Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dhabuna PANGERAN, "Bi’ Sengko’ ba’na epakantha’a Allah e adha’anna rato Messer, dineng Harun taretanna ba’na se acaca’a akantha nabbi.
2 Kabala ka Harun sabarang se eparenta’agi Sengko’ ka ba’na; dineng Harun pas kodu ngoca’ ka rato sopaja oreng Isra’il ebagiya kalowar dhari nagara reya.
3 Tape bi’ Sengko’ rato Messer epacengkala; ta’ endha’ ngedhingngagi ka ba’na, maske Sengko’ la mabadha kaajiban se acem-macem e Messer jareya.
4 Mon rato ta’ endha’ ngedhingngagi ka ba’na, bi’ Sengko’ Messer eokoma epaberra’a; dineng Tang ommat, oreng Isra’il, bi’ Sengko’ epakalowara dhari nagara jareya.
5 Daddi, e bakto Sengko’ ngokom bangsa Messer ban makalowar ommat Isra’il dhari nagara jareya, oreng Messer tanto pas tao ja’ Sengko’ reya PANGERAN."
6 Mosa ban Harun laju alampa’agi sabarang se edhabuwagi PANGERAN jareya.
7 E bakto ngadhep ka rato Messer jareya, yuswana Mosa ballung polo taon ban Harun ballung polo tello’ taon.
8 Dhabuna PANGERAN ka Mosa ban Harun,
9 "Mon rato nyoro ba’na mabadha kaajiban menangka bukte, Harun soro ngala’ tongkedda. Tongket jareya soro ontallagi ka tana e adha’anna rato; tongket jareya tanto pas aoba daddi olar."
10 Daddi Mosa ban Harun ngadhep ka rato akantha se la edhabuwagi PANGERAN. Bi’ Harun tongkedda eontallagi ka tana e ajunanna rato ban para ponggabana, tongket jareya pas aoba daddi olar.
11 Rato pas nembali reng-oreng se penter ban kang-tokang tennong; reng-oreng jareya nerowagi Harun.
12 Tongkedda bang-sebang padha eontallagi ka tana ngangguy wa’-duwa’, ban ket-tongket jareya laju aoba daddi olar kabbi. Tape tongkedda reng-oreng jareya eontal kabbi bi’ tongkedda Harun.
13 Sanajjan kantha jareya, rato paggun ta’ atoro’ ka dhabuna Mosa ban Harun, akantha se la edhabuwagi PANGERAN.
14 Dhabuna PANGERAN ka Mosa, "Rato Messer cengkal, ta’ endha’ ngedine bangsa Isra’il kalowar dhari nagarana.
15 Daddi kassa’ ba’na entar ka rato. Mon entara gu-laggu, teppa’na rato entar ka Songay Nil akantha biyasana. Giba tongkedda ba’na se bisa aoba daddi olar rowa. Nante’ sampe’ rato jareya napa’ ka penggir songay.
16 Ba’na ngoca’ kantha reya ka rato, ‘PANGERAN, Allahna bangsa Ibrani makon abdidalem nyo’on ka junandalem sopaja ommattepon eedine entar ka sagara beddhi sopaja kengenga abakte ka PANGERAN. Namong kantos samangken junandalem ta’ kasokan meyarsa’agi.
17 Daddi, dhabuepon PANGERAN,’ Dhari sadaja se badhi elampa’agiya PANGERAN, junandalem bakal ngagaliya pasera salerressa PANGERAN ka’dhinto. ‘Ngereng oladi. Aengnga songay ka’dhinto sareng abdidalem epokola sareng tongket ka’dhinto, aengngepon tanto pas aoba daddi dhara.
18 Ko’-juko’ e dhalem aengnga bakal mateya, aengnga songay pas bakal bacengnga kantos aengngepon ta’ ekenneng enom sareng oreng Messer.’"
19 PANGERAN adhabu pole ka Mosa, "Kassa’ Harun soro ngala’ tongkedda, soro pangaceng ka attasanna ngay-songay, sakabbinna sellogan ban taman e Messer. Aeng sanagara Messer tanto pas aoba daddi dhara, sampe’ ka aeng e dhalem thong-genthong kaju ban nay-pennay bato."
20 Mosa ban Harun alampa’agi dhabuna PANGERAN jareya. E ajunanna rato Messer ban ba-ponggabana, Harun ngangka’ tongkedda, epokollagi ka aengnga songay. Sanatkala jareya keya aengnga Songay Nil jareya aoba daddi dhara.
21 Ko’-juko’ e dhalem songay jareya mate kabbi, daddi aengnga pas baceng; reng-oreng Messer ta’ nemmo aeng se eenoma. Aeng sanagara Messer aoba daddi dhara kabbi.
22 Tape kang-tokang tennongnga rato ngalakone kantha jareya keya kalaban ngangguy wa’-duwa’, daddi rato gi’ paggun cengkal, ta’ kasokan meyarsa’agi ka Mosa ban Harun, akantha se la edhabuwagi bi’ PANGERAN.
23 La’-mala’ rato pas gubar ka karaton, ta’ marduli ka kadaddiyan jareya.
24 Reng-oreng Messer padha ngale lobang e salanjangnga penggirra songay, nyare aeng enom, sabab aeng songayya ta’ ekenneng enom.
25 Sampe’ pettong are abidda PANGERAN madhateng babaston se kantha jareya ka Songay Nil.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA