¹ Dekon kim lwa seꞌak, Yesussu de taibliblan wenya dekam zep ebeya gwe song gweꞌak. Dekam Yahudi zi ausu nakore zini men zen Yunani zi mo langnak de lowehe gwenkam Ibrani ola eititi neibik, zen man jakal neibiridak– men zen nama Ibrani olkam don gwibikye. Mae hap jakal neibiridak, “Em Ibrani ol tawa wenya ano mae mo we sem-semna ema ti kul sonenda gweꞌan– tembanena in kim kae eibirida gwenanye.”
² Dekam zep dua-blaskam de zini in tagal nulsuk, ki zep ze nenbiridak, “Aya-wal oso-wal, ee de Alap mo olsa de tawa tabinsi golzausun hup hom dakastiꞌin– dekam de hwena tembanesa kae gwibirida gwen hapye.
³ Diki dawemna zisi emki ere mae mo ngirin nikon tuju enkam dam tasibin– ere mae mo anakan de tame tabin nika, ‘An enlala blala hen Alap mo Enhona ki zebon mae onak lwaꞌara.’ Zebe mae hap aka syala insa wei kul sonezimk,
⁴ ee akakim aha syalak ehir-hir gwe srem gwe-gwek. Hwena ee dekam anakare enlala en naban asa lowehe gwer: Biansa asa en sonebla tine gwer, hen engaya gwen hap de olsa asa tawa labir tine gwer.”
⁵ Tingan desan zep ki ang tak. Dekam zep zini dam dasibik. Ahana Stepanus. Zen dawemkam de Yesussu taibliblan tanganna, hen Alap mo Enhona mes dawemkam ing gwe heblaka. Ahana Pilipus, Prokorus, Nikanol, Timon, Parmenas, hen Antiokia walya Nikolas. Zen ner hom Yahudi hon til zika, hwena dekam zep nabakam Yesussu taibliblaka.
⁶ Tujukam de zini insa kim dua-blaskam de zini in hap noletreizimk, dekam zep Alapsa zebe mae hap taha tehabirida inen naban abe dak.
⁷ Dekam zep hendep Yesus hup de Alap mo ola Israelk nollanga gwesikhal song gwek. Hen Yerusalemk dekam zep nabakam Yesussu de taibliblankam emas-mas gwe-gwek. Hen Alap mo golak de syal tan zini dekam zep hen beya tangankam Yesussu daibliblak.
⁸ Dekam Alap Stepanus hup sosonna hen kwasang-kwasangna mam tangankam gol gweblaka. Zen in zep owas-owasna zi tra mo nwenak syal gwe-gwibirki.
⁹ Hwena Yahudi mo aha but srem golak de wenyik zep husus neblaꞌak. In zen husus neblaꞌak, zen men zen aha lang nakon Yerusalemk yaing gwe zakke– ena Kirene kon, Aleksandria kon, langna Kilikia kon, hen Asia kon. Zeno mae mo but srem gola, bosena, “zi mo tana iltikinnik de teinikirin srem zi mo dena.” Zini in man Stepanus hun nerol tetek gweꞌak,
¹⁰ hwena zen bejen zeno ola gulsublun. Sap Alap mo Enhona man zebe hap enlala blala ing ta sone gweblaka.
¹¹ In zep zen aha zi hip te-alasa nolzimk– dekam de zen boton ol blo-blokam Stepanussu anakan zergun hup, “Ëe ama asalblak. Zen man Musa mo titi tabin ola ban Alap han lamang soka.”
¹² Zen kire olkam zep Yahudi zi mo nol-nolik mo enlalana ben-ben dazimꞌik– hen Musa mo titi tabin olsa de tawa ta gwibin zi mo, hen zi tra mo enlala naye. Dekam zep hendep Stepanussu balk da halzak– Yahudi mo teipsin sinodenak de zertren hapye.
¹³ Zen hen man klak tan zini insa kwang nulida halzak. Zen zep eguk, “Zini an Alap mo gol dawemna an han Musa mo titi tabin ola ban man lamang so gwenda.
¹⁴ Ëe ama anakan de torannak asalblak, ‘Nazaret walya Yesus, zen sa Alap mo gola ansa dri yulsu zula. Hen Alap hap de syala mensa Musa nep hli yulzimki, desa sa kitak wet gulsulu.’”
¹⁵ Tingan in zen teipsin sinodenak teinikinꞌik, Stepanussu man karatda daꞌak. Zeno nwe-masena dekam man liwe heblaka– san de Alap mo dam taha nakore zi mo nwe-masena kiye.