¹ Ahana hen zini ki, bosena Ananias Bak. We zem bosena Sapira. Zen hen kamasa te-ala hap lirak uk.
² Hwena zen man te-alana zere nikip hli lasik. Aha hlik en naka zep Ananias dua-blaskam de wenya kip anakare ola ban zerzimki, “An tingane ep zerzimꞌin.” Hwena we zeban mes kirekam de ahap labin hip ola aha-en uk.
³ Ki zep Petrus gubluka, “Ananias, em bap ere mo enhonak dowal mo kigisa kara taꞌara? Em zebe Alap mo Enhona boton tanda. Te-alana an erep ema hli tasili.
⁴ Kamana in lirak gun sremnak, zen dwan ere nik mo denakake. Hen kime lirak gulku, te-alana zen dwan hen ere nik mo denakake. Diki emaka asa gubiridala, ‘Ëe aha hlik en tolakae golzimꞌin.’ Hwena em an asa en home boton tabirida. Hwena Alapsae boton tanda!”
⁵ Ananias kim sane taꞌanka, ki zep ze hendep tokna zanka. Kitak men zen esak, dekam zep serkam eairiꞌak.
⁶ Wal sei-siwiri ki zep yaing gwezak– tok naka de tahalehan hap. Kire naka zep dre nwanun hap nerhak.
⁷ Yakla nwena san ha dan-ahan damank, ki zep hwena we zem hatazak. Zen hom tame guꞌuk– in zen ki zi zebon lwakye.
⁸ Petrus ki zep takensibirki, “Emki asa gublun: San ha eiwa te-alana an zen en?” Ki zep ding gulbluk, “In eiwa, zen en.”
⁹ Petrus dekam zep ding gulbirki, “Em bap ola aha-en ulki– Alap mo Enhosa dikim akasiblin hapye! Emki tana sasak-sasaksa sane gwe gun. Zini men zen eno zi mo tokna ner dwanunan, zen lwanda haꞌanzal. Zen hen kirekam sa eno tokna nolwet sol!”
¹⁰ Zen hen mumuk ennak zep tokna zank. Wal sei-siwiri in kim yaing gweꞌanzak, ki zep ze we zik mo tokna hla nulzik. Desa ki zep hen zi zik mo alp nakon de lo nwanun hap nol inehak.
¹¹ Dekam tangan tingare Yesussu de taibliblan wenya hen tingan men zen esak dawemkam tangan eairiꞌak.
¹² Dua-blaskam de dam tasibin wenya dekam zep owas-owasna beyakam zi trana in mo ngirinnik syal nei gwibik. Yesussu de taibliblan wenya in dekam man Alap mo golak etagal gwe-gwek– Salomo Bak mo teksonnak.
¹³ Yesussu de taibliblan srem wenya, zen hom ze egolek de gwe-gwek. Zen man nairibirida gwek, hwena man tangan hen dawemkam blikip neisibirida gwek.
¹⁴ Hwena zao kim lwa seꞌak, zao zep etan Yesussu de taibliblankam emas-mas gwe zaheꞌak– sap zi, sap we.
¹⁵ Hendep dekam zep zi sang-sangna ora san zato naban hen deyol dere naban kang nul zahe gwek. Man eenlala gwe-gwek, “Petrus de desan taman zankam, zeno au-au en mae nik de kwe tabir zinkam, zen dekam sa edawem gwer.”
¹⁶ Zini beyam-bya tangan nik Yerusalem mo golek de e-e nakon zi sang-sangna kap nulhal gwezak– hen dowal de tilbiridan mae naka. Zen dekam zep kitak edawem gwe-gwek.
¹⁷ Alap mo golak de syal tan zi mo teipsinni dekam zep wal bose wal zeban zihusus gwibiridaꞌanka. Zen kitak Saduki hon de biti gwen wenya. Zen mae hap zihusus gwibiridaꞌanka: “Abon mae onakon kim hwena beyakam wet so gweꞌan.”
¹⁸ Dekam zep dua-blaskam de dam tasibin wenya insa dahyok. Ki zep bwinak yal nulnek.
¹⁹ Hwena kam zep Alap mo dam taha nakore zi lilikinni talusuzim niraka. Desan zep golewet so gweka.
²⁰ Man ze gubiridaka, “Em sek gwen. Alap mo gol teksonnak ezauk. Dekon engaya gwen hap de ola insa kitak lonbiridak.”
²¹ Kim litik, kirekam zep ki hendep syal neibik. Alap mo golak de syal tan zi mo teipsinni dekam zep hen wal bose wal zeban Alap mo gola iwe aha teksonnak goleyaing gwe zaka. Dekon zep Yahudi mo teipsin sinodenak dena nen sone-biridak– hendep tingan. Zen kim yaing gwezak, dekam zep Alap mo golak de jana nabare zini nenbiridak– bwinak de zini insa de kap gul halzan hap.
²² Zen kim bwinak yaing gwek, hwena hom ze hla nulidak. Kim lwan dahak, ki zep nenbiridak,
²³ “Ëe kime ze yaing gwenal, dekam lilikinni kitak tayalsibiri danna. Hen lilikin kara tabin hip dena, zao ezaun dasan. Hwena kime lalusundal, ee home mae ze zini hla lal!”
²⁴ Kirekam kim nenbiridazak, dekam zep jana nabare zi mo mamna hen Alap mo golak de syal tan zi mo mam-mamna in enlalana anakare hap etopse gweꞌak, “An ki banarekam sa lwal?”
²⁵ Hwena ki zep ze zini gubirida zaka, “Emki esan! Em mensa zini bwinak yal ulnek, zen angkam Alap mo gola an mo aha teksonnak zi beyam-byasa tawa dabiꞌin!”
²⁶ Jana nabare zi mo mamna in dekam zep desan dep golesek gweka– etan de zitahyo halzan hap. Hwena sam-sam enkam kwang nulida halzak– mae hap, “Nene jala ban kwang ulida haꞌak, ki zi trana an sa nesa kasokam mos-mos da gubir.”
²⁷ Ki zep etan nolebiti gwezak– dekam de Alap mo golak de syal tan zi mo teipsinni in taken-taken gwibiridan hap, tingare teipsin-teipsin zi mo nwenak.
²⁸ Zen man gubiridaka, “Ëe dwan mes-am ol drakkam emsa anakan jalse eibiridak, ‘Em bahem zini in mo bosekam tawa ta gwibin.’ Hwena em mese kitak de Yerusalemk de zini tawa la gwibik. Hen em dekam ema ekalang gweꞌan– Yesussu de tan jal hap de zen hwena asa tamerazan hap!”
²⁹ Petrus ki zep wal bose wal zeban ziding gulku, “Nen diki Alap ensa nen betek gweblan. Zi bosyansa bap nen!
³⁰ Neno mae mo auyan-aza mo Alap, Zen mes Yesussu tin nikon ngaya taka– mensa ena te-lidak sonnak makan la inkke.
³¹ Hwena Alap mes Desa zere mo dam taha nakon de teipsin hip drene seka– dekon de irik gin hip hen ngaya tabin hip, hen Israelk de zisi dikim halen ora san dep golewet so gwen hap, hen zeno mae mo karek-kareksa dikim tap gulsuk gwizimdin hip.
³² Asa hen mes ki dam tasibirki– dekam de ola insa gol halada gwen hap. Hen owas-owasna mensa Alap mo Enhona abe mae hap gol gwizimnira, zen ola insa dikim eiwa gul gwen hap. Zep zini men zen Zenaka betek ne gweblaꞌan, zebe mae hap angkam man Alap zere mo Enhona zer gwizimꞌira.”
³³ Kirekam kim Petrussu nasalblak, dekam zep ejal gweꞌak, hendep tameran hap zep enlala neibiridaꞌak.
³⁴ Hwena Farisi walya bosena Gamaliel Bak zao hen gweꞌanka. Zen Musa mo titi tabin olsa de tawa ta gwibin hip de zi, hen desa zini man blikip neisik gweblak. Zen ki zep luweka, ki zep gubiridaka– dua-blaskam de wenya insa de e nakon goleeissin dalaboran hap.
³⁵ Ki zep gubiridaka, “Israel mo ausu nakore zi, dawem enkam emki anakan eenlala gwen, ‘Kirekam asa eibiridal.’
³⁶ Sap orep zini bosena Teyudas, zen man zenaka gu gweblaka, ‘Ëe mamna,’ dekam zep zini 400 enkam ang neblak. Hwena kim dak, dekam zep zebon de ang ta gwen wenya in sekwak gwek, hendep dekon etan banakan mae hom lwak.
³⁷ Zeno hyanak kim sensus nuk, dekam etan Galilea walya Yudas man goleilman gweka. Hwena kim hen dak, zebon de ang ta gwen wenya dekam zep hen sekwak gwek.
³⁸ Zen in zep, angkam an zen ki lwaꞌan, ee ama emsa titi tabiꞌin: Bahem banakan mae gweibiridan. Nwe enkam emki kara tabin. Sap zeno mae mo syala hen tawa tabinni, zi mo enlala san de lwaꞌak, sa topse gwizim.
³⁹ Hwena Alap mo enlala gwibin sin diki syal taꞌak, esa topse eibiridal. Nene hwena lameraꞌak, ki hwena sa nwe-mase gwer– san de Alap han de zerilman gwenna kiye.” Zeno ol san zep ang tak.
⁴⁰ Ki zep etan dua-blaskam de wenya insa de golebiti gwezan hap nenbiridak. Zao zep dangolebik. Ki zep nenbiridak, “Dekam sek gwek. Hwena Yesus mo bosekam bahem etan tawa ta gwibin.”
⁴¹ Zen hwena isrip-sri naban zep kon sek gwek. Sap Alap mes desa anakan gubiridaka, “Zen mes edakastik– Yesus mo bose hap de kareksa goltowen hapye.”
⁴² Zen hwena hom nolzausuk– anakarekam de tawa ta gwibin niye, “Yesus Zen Zen– nesa de ngaya tabin hip de Zi niye, mensa Alap gu-guk gwekaye.” Zen yakla jamkam Alap mo gol teksonnak hen zi mo gol-gol san donbirida gwek.