ Zen in zep, Yesussu de taibliblan nakon bap nen ebutehal gwen. Nen tatem zewe en ezauk gwen. Hen Zebon en nen enlalasa anakan zon tasikin gwen, “Mensa engaya gwen hap dena nesa gu-gubiridaka, nen eiwa esa ulin.” Nen kire enlalasa gol moko makan eiyas tan– ekakim eewak gwe srem gwe-gwek. Sap e-en home ol dawemna insa laiblibik. Hwena desa mes tingare lang san nol haladak, hen asa mes Bian Yesus dam tasiki– desa de golluwe gwen hapye.
²⁴ Zen in zep, aya-wal oso-wal, ee ama isrip-sri gwe-gweꞌan– ee ansa karekna goltowe gwenanye. Ëe sap asa jalom ek tihinak awe gwe gwer. Sap ol dawemna insa nen laiblibik, ee desa de golasas gwe-gwen jal habe awe gweꞌan. Nen Kristen zini mese Kristus mo timnik biti gwek, ee zebe hen anakarekam dam gulsuk, “Ëe kime Kristus mo bose hap karekna goltowe gweꞌan, zen san de Zen de hen etan goltowenna kiye.”
²⁵ Zep Alap asa tingare Kristen zini emsa de mas gwibirida gwen hap dam tasiki– em in zen hen Kristus mo timnik biti gwekke. Hen ano syala, zen emsa de sowe henkam Alap mo olkam hleng sosubirida gwen hap.
²⁶ Ëe men dekame emsa hleng sosubirida gweꞌan, zen men desa orep tangan Alap nesa de ngaya tabin hip dena kalang gwe gukuke. Neno mae mo auyan-azana, zen man sap desa de tame gun hup dei gwibik. Hwena angkam Alap mes zere mo hlil irin zini nebe mae hap goltreizimki.
²⁷ Hen Zen man dwam gweꞌara– tingare zi ausu dikim anakan etawa gwen hap, “Zere mo ngaya tabin hip de kalangna in, zen serkam de heꞌho gwibin tanganna.” Bol-zaun tanganna, Kristus Zen diki neno mae mo enhonak Zen gwe gwen. Zen dekam tangane anakan tame ul gwenan, “Nen eiwa esa zere mo ngatannak yaing gwer.”
²⁸ Zen in zebe ere mo wal bose walya ban Alap onakore enlala blalkam tingare zini anakan titi la gwibirin, “Karek san dep de orana insa baes eblak. Kristus Zen Zen– engaya gwen hap de ora naye.” Sap ano mae mo dwam gwibinni, zen tingare zisi de Alap zere onak de tagal gulsunnuk anakan goletreblan hap, “An mes tangan Kristus hun de zeraha-en gwennak etatete gwek.”
²⁹ Ëe, Paulus, zen in zebe tangan tingare ere mo sosonkam alp gwe-gwenan. Hwena ere en tangan mo sosonkam home. Hwena Kristus abon zere mo serkam de sosonsa ing gul sone gwenda.