Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dhabuna PANGERAN ka Mosa, "Kassa’ ba’na entar pole ka rato Messer. Kabala ja’ Sengko’ apessen kantha reya, ‘Panneng Tang ommat entara abakte ka Sengko’.

² Mon ba’na ta’ ngedine, nagara reya bi’ Sengko’ eokoma, epadhatengngana kata’ se ta’ sakera-kera bannya’na.

³ Songay Nil bakal possa’a ban kata’, sampe’ ta’-kata’ jareya kalowar dhari songay, maso’ ka karatonna ba’na, ka kamar katedhunganna, la’-mala’ sampe’ ka ranjangnga, ka ko-bengkona para ponggabana ban ko-bengkona ra’yat, la’-mala’ sampe’ maso’ ka pangeppananna roti ban ka dhalem adunna rotina.

⁴ Ta’-kata’ jareya bakal nalara ka badanna ba’na, ka badanna ja-pangraja ban badanna ra’yat.’"

⁵ Dhabuna PANGERAN ka Mosa, "Harun soro mangaceng tongkedda e attasanna ngay-songay, sellogan ban man-taman, me’ olle pas kalowar kata’ se mossa’e tana Messer."

⁶ Daddi Harun laju mangaceng tongkedda e attasanna ngay-songay, sellogan ban man-taman. Neng e man-dhimman sanagara Messer laju possa’ ban kata’.

⁷ Tape kang-tokang tennongnga rato nerowe keya madhateng kata’ se mossa’e daddi sanagara Messer, kalaban ngangguy wa’-duwa’.

⁸ Rato nembali Mosa ban Harun, dhabuna, "Mara nyo’on ka PANGERANna ba’na me’ olle ta’-kata’ reya epatadha’. Mon la tadha’ kabbi bi’ sengko’ bangsana ba’na eedinana ngatorragi kurban ka PANGERANna."

⁹ Atorra Mosa, "Sae. Ngereng tantowagi baktoepon, bila abdidalem se nyo’onnagiya junandalem sareng sadajana pangraja sareng ra’yat Messer, sopaja ta’-kata’ ka’dhinto epatadha’a sadaja kajabana namong neng e Songay Nil."

¹⁰ Dhabuna rato, "Lagguna." Dhabuna Mosa, "Abdidalem badhi alampa’agiya dhabuepon junandalem, sopaja junandalem ngagaliya ja’ tadha’ Allah salaenna PANGERAN, Allahepon Isra’il.

¹¹ Ta’-kata’ ka’dhinto sareng PANGERAN bakal epatadha’a, sopaja junandalem sareng sadajana pangraja, jugan sareng sadajana ra’yat ta’ egangguwa pole. Ta’ kera badha kata’ pole neng e po’-compo’ sareng e man-ka’dhimman, kajabana neng e Songay Nil."

¹² Mosa ban Harun pas nyengga dhari jadhiya. Mosa laju adu’a nyo’on ka PANGERAN sopaja ta’-kata’ se epadhateng menangka okoman ka rato jareya epamosna’a.

¹³ PANGERAN ngabbuli parnyo’onanna Mosa jareya. Ta’-kata’ se badha e ko-bengko, taneyan ban gal-teggal padha epamate kabbi.

¹⁴ Bi’ oreng Messer babathangnga epakompol sampe’ abuk-tombuk, sampe’ sanagara baceng abatthowangan.

¹⁵ E bakto rato ngoladi ja’ ta’-kata’ la mate kabbi, pas macengkal pole. Akantha se la edhabuwagi PANGERAN, rato ta’ meyarsa’agi dhabuna Mosa ban Harun.

¹⁶ Dhabuna PANGERAN ka Mosa, "Koca’ ka Harun, tongkedda soro pokollagi ka tana, abu sanagara Messer tanto pas aoba daddi rengnge’."

¹⁷ Dhabuna PANGERAN jareya elampa’agi. Harun mokollagi tongkedda ka tana. Abu sanagara Messer pas aoba daddi rengnge’, ngaromo’ manossa ban keban.

¹⁸ Kang-tokang tennong ngoddi ngangguy wa’-duwa’ madhatengnga rengnge’ kantha jareya keya, tape ta’ bisa. E man-dhimman possa’ ban rengnge’ se ngaromo’ manossa ban keban,

¹⁹ sampe’ kang-tokang tennong jareya mator ka rato, "Ka’dhinto Allah se madhateng." Tape rato paggun macengkal; akantha se la edhabuwagi PANGERAN, paggun ta’ meyarsa’agi dhabuna Mosa ban Harun.

²⁰ Dhabuna PANGERAN ka Mosa, "Lagguna gu-laggu ba’na entar ka rato, pateppa’ baktona rato entar ka songay. Kabala ja’ Sengko’ apessen kantha reya: ‘Panneng Tang ommat kalowar dhari dhinna’, me’ olle ngenneng abakte ka Sengko’.

²¹ Mon bi’ ba’na ta’ ebagi, bi’ Sengko’ ba’na epadhatengngana lala’, bariya keya ba-ponggabana ban ra’yadda ba’na. Ko-bengkona oreng Messer, la’-mala’ tana sanagara Messer, bakal possa’a ban lala’.

²² Tape bagiyan Gosyen, kennengnganna Tang ommat, bi’ Sengko’ epabida’a; bi’ Sengko’ kennengngan jareya ta’ epadhatengngana lala’, sopaja ba’na taowa ja’ Sengko’, PANGERAN, badha e nagara reya.

²³ Sengko’ mabida’a Tang ommat dhari ra’yadda ba’na. Kaajiban jareya bakal kadaddiyana lagguna.’"

²⁴ PANGERAN madhateng lala’ ta’ sakera-kera bannya’na, mossa’e karaton ban bengkona ba-ponggabana rato sarta ra’yat Messer. Oreng sanagara nyandhang sangsara polana lala’ jareya.

²⁵ Rato laju nembali Mosa ban Harun. Dhabuna rato, "Kassa’ la kat-mangkat mon entara ngatorragiya kurban ka Allahna, tape neng e nagara reya bai."

²⁶ Tape Mosa mator, "Ta’ kengeng kadi ka’dhinto, sabab oreng Messer tanto peggel manabi nengale oreng Isra’il ngatorragi kurban ka PANGERAN, Allahna bangsa abdidalem; tanto oreng Isra’il pas egarujuk sareng oreng Messer.

²⁷ Bangsa Isra’il kodu entar ka sagara beddhi se jauepon tello are parjalanan dhari ka’dhinto, badhi ngatorragiya kurban ka PANGERAN, Allahepon bangsa abdidalem, akadi se edhabuwagi PANGERAN dibi’ ka abdidalem."

²⁸ Dhabuna rato, "Iya, kassa’, bi’ sengko’ bangsana ba’na eedinana entar ka sagara beddhi kaangguy ngatorragiya kurban ka PANGERAN, Allahna ba’na. Tape ja’ u-jau. Pojiyagi sengko’ ka Allahna."

²⁹ Atorra Mosa, "Samangken abdidalem mangkada, abdidalem pas nyo’onnagiya ka PANGERAN sopaja lagguwepon lala’ se bannya’ ka’dhinto epatadha’a sadaja, sopaja ta’ agangguwa pole ka junandalem, sareng ka sadajana ponggabana junandalem, jugan ka ra’yattepon. Namong junandalem ja’ co-ngoco pole, ja’ lang-ngalange oreng Isra’il se padha entara ngatorragiya kurban ka PANGERAN."

³⁰ Saellana jareya Mosa pas kalowar dhari karaton, laju nyo’on ka PANGERAN.

³¹ PANGERAN ngabbuli parnyo’onanna. Lala’ gella’ padha ngabber, ondur dhari kalenggiyanna rato, dhari kennengnganna para ponggabana ban ra’yadda. Tadha’ karena settonga.

³² Tape rato paggun aoba pole, paggun macengkal, bangsa Isra’il ta’ eedine kalowar dhari nagarana.

Keluaran

Video Keluaran 8

Ikuti Kami:

KONTAK | PARTISIPASI | DONASI