Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ikataken TUHAN man Musa nina,
2 "I bas wari si pemena bulan si pemena, pasanglah Kemah Perjumpan e.
3 Tamaken ku bas Kemah e Peti Perpadanen si isin Sepuluh Pedah Dibata, jenari tamaken kire-kire i lebe-lebe Peti e.
4 Baba meja e ku bas, jenari tamaken alat-alatna i babona. Bage pe baba nahe lampu e ku bas, jenari tamaken lampuna pe.
5 Tamaken batar-batar emas ingan nutungi barang si merim e i lebe-lebe Peti Perpadanen e, jenari gantungken kire-kire e i bas dalan bengket ku bas Kemah e.
6 Tamaken i lebe-lebe Kemah e batar-batar ingan nutung persembahen.
7 Tamaken baskom ingan lau pemurihi i kelang-kelang Kemah e ras batar-batar ndai, jenari isi alu lau.
8 Tamaken bidena ndai kelewet, janah gantungken kire-kire e i bas dalan bengket.
9 Kenca bage endeskenlah Kemah e ras kerina alat-alatna man bangKu alu ncurcurken minak penangkuhen si badia e ku je, emaka nggo jadi badia Kemah e.
10 Seterusna, endesken ka batar-batar e ras kerina alat-alatna alu ncurcurken minak ku je, emaka batar-batar e nggo jadi badia tuhu-tuhu.
11 Bage ka pe endesken lah baskom ingan lau pemurihi e ras tapakna alu cara si seri.
12 Baba lah Harun ras anak-anakna ku dalan bengket ku bas Kemah e, kenca bage suruh gelah i basuhna bana rikutken aturen agama.
13 Pakeken man Harun paken imam e, minaki ia, janah alu cara si enda ia itangkuhken, gelah banci erdahin jadi imam ndahiken dahin-dahinKu.
14 Babalah anak-anakna jenari pakeken man bana baju e.
15 Kenca bage minaki lah ia kerina, bali ras iminakindu bapana, gelah banci ia erdahin jadi imam ndahiken dahinKu. Alu bagenda ia nggo esah jadi imam terus ku bas wari-wari si reh."
16 Ibahan Musa me kerina bagi si nggo ipedahken TUHAN.
17 Emaka i bas wari si pemena bulan si pemena, i bas tahun si peduaken kenca itadingkenna Mesir, ipasang me Kemah Perjumpan e.
18 Icibalken Musa alasna, ipasangna dingdingna, isangketkenna beloti-belotina si berteng, janah ipajekkenna tiang-tiangna.
19 Ikimbangkenna tarum Kemah e jenari itamakenna lapisen tarum si arah darat, bagi si nggo ipedahken TUHAN.
20 Kenca bage ibuatna papan batu si dua ndai, jenari itamakenna ku bas Peti Perpadanen e. Itamakenna lanja-lanjana arah lubang gelang peti e, jenari itamakenna tutup peti e arah datas.
21 Kenca bage itamakenna Peti e ku bas Kemah janah isangketkenna kire-kirena man dingdingna. Alu bage ikawalina Peti Perpadanen e, sue ras si nggo ipedahken TUHAN.
22 Itamakenna meja ndai ku bas Kemah e, i darat kire-kire e arah Utara,
23 jenari itamakenna roti i babona, si ipersembahken man TUHAN, sue ras si ipedahken TUHAN.
24 Itamakenna nahe lampu e ku bas Kemah e, arah Selatan, petingtang ras meja ndai.
25 I lebe-lebe TUHAN, ipegarana lampu e i je, sue ras si nggo ipedahken TUHAN.
26 Itamakenna batar-batar emas e ku bas Kemah, i lebe-lebe kire-kire e,
27 jenari itutungna si merim-merim, sue ras si ipedahken TUHAN.
28 Isangketkenna kire-kire e i bas dalan bengket ku bas Kemah e,
29 janah i lebe-lebe kire-kire e itamakenna batar-batar man ingan nutung persembahen tutungen. I babo batar-batar e ipersembahkenna persembahen tutungen ras persembahen pangan, sue ras si nggo ipedahken TUHAN.
30 Itamakenna baskom ingan lau pemurihi i kelang-kelang Kemah ras batar-batar e, jenari iisina alu lau.
31 Musa, Harun ras anak-anakna si dilaki murihi tan ras nahena i je
32 tep-tep kali ia lawes ku bas Kemah ntah ku batar-batar e, sue ras si nggo ipedahken TUHAN.
33 Ipasang Musa bide i sekelewet Kemah ras batar-batar e, jenari isangketkenna kire-kire i bas dalan bengket ku bas kesain Kemah e. Alu bage nggo dung idahikenna kerina dahin e.
34 Kenca bage lit embun nutupi Kemah e janah sinalsal kemulian TUHAN ndemi Kemah e.
35 Erkiteken si e Musa la banci bengket ku bas Kemah e.
36 Adi embun e terangkat i bas Kemah e nari, ipindahken bangsa Israel inganna erkemah ku ingan si deban.
37 Kidekah embun e ringan denga i babo Kemah e, la ipindahken kalak e inganna erkemah.
38 Kidekah perdalanen bangsa e, adi suari banci iidahna embun kemulian TUHAN i babo Kemah e, janah adi berngi idahna api si gurlah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA