¹ Paulus ki zep teipsin sinodenak dena insa karatda tabirki, ki zep gubiridaka, “Aya-wal oso-wal, ee enho kles gwesin sremkame Alap mo dwam gwibin sin syal gwe-gwek– hendep namen de yaklana awe.”
² Alap mo golak de teipsin zini Ananias Bak kim kirekam de torannak salblaka, dekam zep Paulus mo alp nakon men zen ezauꞌuk desa mip naka de lwa soblan hap gubiridaka. Dekam zep ahanik mipna lwa soblaka.
³ Paulus ki zep gubluka, “Alap sa hen emsa mip naka lwa tala! Zi mo nwenak em dawemna, hwena eno enhona karekna. Em insa iwe nikinꞌira– ano kareksa de dekon anakan teibin hip, ‘Zen kirekam mo Musa mo titi tabin olsa gulmunku,’ hwena ena hen ema gulmun nura– asa de karek gwen sremnak lek tyan hap insa gubiridandaye.”
⁴ Men zen zeno alp nakon ezauꞌuk, ki zep ding nulblik, “Em in Alap mo golak de teipsin zisie lamang taꞌara!”
⁵ Paulus ki zep ding gulzimki, “Aya-wal oso-wal, ee home anakan tame tal, ‘Zen zen– Alap mo golak de teipsin niye.’ Sap Alap mo olak Musa man titi tabirki, ‘Ere mae mo teipsin-teipsinni bahem lamang ta gwibin.’”
⁶ Paulus kim ze anakan tame tabirki, “An ahakon Farisi hon de biti gwen zi, hen ahakon Saduki hon de biti gwen zi,” dekam zep ol mamkam gubiridaka, “Aya-wal oso-wal, ee an hen Farisi wal. Ano bianna hen Farisi wal. Asa an mae habe namen taken-taken eblaꞌan: Sap ee ama anakan taiblik, ‘Zini tin nikon ngaya gwenkam.’”
⁷ Kirekam kim nasalblak, ki zep ze zen eol gweꞌak. Dekam zep ekles gwek. Farisi sren tewehak, Saduki hen sren tewehak.
⁸ Zen mae hap ekles gwek: Sap Saduki zini man eenlala gwek, “Zini bejen tin nikon etan ngaya gwen. Alap mo dam taha nakore zini hen hom. Zi mo angna hen hom.” Hwena Farisikam de gubirida gwen zini, zen man anakan etaiblik, “Ki.”
⁹ Zao zep serkam eol-tetek gwek. Dekam zep Musa mo olsa de tawa ta gwibin Farisikam de zini ahakore nik ezauk. Zen zep ol mamkam ahakore wenyik mo olsa anakare olkam nablonsuzimk, “Ëe home zini an mo karekna hla kulbliꞌan! San ha diki zi-au ahaksa Alap mo dam taha nakore zi mes yap aisil gweblaka? Kirekam de lwankam, ki bana hom.”
¹⁰ Serkam tangan kim enop-nop gweꞌak, jana nabare zi mo mamna in dekam zep mae hap airiꞌanka, “Paulussu an namen sa bai-bi dal!” Dekam zep zere mo irgwa taha nakore wenyaka gubiridaka– Paulussu de zeno mae mo ngirinnik sosonkam al tazimdi boran hap, hen dekam de zere mae mo lowehe gwen san dep etan zerhan hap.
¹¹ Dekam zep kam Bian Yesus Paulus mo alp nakon zauꞌun zaka, zao zep gubluka, “Enlala tatetekam gwe! Men kirekame namen abe hap dena Yerusalemk tonbiridala, zen kirekam esa hen Romak tonbirida gwera.”
¹² Kaꞌankam kaknak, Yahudi zini beya nik zep Paulussu de tan hap ola aha-en nuk. Dekam zep apdekam anakan eguk, “Dikire nglinak de Zini asa hlauludak– ee de Paulussu tan sremnak tembane tanna, hen ho maesa otdebin niye.”
¹³ Zini in zen ki egu-guk, beyana empat-pulu nakon man tamank.
¹⁴ Zen ki zep Alap mo golak de mam-mam wenyak dep hen Yahudi mo nol-nol san dep sek gwek, ki zep ze nenbiridak, “Ëe mese Alap mo nwenak apdekam anakan egunun, ‘Dikire nglinak de Zini asa hlauludak– ee de Paulussu tan sremnak tembane tanna, hen ho maesa otdebin niye.’
¹⁵ Zep angkam em hen teipsin sinodenak dena janana bare zi mo mamna insa en soneblak. Anakan abe lak, ‘Paulussu emki abe mae hap zer sonezimdin– ee aka etan dawemkam taken-taken eblak.’ Hwena zen molya awe hata zaka, sap ee ora nakon asa tan hap lil giblil.”
¹⁶ Hwena naimli zem man ze sane tabiꞌinka, dekam zep jana nabare nik mo gol san song gweka, zao zep Paulussu gubluka.
¹⁷ Paulus dekam zep jana nabare zi mo mamna in mo irgwa taha nakore naka gu soneblaka. Kim hata zaka, zao zep gubluka, “Wal seiwiri an emki ere mo mam osan dep zersong gwen, sap zeno ol aisili ki– zebe hap denaye.”
¹⁸ Dekam zep mam zem osan dep zersong gweka. Irgwa taha nakore zini in ki zep mam zem insa gubluka, “Bwinak de zini Paulus man asa gu soneblala– ee de walasna ansa ebon osan dep zer halzan hap. Zen man olsa eban de loran hap golsong gwe zala.”
¹⁹ Mam zem in ki zep taha nakon il ti-in kinika– tewehe kininkam de zertoran hap. Ki zep ze takensiblika, “Em ba ola bane abe hap golsong gwebla zala?”
²⁰ Ki zep ding gulbluka, “Yahudi zini mes ola aha-en nul– emsa de anakan ahap tan hap, ‘Paulussu kaꞌan ap zer sonezim– ee aka etan teipsin sinodenak dawemkam taken-taken eblak.’ Hwena in boton.
²¹ Bahem zeno mae mo ol san ang gwen, sap zini ora nakon zao de tan hap dil gibliꞌan. Beyana mes empat-pulu nakon taman. Zen mes Alap mo nwenak anakan egu-gul, ‘Dikire nglinak de Zini asa hlauludak– ee de Paulussu tan sremnak tembane tanna, hen ho maesa otdebin niye.’ Angkam zen mes ehohle gwer. Ebon onakon de ol ensa neisbiꞌin.”
²² Mam zini in ki zep gubluka, “Angkam sap esa song gwera. Hwena bahem aha maesa gubiridan– in desae asa gublundaye.”
²³ Jana nabare nik mo mamna in ki zep aha mam dare naka guzimki, “Emki 470kam jana nabare zisi hohle labin– nebokkam de eeija gwen wenya 200 enkam, janakam dep de wenya hen 200kum, kuda tahan nakon de eeijan hap dena 70 enkam. Emki gubiridan– kam de sek gwen hap deka ehohle gwek. Yakla nwena sembilankam esa egwahal– Paulussu de Kaesarea san dep zon tan hap.
²⁴ Kudana hen ahana Paulus hup de hohle dablak– zen deka ze nikin halka, dawem enkam de nersong gwek, hendep gubernor Peliks Bak hon de zon dak.”
²⁵ Zena ki zep suratna anakan ale gulbluka,
²⁶ “Gubernor Peliks Bak hap, mensae blikip eisik gweblananke, Klaudius Lisias onakon: Dawem.
²⁷ Zini insa ep zer soneblak, mes Yahudi balk dak. Zen man sap tan hap alp neblaꞌak. Hwena eye nabakam ere mo walas naban zial tak, sap ee mese salblak, ‘Zen Roma mo irik ginnik dena.’
²⁸ Ëe ama sap zeno kareksa de hlaulblun hap dwam gwek– in dekon ki karek tan hap asas ne gweblaꞌakke. Ëe zebe Yahudi mo teipsin sinode san dep sap zerhak.
²⁹ Hwena zeno karekna in zep ki ne gweblaꞌak, zen Roma mo ol jalse gwen hap hom. Hwena Yahudi zere mae mo ol jalse gwen en hap. Zeno karekna hom– dekam de tan hap denaye, ahaksa bwinak de se tya irin hip denaye.
³⁰ Hwena anakan kim asa nenblak, ‘Man tan hap dil gibliꞌan,’ dekam zebe nabakam ebon osan dep zer sonek. Hen in zen jal ne gweblaꞌan, ee ama desa gubiridak, ‘Amki neik zeno karekna gubernor hap oltreblak.’”
³¹ In desa dam tasibirki, zen zep Paulussu kam nersong gwek, hendep Antipatrisk nerhatak.
³² Dekon kaknak 70kam de kuda nabare en nik zep kon nersong gwek. 400kum de tanakam de wenya dekon zep lwan dahak.
³³ Kaesareak kim nerhatak, ki zep suratna insa gubernor hap nolblak. Paulussu hen zao zep tapbla dablak.
³⁴ Gubernor kim suratna insa karatda gulku, dekam zep Paulussu takensiblika, “Eno auyan-azana endan kon?” Ki zep ding gulbluka, “Kilikia konke.”
³⁵ Dekam zep gubluka, “Zep eno kareksa de ap goltreblan hap de wenya kim de yaing gweꞌanzak, zen dekam asa zeno mae mo nwenak emsa taken-taken gweblal.” Dekam zep pemerinta mo gol yalak de kara ta gwen hap gubiridaka– mensa teipsin zini Herodes Swe gubernor hen jana zi de zao lowehe gwen hap taubluzimkike.