Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ta'e oyuíon tobatuí ḷoḷaki tangoinya ki Ananias, ki buḷoinya ki Sapira. Taya dua motonibuḷoi na'a nopotaḷui doman im butaí monia totampat.
2 Iyosingogdon muna nayadua motonibuḷoi tua, kom bolinya tobotak taguíon monia sim pakeíon tontanií yo tobotak in ogoi kon rasul mita.
3 Daí ki Petrus noliboí ko'inia, "Ananias nongonu sim pomayakmubií makow Ibilis mongawasa kong ginamu, modapot ikow monguboḷ kon Roho i Allah, takin umuni-uni makow motaguí kom boli im butaí ibanea sim pakeíonmu tontanií?
4 Butaí tatua im butaímubií wakutu in diaípa pinotaḷuimu. Bo naonda im pinotaḷuimudon, bolinya in ikowbií doman kitogi. Daí nongonu sim moroncanabií ikow kon diaí mopia natua? De'emanbií intau in inuboḷanmu, ta'e ki Allahbií!"
5 Naonda in nokodongog kon singog i Petrus natua ki Ananias baḷuí no'umpag bo minatoi. Daí totok nongo'ondok in intau mita inta nokodongog kon onu inta nobalií tatua.
6 Bo tongonumai in tayamobiag namangoi bo nobakut kom mayat i Ananias tatua, bo binuligan monia pinoḷuai sim bayaían ḷobongon.
7 Degaí toḷumai nojam no'iduduimai kon tua, no'iangoi ing kibuḷoi Ananias, ta'e diaíbií kinota'auannya onu inta bagu nobalií.
8 Daí ki Petrus noguman ko'inia, "Pogumankah ko'inakoí mongo totu'u kon tongaíbií natua boli im butaí inta pinotaḷui monimu?" Bobay tatua notubag, "Totu'u, tongaíbií natua."
9 Daí ki Petrus noliboí bui nana'a "Nongonu sing kamunda motonibuḷoi im mo'ibogbií monungkuḷ kon Roho i Tuhan? Indoiaikah in intau mita inta bagu no'iangoi minayak noḷobong ko'i buḷoimu, sinimindogdon makow kon tayowon in ḷolingkop sim modia domandon ko'inimu poḷuai sim bayaían ḷobongon."
10 Bo no'umpag domandon kon dodai intuata im bobay tatua kon tayowonmai i Petrus. Daí naonda in tayamobiag mita tatua sinumu'ot, kinobayaíanmai monia minatoi domandon im bobay tatua.
11 Daí totokdon no'ondok im bayongan jama'at bo bayongan intau inta nokodongog kon onu inta ain nobalií tatua.
12 Bo mobayong doman in soaáḷ mita inta mokoherang inaidan rasul mita tatua kon sigad in intau moaíntoí kon tua. Komintan intau inta nopirisayadon umuran moyosipun kon tampat inta sinangoian serambi Salomo bo umuran doman motobatuí kong gina.
13 Intau mita ibanea diaí ing kobalií dumugang ko'i monia. Bo totok hormaton in intau mita moaíntoí im mosia.
14 Ko'onggot-ko'onggot daí kodugang-kodugang domandon intau inta mopirisaya ko'i Tuhan, ḷoḷaki bo bobay.
15 Intau mita kon tua umuran mopoḷuai in intau mita inta mongotakit bo pobayak in doḷa'ag popo'ulid kon tosiugan andeka boḷad, simbaí mosia paling tidak kotugatan in olinow i Petrus aka ki Petrus mo'italib.
16 Naí doman tua, intau moaíntoí inta nongkon kotaí mita inta kon diugmai in Yerusalem diaí doman mobonto-bontow im mamangoi kodia-dia in intau mongotakit bo intau mita inta kinotoḷongan in dimukud mora'at. Mosia komintan nodait sinoko'undaman dapot nongopia.
17 Pangabisannya imang mita moḷoben bo dumodudui mita monia inta intau mita nongkon golongan Saduki mulaidon moya'at ing gina lantaran mo'intoi.
18 Daí sinoko domok monia in rasul mita tatua bo binonu kom ponjara kong kotaí tatua.
19 Ta'e nodoḷom monag, tobatuí malaekat i Tuhan nomukat kon ḷolingkop mita im ponjara tatua bodongka nodia ko'i monia iḷumuai. Malaekat tatua noguman kon rasul mita tatua,
20 "Bayakdon sindog kom Baḷoi Tuhan bo popota'audon kom bayongan intau soaáḷ kobiagan inta mobagu na'a."
21 Daí rasul mita tatua dinumudui kong koyow im malaekat tatua. Modiugpa mobayag mosia minayak im Baḷoi Tuhan bo mulai notunduí kon tua. Kon wakutu intua imang moḷoben bo dumoduduinya mita namangoi bo nogaid kon sidang takin itoi mita intau Yahudi. Onda intua binayak monia pinoki gamaí in rasul mita tatua kon ponjara sin sidangon potayow ko'i monia.
22 Ta'e naonda intau mita inta pinotabaí tatua minayak im ponjara, kinobayaíanmai monia rasul mita tatua diaídon ing kom ponjara, daí nobui im mosia bo nopota'au kon soaáḷ tatua kom mahkamah.
23 Kai monia, "Kino bayaíanmai nami ponjara ing kinunsiaínbií notompia bo moḷoḷukad mita kom ponjara komintanbií kon tua kon tayowonmai in ḷolingkop, ta'e naonda im binukatandon nami ḷolingkop im ponjara, diaí bidon tobatuímai ing kom bonunya."
24 Naonda itoi moḷoḷukad kom Baḷoi Tuhan bo imang mita itoi nokodongog kon onu inta pinoguman monia tua, mosia no'ondok bo poḷat noliboí mongo onu in nobalií kon rasul mita tatua.
25 Tongaí namangoidon intau tobatuí kon sigad monia tua bo noguman nana'a, "Indoiakah daí intau mita inta binonu monimu kom ponjara, tuabií komintan kom bonu im Baḷoi Tuhan koyogot im motunduí kon intau moaíntoí!"
26 Daí bui bo binayak ginamaí in itoi mita inta moḷoḷukad kom Baḷoi Tuhan bo in intaunya mita im mosia. Ta'e ki pia-piabiímai mosia nodia ko'i monia, sim mo'ondok kon intau moaíntoí kon tua sin dikabo arabon monia.
27 Ki Petrus bo ki Yohanes dinia monia kon tayowon in sidang agama. Bo nomangkoidon nosingog ing ki imang moḷoben.
28 Kainia, "Aindon ilarang totok nami im mo'ikow simbaí diaídon mayak bo mopota'a-ta'au makow in tangoi intau tatua. Ta'e tana'a indoiaikah, onu in inaidan monimu! Mo'ikow minaya-mayakbií doman makow bo nopohabar in soaáḷ intau tatua kom bayongan butaí in Yerusalem bo moguman doman kon kamibií na'a in nokopopisií kong kinopatoian-Nya."
29 Ta'e ki Petrus bo ki Yohanes noguman, "Kami mustibií mokidongog ko'i Allah, de'emanbií dumudui kon singog in intau nion.
30 Ki Yesus inta aindon ilimod bo pinopopakuí monimu kong kayu pinoyotalempang tua im buibií biniag i Allah i mogoguyang naton.
31 Ki Yesusbií tua inta ain inogoian kadudukan bo kawasa moḷantud saḷaku Itoi bo Mopoposaḷamat, simbaí intau Israel ogoian in wakutu mogogai mogaid kon dosa, baí ampungan im mosia.
32 Aim bidon inontong nami tontanií ing kinobaliían tua komintan. Kami bo Roho doman i Allah inta inogoi i Allah kom bayongan intau inta umuran dinumudui kom parentah-Nya."
33 Nokodongogmai kon tua, totok im mosia sinumoruí, sahingga ibogon monia limodonbií in rasul mita tatua.
34 Ta'e tobatuí intau im Parisi inta nobalií anggota im pongadilan agama tatua inta ki Gamaliel in tangoinya, tobatuí mototunduí kon agama inta totok ing kino-insim im bayongan intau kon tua sinimindog bo nopo'igum simbaí poḷuaipa motoyong in rasul mita tatua.
35 Onda im pinoḷuaidon monia in rasul mita tatua, nosingogdon in sia kon tayowon in sidang tatua, "Hei intau mita in Israel, porai kopira im moporupa-rupamai kon rasul mita tatua.
36 Sing kolipod pernah doman no'iangoi intau inta tangoinya ki Teudas. Sia nongaku kon intaubi' moḷoben in sia sahingga degaí opatmai nogatut intau dinumudui ko'inia. Ta'e sia ilimod bo nodait no'irangkap in dumoduduinya mita.
37 No'iduduimai ko'inia, wakutu im pinogiapan kon umat mita, no'itukat doman mangoi ing ki Yudas intau ing Gailiea. Sia namangoi nodia kon intau moaíntoí bo nomarontak, ta'e sia minatoi doman bo nongo'irangkap domandon in dumoduduinya mita.
38 Tuamai aku'oi moguman ko'i monimu nana'a: Dona'aidon rupa-rupa'anmai monimu in intau mita tatua. Pomayakdon makow im mosia. Sin aka makusud bo oaíid monia na'a nongkon intau, yo moputuíbií doman im mosia.
39 Tongaí aka tua bo nongkon i Allah yo diaíbií mokopongonu im mo'ikow, sedang monyata kom moḷawangbií ko'i Allah im mo'ikow." Tonggina tatua inindongogan monia.
40 Daí inoiniídon bui monia in rasul mita tatua, sinambok bo dinandi kon diaí bidon mota'au mosia bui mopota'au in habar soaáḷ ki Yesus kon intau mita kon tua. Onda intua binuliandon bui monia.
41 Rasul mita tatua nobuidon nongkon sidang agama tatua takin pia ing gina, sing kinota'auan bidon monia kon natuabií im mobalií dumodudui i Yesus. Patusbií im mosia motarima kon singkule lantaran ki Yesus.
42 Bo pomuḷoi in singgai mosia umuran mayak im Baḷoi Tuhan bo mayak doman im baḷo-baḷoiannya mopoyaput in habar kong ki Yesus tua in Rajabií Mopoposaḷamat.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA