¹ Atena kon, ki zep Korintus sun dep song gweka.
² Zao zep Yahudi walya Akwilasa zertoweka. Zeno auyan-azana orep Pontus sun dep eal tak, zep zewe de wal hap joweka. We zem bosena Priskila. Zen anakarenak akeꞌanka, “Ner hom Italia kon aptazak.” Sap Roma mo teipsinni Klaudius Bak ner hom anakan golealsa soneka, “Yahudi zini kitak de Italia mo langna an kon sek gwek.” Paulus ese apta zannak zep duwezimki,
³ sap zeno nik mo syala apdenak– tenda gol syal gwe-gweblan hap de zi dare. Zao zep apdekam lowehe gwek hen syal ta gwek.
⁴ Hari Sabat jamkam zep Paulus Alap mo epba ola kore naka Yahudi mo but srem golak ziklis gul gweka– zen dikim hen Yesussu taibliblan hap, sap Yahudi zi, hen sap Yunani kore zi.
⁵ Silas ne Timotius ne kim langna Makedonia kon apta zaka, Paulus dekam zep tenda gol syala insa golzausuku. Dekam yakla jamkam zep Alap mo olkam Yahudi zi ensa anakan tawa ta gwibirki, “Yesus Zen Zen– Israelsa de ngaya tabin hip de Zi niye, Alap mensa gu-gubirida gwekaye.”
⁶ Hwena ahakore Yahudi zini kim nerol gwek hen lamang dak, Paulus dekam zep bajuna anakare ola ban hlaik-hlik so guk halka, “Ano ola ansa baes eibirin, ki em hen ema engaya gwen hap dena baes eibiꞌin! Ëe ama sap emsa de ngaya tabin hip alp gwibiridak, zep Alap molya eno mae mo kala abe hap ngero gulbluka. Zep ee ama angkam song gweꞌan– Yahudi srem zisi de hwena tawa tabin hip.”
⁷ Paulus ki zep but srem gola in kon golewet so gweka, dekam zep hwena zeno golek denak de golak golebiti gweka. Gol bina in bosena Titius. Zeno aha bosena hen Yustus. Zen Yahudi srem zi, hwena Alapsa mes betek gweblaka. Zeno golak zep hwena golebiti gwe-gweka.
⁸ But srem gola iwe de mamna, bosena Krispus Bak, zen we wal walas zeban zep Yesussu zitaibliblaka. Hen ahakore Korintusk de lowehen wenya beya nik hen Paulus mo ola kon Yesussu daibliblak, dekam zep desa hen baptis dabik.
⁹ Aha orapkam, Bian Yesus nwe lirisin soblannak Paulussu gubluka, “Bahem airin. Sap esa tonbirida gwera. Balkkam bahem gwe gwen.
¹⁰ Sap Ëe ama emsa zergwe gweꞌan, hen zini molya emsa karek dak. Sap ena awe de zini beyakam sa Abon onak biti gwer.”
¹¹ Paulus dekam zep zewe Alap mo olsa de tonbirida gwen hap holokam gweka. Tahunna aha-en tamanblak, ahana ngirin ngam sonnak.
¹² Dekam Akayak Galio Bak gubernorkam irik gilki. Yahudi zini dekam zep ola aha-en nuk– Paulussu de Galio Bak osan dep balk tahan hap. Kim balk dahak,
¹³ anakare ola ban zep nertreblak, “Zini an zisi yasik ta gwibirida– nen dikim Musa mo titi tabin olsa gweibir kinin hap, dekam de hwena zebon osan ang tan hap. Hwena dekam Alapsa molye dawemkam betek e gweblak.”
¹⁴ Paulus kim sap nama ding gun hup enlala gweꞌanka, Galio ki zep hwena ding gulzimki, “Em san asa Yahudi walsae hla lal! Roma mo jalse gwen olsa de gweibir kinin habe klak lanan zanam, ee amaka emsa salbiridaꞌan.
¹⁵ Hwena ere mae mo epba olak de ol-gunnu hen bosem-sena, zep ene ki klak lananzal. Zen e-en emaka tap uk. Ëe ama baes gweꞌan– kiresa de ep klis gulzimdin hipye.”
¹⁶ Ki zep zere mo jana nabare zini golealsa sonen hap gubiridaka.
¹⁷ Hwena Yahudi srem zini men zen ze beyakam ezauꞌuk, dekam zep Yahudi mo but srem golak de mam zini Sostenes Baksa dot dasik, zao zep hendep dangolek. Hwena Galio Bak nwe enkam ze kara tabiꞌinka.
¹⁸ Dekam Paulus Korintusk iwe holo tolkam gweka. Ki zep hwena Siria mo lang san de etan lwahan hap dwam gweka. Dekam kim zewe de Yesussu taibliblan zini hli yuludaka, Akwila we zem Priskila han man ang eblak. Song gwen hap kim golek de gweꞌanka, dekam zep zewe de hi alpnak de ena Kengkreyak nol alana lunsuku. Mae hap lunsuku: Sap Yahudi zini kirekam egwe gwek– Alap hap de anakan goltreblan hap, “Mensa ee emsa gu-gubluk, ‘Ëe kiresa asa Eno bose hap syal gwibir,’ mese sul sonenan.”
¹⁹ Asia mo langnak de ena Efesus kim bulkum zihataka, Paulus zena ki zep Yahudi mo but srem gol san dep song gweka. Zewe Alap mo epba ola kore naka zep ziklis gulku. Zao zep abe dak, “Em wehe holo tolkam awe gweꞌanka?” Hwena man ding gulzimki, “Angkam molye awe holokam gwek. Alap mo dwam gwibin sin de kirekam lwankam, ki asa lwa halzal.” Zena ki zep kon etan bulkum gwe halka. Akwila ne Priskila neka zao zep hli soka.
²⁰ (18:19)
²¹ (18:19)
²² Kaesareak zep ati gweka. Dekon zep Yerusalem san dep tanakam zaheka– zewe de Yesussu taibliblan wenyaka de hlauluda guluhan hap. Zena ki zep kon Antiokia san dep hwena lwa halka.
²³ Zao holo tolkam gweka, ki zep Galatia hen Prigia mo langnak de e-e san amjanbir song gweka– dekam de etan zewe de Kristen zisi tatete tabin hip.
²⁴ Zao kim lwa seꞌak, ki zep Yahudi walya Apolos Efesusk hata zaka. Zeno auyan-azana Mesir mo ena Aleksandria san dep al tak, zep zewe de wal hap joweka. Zen mes sekolana sul sone song gweka, zep serkam tangan Alap mo epba ola tawa gwibirki.
²⁵ Zen mes beyakam Bian Yesus hup dena tame gulku, hen udobe naban anakan tawa ta gwibirki, “Nesa de ngaya tabin hip de Zini angkam hatan hap man golek de gweꞌara.” Hwena zen hom dekam Yesus mo bosena tawa gwibiꞌinka, hwena anakare ol ensa salka, “Yahudi mo langnak baptis ta gwibin zini Yohanis Swe mes zisi zebe hap de hohle tabir-blin hap baptis ta gwibirki.”
²⁶ Zen kim udobe naban kire hap denaka but srem golak tonbiridaꞌanka, Priskila ne Akwila ne man ze sane laꞌak. Dekam zep enblak, “Ano nik mo gol san emki ang gwen.” Zao zep dawemkam Yesus hup denaka anakan lonblak, “Yesus Zen Zen– nesa de ngaya tabin hip de Zi niye.” Dekam zep dawemkam taibliblaka.
²⁷ Akaya san de song gwen hap kim dwam gweꞌanka, dekam zep Efesusk de Yesussu taibliblan wenya nenblak, “In airis.” Dekam zewe de Kristen zi hip anakare hap de suratna ale nulzimk, “Zini an amki dawemkam eirink. Zeno tawa tabinni airis.” Zao kim hataka, zen dawemkam zep ze mas gwibirida gweka– men zen Alap mo kwasang-kwasang nakon Yesussu daibliblakye.
²⁸ Sap zewe zi beya mo nwenak, Apolos Yahudi zi niban dawemkam Yesus hup dena golekeisa-keisa gwe-gweka, hendep man topse ne gweblak. Sap Apolos zen Alap mo epba olak denaka dawemkam anakan klis gul gwizimki, “Yesus Zen Zen– nesa de ngaya tabin hip de Zi niye, mensa Alap orep nesa gu-gubirida gwekaye.”