¹ Paulus dekam zep Silas han Derbe san dep song eka. Derbe kon etan Listra san dep zep ayang ulki. Zao Kristen zini ki, bosena Timotius. An zem Yahudi we. Zen hen mes Kristen gwek. Bi zem Yunani wal.
² Listrak de tingare Kristen zini hen Ikoniumk de wenya Timotiussu man nen gweblak, “Walasna in airis.”
³ Paulus dekam zep zebon de ang gwe-gwen hap dwam gweblaka. To mipna ki zep blaonsubluka. Zen mae hap blaonsubluka– dekam de langna iwe de Yahudi zi anakare hap husus gweblan srem hap, “Zen hom nebon mae tilki, sap zeno bianna Yunani wal.”
⁴ Ë-e san kim namjan gwibik, zen man Yesussu de taibliblan wenyaka donbirida gwek– mensa dua-blaskam de zi niban Kristen zi mo nol-nolaban Yerusalemk aha-en nukye, zen dikim hen suratnak de jalse gwibiridan ola in san ang ta gwen hap.
⁵ Zewe de Kristen zini Yesussu de taibliblankam zep etatete gwe zahek, hen dekam yakla jamkam zep zini etan taibliblankam emas-mas gwe-gwek.
⁶ Paulus ki zep Galatia hen Prigia mo langna ziamjanbirki. Hwena dekam Alap mo Enhona man gubiridaka, “Asia mo langna bahem amjanbin.”
⁷ Misia han de lang zip sonnak kim yaing gwek, dekam zep sap eakasik– Bitinia mo lang san de amjanbin hip. Hwena Yesus mo Enhona man etan gubiridaka, “Desan hen bahem amjanbin.”
⁸ Dekam zep hwena Misia mo lang san taman gwek, hendep hi alpnak de ena Troas san dep zep tine gwek.
⁹ Zao zep hwena Paulus mo nwena lirisin neblak. Zen eiwa de makan Makedonia walsya hla taka. Zen man zaunkum Paulussu anakan abe taꞌanka, “Haen, emki Makedonia san song gwezan– asa de mas gwibiridan hap.”
¹⁰ Hendep dekam zebe ehohle gwek– Makedonia san de sek gwen hap. Sap ee mese dam ulsuk, “An Alap Zen ki nesa gubiridanda– zere mo ol dawemsa dikim zewe hen tonbirida gwen hap.” Ëe an zen ola ansa ale guk, Lukas, ee ama hen dekam ang gwibiridak.
¹¹ Troas kon bulkum zebe dam-dam enkam Samotrake mo lang san dep sek gwek. Kaꞌankam zebe hwena Makedonia mo hi alpnak de e bosena Neapolisk yaing gwek.
¹² Dekon tanakam zebe hwena Pilipi san dep sek gwek. Propinsina Makedonia in, zen Roma mo irik gin lang ahana, hen Pilipi in, zen Makedonia mo aha e yawal. Zao holo tolkame lowehek.
¹³ Hari Sabatkam, ee dekam ena in mo ho alp nakore lilikin sine wet so gwek, sap ee ama tim uk, “Ho alpnak man yap Yahudi zini Alapsa dekon abe ta gwen hap etagal gwe-gwenan.” Sap zen dekam nama hom but srem gola dauꞌuk. Zao kime teinikinꞌik, we walya zen ze tagal gwek, deban mae en zebe ola oletonꞌak.
¹⁴ Ahana zen ze sane gweꞌak, ena Tiatira kore we, bosena Lidia. Zen sam dan kil makare kaensa de te-alakam lirak ta gwibin hip de we– men kire kaenkam teipsin zi mo bajuna dayal gwibir-zimninke. Wenya in Alapsa de betek gweblanna. Bian zep enho naka talusubirki– dekam de Paulus mo ola kon Yesussu taibliblan hap.
¹⁵ Dekam kime Lidiasa hen zeno golak de wenya ban kitak baptis labik, dekam zep asa gubiridak, “Em de asa anakan tame gunnu, ‘Zen eiwa-eiwakam Yesussu taibliblanan,’ ki ano golak emki biti gwen.” Zeno ol san zebe ki hendep ang tak.
¹⁶ Aha yaklakam kime etan ho alpnak de ol egu sone gwenna in san dep sek gwek, ki zebe ze hwena oranak wenya ban oltoweꞌak. Wenya in zi mo tana iltikinnik de babu gwe-gwenna, hen dowala mes tilbirki, zep hlaul-hlaulkum syal gwe-gwek. Zebon zini beyakam yaing gwe-gwezak– dekam de hamal hap de ol hap taken-taken gwe-gwibin hip. Nonol in zeno mae mo tana iltikinnik babu gwe-gwek, desa abe da gwibik, “Ëe zebon de hamal hap de olsa sane gwen habe hatananzal. An de te-ala naye.” Wenya insa men zen bi neibik, zen dekon zep te-alana beyakam lop da-in gwek.
¹⁷ Hwena wenya in dekam zep Paulus mae han asa goletro nasen gweꞌak. Anakarekam ola mamkam gu gweꞌak, “Zini an, Teipsin Zini Alap mo lup gul sonenna– zen de nebe mae hap engaya gwen hap de orasa dam tasik gwizimdin hip.”
¹⁸ Yaklana man beya gwek– kirekam de gweibirida gwenna. Hendep Paulussu kim jalak zerzauk, ki zep lero gwibin niban zebon de dowala insa gubluka, “Kristus Yesus mo bosekam ee ama emsa gubluꞌan: Em zebon onakon wet son!” Dekam zep hendep wet soka.
¹⁹ Zini in zen wenya insa bi neibik, kim tame nuk, “O zen de dowal sremkam gweꞌak, nen molye te-alana zebon onakon ulin gwek,” dekam zep Paulus ne Silas neka teipsin-teipsin wenyak dikim zitren hap pasar san dep il nosohak.
²⁰ Teipsin-teipsin wenya kip kim nitreizimk, zen dekam zep nenbiridak, “An Yahudi wal dare. Zeno nik mo tawa tabinni neno mae mo epba lowe hensa dikim wet gulsuzimdin hip. Hwena hom dakastilin– Roma mo irik gin zini nen de zeno ol san ang tan hapye. In zep zeno nik mo tawa tabin nikon ena awe de zini eilman gwe-gweꞌan.”
²¹ (16:20)
²² Zi beyam-byana dekam zep hen egu anek, “In eiwa!” Teipsin-teipsin wenya in dekam zep baju talwesizimdin nika de lek-lek son hap nenbiridak.
²³ Mam enkam kim lek-lek nososuk, ki zep hwena bwinak se nosoink. Bwinak de nol gwen zi nika zep nenblak, “An dawem en tangankam kara so.”
²⁴ Kirekam insa nenblak, olk de tekson tangannak zep se so inki. Zeno nik mo tanana te hlangnak zep bat nosozim anek.
²⁵ Hwena ngirin tatem zep Alapsa abe laꞌanka hen terya ban isrip-sri e gweblaꞌanka. Ahakore bwinak de zini man sane nosoꞌak.
²⁶ Mumuk ennak zep jingil yala tailki, hendep bwina in mo moko hap de kasona man eewak gwek. Hendep dekam zep bwi lilikinni in etalwesik. Hen mensa bwinak de zini besikam de dokotkam dahalebik, man hendep esom-som gwe hanak.
²⁷ Bwinak de nola in ni tan nakon zep auna hlo zaka. Kim hlaulku, “Lilikinni tingan talusundan nik erlwaꞌan,” dekam zep sap nebok zemka mol ineka– zenaka dikim dang gulblun hap. Sap zen man tim gulku, “Mes eheya-hya gwenan. Hare an ki hwena asa sa dal!”
²⁸ Hwena Paulus ki zep ol mamkam takenblaka, “Bahem enaka tan! Ëe tingan namae lowe heꞌan!”
²⁹ Dekam zep zere hon de ebabu gwe-gwen zisi syauk ngatan naban de golehlu-hluk gwezan hap takenbiridaka. Zena ki zep yal-yala ban Paulus ne Silas nik mo nwenak boklena kom sozim zika.
³⁰ Kim kon ziwet soka, dekam zep takensizimki, “Bian ne bian ne, ee basa asa syal gwibir? – ee dikim ngaya gwen hapye.”
³¹ Ki zep ding ulblika, “Bian Yesussu em anakan taibliblan, ‘Zen Zen– asa de ngaya tan hap de Zi niye,’ dekam esa ngaya gwera. Hen kirekam, eno golak de wenyaye.”
³² Dekam zep Bian Yesus hup de ol dawemna zeno golak lonbiridaka.
³³ Hendep dekam zep kam zeno nik mo wei-weina ngan tasibir-zimki. Hendep kam zep ki hendep zena hen zere mo golak denaban tingan baptis labirki.
³⁴ Tembanena ki zep hwena golzimki. Zena dekam zep zere mo golak de wenya ban goleisrip-sri gweka, sap zen mes Alapsa daibliblak.
³⁵ Kim litik, ki zep teipsin-teipsin wenya in zere mae mo jana nabare zini bwi gol san dep lup nul sonek– zao de nol gwen zini insa de gublun hap, “Paulus ne Silas ne dikire song ek.”
³⁶ Ki zep bwinak de nola in guzimki, “Asa man nenblananzal: Em sap esa song era. Dawem enkam song e.”
³⁷ Hwena Paulus ki zep jana nabare zini insa gubiridaka, “Ëe an Roma mo irik ginnik de zi dare sake. Zen hwena takensizimdin sremkam totoresa zi nwenak asa lek-lek nosok! Ki zep hen takensizimdin sremkam bwinak asa se nosoink. Hwena angkam man edwam gweꞌan– sowekam de asa guzimdin hip, ‘Dikire song ek.’ Kirekam ee ama baes eꞌan. Dikire zen yaing gwezak– dekam de asa hil so sonen hapye.”
³⁸ Jana nabare zini in kim teipsin-teipsin wenya insa kirekam nenbiridak, dekam kim anakan tame nuk, “O Paulus ne Silas ne, an hare Roma mo irik ginnik denakake,” dekam zep eairiꞌak. Sap Roma mo irik gin zisi bejen totoresa karek tan. Sap zen man tim nosok, “An Yahudi en kore zi dare.”
³⁹ Dekam zep zeno nik mo enlalasa de se ta sonezimdin hip yaing gwezak, ki zep anakare ola ban hil noso sonek, “Bahem asa jal eibiridan. Hwena emki ena an kon song en.”
⁴⁰ Kim wet osoka, ki zep Lidia mo gol san dep song eka. Zao kim Yesussu de taibliblan wenya tagal ulsuku, zao zep aumwa hap ol zim-zimni lonbiridaka. Zena ki zep kon ehalka.